«Քաղաքացիական պայմանագիր» կուսակցության անդամ Ռուբեն Ռուբինյանը Հանրապետության հրապարակում կոչ արեց հանրահավաքի մասնակիցներին՝ իրենց ձերբակալվելուց հետո էլ ամեն առավոտ՝ ժամը 8։15-ին, շարունակել քաղաքացիական անհնազանդության պայքարը։
Էրեբունի վարչական շրջանում քիչ առաջ բժշկական դիմակներով անհայտ անձինք մահակներով դաժան ծեծի են ենթարկել ոչ միայն՝ ցուցարարներին, այլև՝ իրենց գործողությունները նկարահանող լրագրողներին՝ հրահանգելով չնկարահանել իրենց։ Factor.am-ից տեղեկացնում են, որ ցուցարարներին ծեծող հրոսակների խումբը քարերով ու բռունցքներով հարձակվել է իրենց օպերատոր Հովհաննես Սարգսյանի վրա՝ հարվածելով օպերատորի գլխին։
Գարեգին Նժդեհի փողոցում արդեն մի քանի ժամ գտնվող ցուցարարներին միացավ ևս մեկ խումբ։ Ոստիկանության Շենգավիթի բաժնի դիմաց այս պահին մի քանի հազար ցուցարար կա։ Իրավիճակը Գարեգին Նժդեհի փողոցում նորից լարված է։
Իրավիճակը շարունակում է լարված մնալ Շենգավիթ վարչական շրջանում։ Ոստիկանության Շենգավիթի բաժնի դիմաց հավաքված ցուցարարներին ոստիկանները փորձում են հեռացնել տարածքից։
«Եղեք միասնական, մի ցրվեք, մեր մեջ տականք մարդիկ կան, ուշադիր եղեք, սադրանքներին չտրվեք։ Հիմա մենք կգնանք մի քիչ առաջ, ես ինֆորմացիա ունեմ, որ մեզ են գալիս միանան մի խումբ մարդ։ Նրանց դիմավորենք և կհասկանանք ընթացքում, թե ինչ ենք անելու»:
«Ձեր հավաքն անօրինական է, հավաքին մասնակցող անձինք կենթարկվեն պատասխանատվության»,- Հանրապետության հրապարակում տեղեկացրեց ոստիկանությունը։ Իրավիճակը շարունակում է լարված մնալ, ոստիկանները բերման են ենթարկում քաղաքացիներին։
Մաշտոցի պողոտայում ոստիկանության գնդապետը ժողովրդին խորհուրդ է տալիս «գնալ տներով»։ «Խաղաղ հավաք այս պահին գոյություն չունի, խաղաղ հավաքի անվան տակ իրականացվում են բազմաթիվ վարչական և այլ խախտումներ։ Մենք հորդորում ենք գնալ տներով, ենթարկվել օրենքին։ Սադրանք անողների մասին ձեր կազմակերպիչները պետք է մտածեն»,- ասաց ոստիկաններից մեկը։
Այս պահին Հանրապետության հրապարակում իրավիճակը լարված է։ Ցուցարարների մի խումբ հավաքվել է այնտեղ, իսկ ոստիկանությունը զգուշացնում է, որ հավաքն անօրինական է։
Մայրաքաղաքի տարբեր հատվածներում երթ իրականացնողներիի հետ քայլում են Հայ առաքելական եկեղեցու հոգևորականները։
Արցախի փողոց-Էրեբունի խաչմերուկն այս պահին փակել են ոստիկանները, նրանք թույլ չեն տալիս այդ շրջանի բնակիչներին ազատ տեղաշարժվել։ Մի կին ոստիկաններին ասաց, որ երեխան զանգում է, լաց է լինում, մորն է ուզում, թույլ տան անցնել, սակայն ոստիկանները թույլ չտվեցին, ասացին՝ շրջանցեք հատվածը։ Երկար խոսակցությունից հետո ոստիկանները կնոջն ուղեկցեցին տուն։
Արցախի փողոցում իրավիճակը շարունակում է լարված մնալ։ Ոստիկանությունը հատուկ միջոցներ կիրառեց, բերման ենթարկեց երթի առաջնորդներ Նիկոլ Փաշինյանին և Սասուն Միքայելյանին, նաև՝ մի շարք քաղաքացիների։ Քաղաքացիներից մեկի ինքնազգացողությունը վատացավ, նրան շտապօգնության մեքենայով տեղափոխեցին։
Արցախի փողոցում լարված իրավիճակ է. Սասուն Միքայելյանը լրագրողներին ասաց, որ հանգուցալուծումը պատկերացնում է ժողովրդի համախմբմամբ:
Սերժ Սարսգյան-Նիկոլ Փաշինյան տապալված բանակցություններից մեկ ժամ անց ոստիկանությունն ուժ կիրառեց և բերման ենթարկեցին Նիկոլ Փաշինյանին։
Նիկոլ Փաշինյանն այս պահին ցուցարարների հետ Տիգրան Մեծ պողոտայով գնում է Էրեբունի վարչական համայնք: Ցուցարարներին ուղեկցում են ոստիկանության ուժերը։ Լրագրողների հետ զրույցում Փաշինյանն ասաց, թե այս քաղաքական գործընթացում Սերժ Սարգսյանը մենակ է մնացել։
«Այս օրհասական պահին նորից հայ ժողովուրդը դուրս է եկել հրապարակ, որպեսզի ապացուցի՝ այս 30 տարիներին ձևավորված ամեն ինչի հիմնադիրն ինքն է, գերագույն հրամանատարը նույնպես ինքն է, և ինքն է որոշելու՝ ում ձայն պետք է տա, որպեսզի առաջնորդի իրեն»,- այսօր Հանրապետության հրապարակում կազմակերպված հանրահավաքի ժամանակ հայտարարեց «Քաղաքացիական պայմանագիր» կուսակցության վարչության նախագահ Սասուն Միքայելյանը։
«Այսօրվանից սկսած հրաժարվում ենք վճարել կոմունալները։ Այս հրապարակից կամ մեզնից ով վճարեց՝ վճարելու է նաև այս բոլորի փոխարեն։ Շարունակեք չվճարել, և նրանց շունչը մի քանի օրից կփչի»,-Հանրապետության հրապարակում հանրահավաքի մասնակիցներին նման կոչ արեց Դավիթ Սանասարյանը։
«Ստատուսներով հարց չի լուծվում, ստատուսներով մի խոսեք ժողովրդի հետ, հարգելի երգիչներ, դերասաններ։ Եկեք՝ կանգնեք ժողովրդի կողքին, էս մարդիկ ամբողջ օրը սոված-ծարավ այստեղ են»,- Հանրապետության հրապարակում կազմակերպված հանրահավաքի ժամանակ հայտարարեց դերասանուհի Ալինա Մարտիրոսյանը։
«Հակառակորդն ուշի-ուշով հետևում է հայաստանյան իրադարձություններին, և չի բացառվում, որ փորձի այդ առիթով օգտվել։ Դա մեկ անգամ չէ, որ եղել է։ Պետք է պարզապես աչալուրջ լինել, հատկապես՝ մեզ նման երկրի համար, որն ունի այդքան բարդ իրավիճակ՝ աշխարհաքաղաքական առումով»
Փարաքարում ՀՀԿ-ական նախկին պատգամավոր Առաքել Մովսիսյանն իր կողմնակիցներին հրահանգում է փակել ճանապարհը։ Նրա կողմնակիցները մեքենայից դուրս բերեցին մի բեռնատարի վարորդի և տարան այդտեղ գտնվող սաունայի տարածք, որի դուռը փակեցին լրագրողների առաջ։
Նախկին պատգամավոր Առաքել Մովսիսյանն այս պահին Փարաքարում է, որտեղ հիմա գտնվում է Էջմիածնից Երևան եկող երթը։ Լրագրողը հետաքրքրվեց, թե որն է այդտեղ գալու նրա նպատակը. «Իմ գյուղն ա, բա ո՞ւր էթամ։ Դու խի՞ ես եկել ստեղ։ Գնացեք՝ վերբովկա եղած Նիկոլից մնացածը ճշտեք»։
Մաշտոց-Պուշկին խաչմերուկում իրավիճակը շարունակում է քաոսային մնալ։ Ցուցարարներն անընդհատ փակում են ճանապարհը, իսկ ոստիկանները բացում են այն։ Հիմա էլ ցուցարարներին միացել են մեքենաները։
Էջմիածին քաղաքում մեկնարկած ցույցն ուղղություն է վերցրել դեպի Երևան։ Մի քանի հոգուց սկսված երթին այժմ միացել են հարյուրավոր քաղաքացիներ։
Նիկոլ Փաշինյանը ցուցարարների հետ Մյասնիկյան պողոտայում է։ Այդ հատվածում երթևեկությունը կաթվածահար է եղել։
Նիկոլ Փաշինյանի գլխավորությամբ՝ երթի մասնակցիները մոտենում են Պաշտպանության նախարարության շենքին։ Նրանք հիմա Փաշինյանի կոչով՝ քայլում են Մոլդովական փողոցով։
«Եթե Սերժ Սարգսյանը քայլ անի, կարծում եմ՝ դա միայն օգուտ կբերի մեզ բոլորիս»,- այսօր քայլերթի ժամանակ լրագրողների հետ զրույցում այս մասին ասաց «Քաղաքացիական պայմանագիր» կուսակցության նախագահ Նիկոլ Փաշինյանը՝ ընդգծելով, որ պատրաստ են քննարկել միայն Սերժ Սարգսյանի հեռացման պայմանը։
«Մենք պատրաստ ենք քննարկել միայն Սերժ Սարգսյանի հեռացման պայմանները, մենք ուզում ենք, որ իշխանության փոխանցումը ժողովրդին լինի մաքսիմալ անցնցում»,- քայլերթի ժամանակ լրագրողների հետ զրույցում ասաց «Քաղաքացիական պայմանագիր» կուսակցության նախագահ Նիկոլ Փաշինյանը։
«ԱԺ պատգամավորին՝ առանց ԱԺ համաձայնության հնարավոր չէ ձերբակալել։ Դրա համար պետք է տեղի ունենա ԱԺ նիստ, գլխավոր դատախազը պետք է մտնի, և պատկերացրեց, թե այդ օրը ինչ տեղի կունենա ՀՀ-ում։ Կարծում եմ՝ դա կդառնա հենց հեղափոխության վերջնական հաղթանակի օրը։ Եթե Սերժ Սարգսյանն ուզում է փորձել, թող փորձի»:
Նոր Նորքի 5-րդ զանգվածում Նիկոլ Փաշինյանը ժամանակ էր խնդրել՝ քննարկելու Վալերի Օսիպյանի առաջարկը։ Քիչ անց Փաշինայանն ընթերցեց «Հավաքների ազատության մասին» օրենքը՝ նշելով, թե որն է շտապ հավաքը։
«Մենք երթևեկելի մասում չենք կանգնել, ոստիկանն է մեզ կանգնեցրել, մենք շարժվում էինք։ Մենք փողոց չենք փակել, փակել են ոստիկանները, իմ վարորդին հանգիստ թողեք»,- Էրեբունի համայնքում ոստիկանին ասաց Դավիթ Սանասարյանը։
«Խնդրում եմ, դադարեցրեք այս անօրինական գործողությունը, ոստիկանների հետ չտանեք բախման։ Եթե հավաքը լիներ սահմանված կարգով, օրենք չխախտվեր, մենք կուղեկցեինք, մենք ապահովում ենք ձեր իսկ հավաքի մասնակիցների անվտանգությունը, բայց բազմիցս խնդրել ենք, որ չսահմանափակվի տրանսպորտային միջոցների տեղաշարժը»։