«Ժողովուրդ, էսօր էս ինչ արեցիք, էս ինչ բոմբել բոմբեցիք։ Այլևս ամբողջ աշխարհն է տեսնում, որ սա ժողովրդական ոչ բռնի, թավշյա հեղափոխություն է, որը հաղթելու է շատ շուտով»,- այսօր Հանրապետության հրապարակում կազմակերպված հանրահավաքի ժամանակ ասաց «Քաղաքացիական պայմանագիր» կուսակցության նախագահ Նիկոլ Փաշինյանը։
Փարաքար համայնքում ցուցարարները փակել են գլխավոր մայրուղին։ Սուրբ Հարություն եկեղեցու մոտ նրանք երկկողմանի փակել են ճանապարհը՝ կաթվածահար անելով երթևեկությունը։ Ցուցարարները մայրուղու վրա խնջույք էին կազմակերպել։ Մեր տեղեկություններով մայրուղին արդեն բացվել է։
«Դուք այսքան ազնիվ, այսքան անաղարտ, այսքան միասնական եղել եք այսօր և կլինեք վաղը։ Ես հպարտ եմ, որ հայ եմ, որ այս ազգի մի փոքրիկ մասնիկն եմ, ձեզ հետ եմ, կամ ու կլինեմ»,- այսօր Հանրապետության հրապարակում կազմակերպված հանրահավաքի ժամանակ ասաց դերասանուհի Ջուլիետա Ստեփանյանը։
«Ես կոչ եմ անում շոու-բիզնեսի ներկայացուցիչներին՝ վեր կացեք, եկեք այստեղ, ժողովրդի կողքին եղեք»,- այսօր Հանրապետության հրապարակում կազմակերպված հանրահավաքի ժամանակ հայտարարեց դերասանուհի Ալինա Մարտիրոսյանը։
Քիչ առաջ Արշակունյաց պողոտայում մի մեքենա մոտեցավ, հորիզոնական կանգնեց փողոցում և, ի նշան բողոքի՝ հրաժարվեց տեղաշարժվել։ Սաղավարտներով ոստիկանները մյուս ոստիկանների հետ փորձեցին երկու կողմից հրելով ավտոմեքենան շարժել տեղից, սակայն չկարողացան։
«Ոտքերս թողեք, այ անբարոյականներ, ո՞վ ա ձեզ իրավունք տվել իմ ոտքերին կպնել։ Դուք կին չունե՞ք, թողեք ինձ»,- Մատենադարանի հարակից տարածքում դիմելով ոստիկաններին՝ ասաց բերման ենթարկվող մի կին։ Ոստիկաններից մեկը հրահանգեց, որ, եթե տիկինը դիմադրություն է ցույց տալիս ու չի նստում ոստիկանական մեքենան, ուժ գործադրեն։
Կիևյան կամրջի մոտ 3 խոշոր բեռնատար փակել են Կիևյան և Հալաբյան փողոցները։ Նիկոլ Փաշինյանը մոտեցավ և ողջագուրվեց վարորդների հետ։ Հիշեցնենք, որ Նիկոլ Փաշինյանը երեկվա հանրահավաքի ժամանակ կոչ արեց փակել փողոցները՝ այս անգամ նաև բեռնատար ավտոմեքենաներով:
«Իրանց աման-չամանը թողել՝ եկել են…»,- Տերյան-Կորյուն խաչմերուկում նման կերպ արտահայտվեց ցույցին մասնակցող կանանց վերաբերյալ ոստիկանության մայորը։ Ցույցին մասնակցող կանանց նա խորհուրդ տվեց գնալ տուն և չինքնահաստատվել ոստիկանների վրա։
Երեկ քաղաքացիական հագուստով ոստիկանների կողմից ծեծի ենթարկված լրագրող Տիրայր Մուրադյանին այսօր Երևան-Աբովյան մայրուղում ոստիկանները բերման ենթարկեցին։
Երևան-Աբովյան մայրուղին փակած ցուցարարներին բերման են ենթարկում։ Ցուցարարներից երկուսին բերման ենթարկեցին քաղաքացիական հագուստով անձին, որոնք չներկայացան։
«Արմեն Սարգսյանը որևէ բան առաջարկելուց առաջ պետք է կատարի իմ առաջ ստանձնած իր պարտավորությունը։ Նա պետք է ցույց տա տեղեկանք, թե որ թվին է ինքը հրաժարվել Մեծ Բրիտանիայի քաղաքացիությունից, որովհետև, եթե որևէ մեկն ուզում է խոսել օրենքի գերակայության մասին, պետք է նախ ապացուցի, որ չի արհամարհում օրենքը»,- լրագրողների հետ զրույցում ասաց «Քաղաքացիական պայմանագիր» կուսակցության նախագահ Նիկոլ Փաշինյանը։
«Քաղաքացիական պայմանագիր» կուսակցության նախագահ Նիկոլ Փաշինյանից այսօր լրագրողները հետաքրքրվեցին՝ եթե Սերժ Սարգսյանը հրաժարական տա, ո՞ւմ է տեսնում վարչապետի պաշտոնում։
Երևանի Դավթաշեն վարչական շրջանում լրագրողների հետ զրույցում Նիկոլ Փաշինյանն ասաց, որ ապրիլի 23-ի իրավիճակը ցույց կտա, թե ապրիլի 24-ին ինչ են պատրաստվում անել։ Ճշտող հարցին՝ բայց ապրիլի 24-ին ինչ-որ բան անելո՞ւ եք, նա պատասխանեց. «Ապրիլի 24-ին ինչպե՞ս կարող ենք որևէ բան չանել։ Պարզ է, որ ՀՀ ցանկացած քաղաքացի ապրիլի 24-ին նախատեսում է այց՝ Ծիծեռնակաբերդ»։
Ցուցարարները երկկողմանի փակեցին Դավթաշենի կամուրջը՝ երթևեկությունն ամբողջությամբ կաթվածահար անելով այդ հատվածում։
«Մի քանի ժամ չենք տեսնվում՝ արդեն կարոտում ենք»,- Երևանի Գյուլբենկյան փողոցում Նիկոլ Փաշինյանին ասաց Երևանի փոխոստիկանապետ Վալերի Օսիպյանը։ Փաշինյանն էլ ասաց, որ արդեն ուրախանում են իրար տեսնելիս։
«Երևանի տարբեր փողոցներ այս պահին կամ փակվում են կամ փորձ է անում փակելու։ Ինձ Երևանի ամենախոշոր հատվածներից զանգեցին և ասացի, որ ամեն ինչ պատրաստ է, 10 րոպեից ձենը կլսենք։ Ես հիմա չեմ ասի, որ հատվածի մասին է խոսքը»,-Գյուլբենկյան փողոցում լրագրողների հետ զրույցում այս մասին ասաց «Քաղաքացիական պայմանագիր» կուսակցության նախագահ Նիկոլ Փաշինյանը
Տիկինը հրաժարվեց մեքենան դուրս բերել փողոցի երթևեկելի հատվածից՝ նշելով, որ դա իր քայլն է։ «Հասկանում եմ ոստիկաններին՝ իրենք իրենց գործն են անում, ես էլ իմ քայլն եմ անում։ Իմ մեքենայով փակեցի ճանապարհը, ինձ միացան նաև այլ մեքենաներ»,- լրագրողների հետ զրույցում ասաց տիկինը։
ՀՀ արդարադատության նախարարի պաշտոնակատար Դավիթ Հարությունյանն այսօր կառավարության փակ նիստից հետո լրագրողների հետ զրույցում հրաժարվեց մեկնաբանել, թե ինչու վարչապետ Սերժ Սարգսյանը հրաժարվեց իրեն հատկացված առանձնատնից:
«Ոստիկանական շղթա ճեղքելը խոսում է ցույցի ոչ խաղաղ լինելու մասին։ Կա խաղաղ, զենքով, բռնությամբ ուղղորդվող, կարգը խախտող, չխախտող և այլ իրավական բնութագրումներ: Հիմա ես շատ նորմալ եմ համարում, որ ոստիկանությունը ապահովում է հասարակական կարգը»:
ՀՀ արդարադատության նախարարի պաշտոնակատար Դավիթ Հարությունյանն այսօր կառավարության փակ նիստից հետո լրագրողների հետ զրույցում ասաց, որ կառավարությունը կփոխի նիստերի ժամերը։
«Արդյո՞ք կային անձինք, որոնք դեմ էին, որ Սերժ Սարգսյանը լինի վարչապետ, իհարկե կային, և որևէ կասկած չկա դրանում։ Երկրում չկա համասեռություն, և դուք չեք տեսել համապետական ընտրություններ, երբ մեկը ստանա 70-80 տոկոս ձայն։ Բնականաբար, կային տարբեր կարծիքներ, կային տարբեր թիմերի սատարողներ, և այս դեպքը բացառություն չէ»,- այսօր կառավարության նիստից հետո լրագրողների հետ զրույցում այս մասին ասաց ՀՀ արդարադատության նախարարի պաշտոնակատար Դավիթ Հարությունյանը։
Ինչպես արդեն տեղեկացրել ենք՝ այսօր կառավարության 3-րդ մասնաշենքի մոտ քաղաքացիական հագուստով երկու ոստիկան ծեծի են ենթարկել «Իրազեկ քաղաքացիների միավորում» հասարակական կազմակերպության լրագրող Տիրայր Մուրադյանին։
«Ես քո մոր տարիքի եմ, հուսով եմ՝ ինձ քարշ չես տա»:
Այսօր կառավարության 3-րդ մասնաշենքի մոտ քաղաքացիական հագուստով երկու ոստիկան ծեծի են ենթարկել լրագրող Տիրայր Մուրադյանին։ 168.am-ի հետ զրույցում Տիրայր Մուրադյանը պատմեց, թե ինչ է տեղի ունեցել։
Քիչ առաջ, երբ Կառավարական տուն 3 մասնաշենքի ետնամուտքի դիմացից ոստիկանները հեռացնում էին ցուցարարներին, Նիկոլ Փաշինյանը նրանց կոչ արեց ոստիկաններին չդիմադրել, իսկ ինքը նստեց գետնին։
Քիչ առաջ Կառավարական շենք 3 մասնաշենքի դիմաց գետնին նստած հավաքի մասնակիցներից ոմանց ոստիկանոթյունը բերման ենթարկեց: Ցուցարարներից երկուսը մտել էին ոստիկանական ավտոմեքենայի տակ և թույլ չէին տալիս, որպեսզի այն շարժվի:
Այս պահին ցուցարարները շրջափակել են Կառավարական տուն 3-ը, որտեղ գտնվում են մի քանի նախարարություններ։ Ոստիկանները շենքի մուտքի դիմաց պատ են կազմել։
«Մեր հայտարարած հեղափոխությունը ալիքաձև տարածվում է Հայաստանի Հանրապետությունում և ողջ Սփյուռքում։ Մեզ իրենց աջակցության խոսքերն են ասում հայտնի մտավորականներ երգահան Արմեն Մովսիսյանը, երգչուհի Լիլիթ Պիպոյանը, դերասան Հայկ Մարությանը, Հովհաննես Ազոյանը։
Հանրապետության հրապարակում մեկնարկեց հանրահավաքը։ Ցուցարարները հրապարակ բերեցին Հայաստանի եռագույնը՝ 70 մետր երկարությամբ։ Քաղաքագետ Արմեն Գրիգորյանն ասաց, որ դրոշը պատրաստվել է ապրիլյան պատերազմի ժամանակ, և այն Իսպանիայից ուղարկել է հայ համայնքը։
Այս պահին Ֆրանսիայի հրապարակից բերման են ենթարկում հավաքի մասնակիցներին: Քաղաքացիները փորձեցին փակել փողոցը, սակայն ոստիկանները թույլ չտվեցին։
