Վերաքննիչ դատարանն անփոփոխ է թողել Երևանի ընդհանուր իրավասության դատարանի որոշումը՝ ԱԺ նախկին պատգամավոր, ՀՀ բռնցքամարտի ֆեդերացիայի նախագահ Արթուր Գևորգյանի նկատմամբ կալանքը որպես խափանման միջոց ընտրելու մասին որոշումը։ Գևորգյանի շահերի պաշտպան Հրայր Անանյանի գնահատմամբ՝ իր ներկայացրած բողոքի մերժումը հակասում է օրենքին:
Հատուկ քննչական ծառայության պետ Սասուն Խաչատրյանը այսօր ԱԺ-ում՝ պատասխանելով լրագրողների հարցերին, անդրադարձավ նաև 2008 թվականի մարտի 1-ի 10 զոհերի սպանության հանգամանքների բացահայտման վերաբերյալ քրեական գործին:
2018 թվականին ԱԱԾ տնօրենի և ՀՔԾ պետի հեռախոսազանգի գաղտնալսումից անցել է գրեթե երկու տարի, սակայն գործի քննությունը դեռևս ավարտված չէ: Այսօր լրագրողների հետ զրույցում ասաց ՔԿ նախագահ Հայկ Գրիգորյանը: ՔԿ նախագահը լրագրողներին տեղեկացրեց, որ իր ղեկավարած կառույցի անունից միջազգային գործընկերներին քննչական պահանջ են ուղարկել, նրանք որոշակի գործողություններ պետք է անեն, որոնց վերլուծման արդյունքում հնարավոր կլինի վերջնական գնահատականներ տալ:
Արդարադատության նախարար Ռուստամ Բադասյանն այսօր լրագրողներին վստահեցրեց, որ կատարել է բոլոր գործողությունները, որպեսզի հնարավոր դառնա վեթինգի գործընթացը: Ըստ Բադասյանի՝ 2019 թվականի հունիսին պաշտոնը ստանձնելուց հետո բավարար քայլեր են իրականացրել՝ փոփոխություններ են կատարել Դատական օրենսգրքում, զուգահեռ սկսել են Սահմանադրական բարեփոխումների գործընթացը, բազմաթիվ ենթաօրենսդրական ակտեր են մշակում ԲԴԽ-ի հետ, որպեսզի վեթինգի գործընթացը հնարավոր լինի:
«Այն եռանդով, որով լծվեցին իրանք «Բարգավաճ Հայաստանի» դեմ կռիվ տալով, պարոն Ծառուկյանի դեմ կռիվ տալով, թող այդ նույն եռանդով լծվեն սոցիալ-տնտեսական իրավիճակը դզելով, խայտառակ էդ գործազրկությունը ինչ-որ մի ձև կանգնացնելու: Ի վերջո, կորոնավիրուսից մարդիկ են մահանում, ինչո՞վ են զբաղված»,- ԱԺ-ում ճեպազրույցի ժամանակ ասաց «Բարգավաճ Հայաստան» խմբակցության պատգամավոր Արման Աբովյանը՝ անդրադառնալով խմբակցության ղեկավար Գագիկ Ծառուկյանի՝ քաղաքական ուժերին ուղղված համախմբման կոչի առնչությամբ իշխանության ներկայացուցիչների հայտարարություններին ու խորհրդային տարիներին Ծառուկյանի դեմ հարուցված քրեական գործի մասին իշխանական պատգամավորների հիշեցումներին և կրկին օրակարգ բերելուն։ Պատգամավորը, ի դեպ, ասաց, որ նշված գործով դատարանն արդարացրել է Գագիկ Ծառուկյանին:
ՀՀ արդարադատության նախարարության Քրեակատարողական ծառայությունը միջնորդություն է ներկայացրել Վարչական դատարան՝ ՀՀ երկրորդ նախագահ Ռոբերտ Քոչարյանի՝ մինչև Հայաստանում հայտարարված արտակարգ դրության ավարտը, «Իզմիրլյան» ԲԿ-ում մնալու մասին որոշումը վերացնելու վերաբերյալ:
«Սա միգուցե իրենց շոուի տարրերից մեկն էր, իրենց իրավունքները, նույնիսկ ապօրինի, մարդկանց պարտադրելու տարրերից էր: Վստահ չեմ՝ ինքը տեղյա՞կ է, թե՞ տեղյակ չէ: Ես չէ՞ որ իրենց հորդորում էի, խնդրում էի, ասում էի՝ ցույց տվեք պարետի որոշումը, տուգանեք Ձեր 10.000 դրամը և գնացեք: Բայց մի քանի անգամ խնդրել-պահանջելուց հետո որևէ բան ցույց չտվեցին»:
Այսօր ՀՀ ՊՆ ԶՈՒ Գլխավոր շտաբի պետի պաշտոնում նշանակված գեներալ-լեյտենանտ Օնիկ Գասպարյանը, որը 1993 թվականից ծառայություն է իրականացրել ՊՆ-ում, իսկ 2008 թվականի մարտի իրադարձությունների ժամանակ զբաղեցրել է ՀՀ ՊՆ 4-րդ բանակային կորպուսի շտաբի պետ-հրամանատարի տեղակալի պաշտոնը, Մարտի 1-ի գործով և դրանից անջատված ու այժմ դատարանում քննվող Սահմանադրական կարգի ենթադրյալ տապալման գործով ցուցմունք տված անձանցից մեկն է:
Երևանի ընդհանուր իրավասության Շենգավիթի վարչական շրջանի դատարանը դատավոր Դավիթ Գրիգորյանի նկատմամբ արդարացման վճիռ կայացրեց: 168.am-ի հետ զրույցում Դավիթ Գրիգորյանի փաստաբան Գեորգի Մելիքյանը հայտնեց, սակայն, որ դատական ակտին դեռևս չեն ծանոթացել:
Երբ երեկ ողջ համացանցը քննարկում էր «Իրազեկ քաղաքացիների միավորում» ՀԿ նախագահ Դանիել Իոաննիսյանի և ՀՀ ոստիկանության լրատվական ծառայության նախկին պետ, գնդապետ Սայաթ Շիրինյանի միջև տեղի ունեցած միջադեպը, Իոաննիսյանը գրառում կատարեց, թե Սայաթ Շիրինյանի նկատմամբ կազմվել է վարչական իրավախախտման արձանագրություն, ենթադրվում էր՝ դիմակ չկրելու համար:
«Համարյա ամեն օր 500, 600 մարդ ելումուտ ունի Արցախ Հայաստանից, և եթե Հայաստանի վիճակագրական թվերին նայենք և հավանականությունների տեսությանը, մենք ամեն օր հաստատ Արցախ թույլատրում ենք մուտք գործել նաև այնպիսի քաղաքացիների, որոնք վարակակիր են, որոնք հավանական աղբյուր կարող են հանդիսանալ տարածման, իսկ այդ ամենը վերահսկել շատ դժվար է»,- այսօր առավոտյան հայտնեց Արցախի Հանրապետության նախագահ Արայիկ Հարությունյանը:
Ատամնաբուժության մեջ վերջին տարիներին բավական մեծ տարածում է գտել մետաղակերամիկան, որը բաղկացած է միմյանց սերտաճած կերամիկական և մետաղական մասնիկներից և համարվում է ատամների լավագույն փոխարինիչներից մեկը: Մետաղակերամիկայում օգտագործվող մետաղական մասնիկները կամ համաձուլվածքները, օրինակ, Եվրոպայում, ԱՄՆ-ում, Ռուսաստանում, կարող են օգտագործել միայն այն դեպքում, երբ համապատասխանում են որոշակի ստանդարտների: Եվրոպայում այդ ստանդարտը ISO 22764:2006-ն, ԱՄՆ-ում՝ FDA-ը, ՌԴ-ում՝ ГОСТ Р ИСО 22674-ը:
«Որպես կանոն՝ վարակներից հետո ձևավորվում է իմունային հիշողություն տվյալ վարակի նկատմամբ, ինչը թույլ է տալիս պաշտպանվել, կապ չունի՝ ա՞յս վիրուսն է, թե՞ ուրիշ վիրուս: Կոնկրետ կորոնավիրուսի պարագայում արդեն ինչ-որ նախնական աշխատանքներ կան, որոնք ցույց են տալիս, որ, այո՛, իմունային հիշողություն, իմունիտետ կոչվածը ձևավորում է: Բայց որքան երկար կարող է տևել, դեռևս հետազոտության առարկա է: Որովհետև այդ վիրուսով մարդիկ հետաքրքրված են, հետազոտում են վերջին 4-5 ամիսները, բայց դա քիչ է հստակ պատասխան ունենալու համար՝ արդյո՞ք իմունիտետը երկարատև կլինի, կարճատև կլինի:
Այսօր 168.am-ի խմբագրություն ահազանգ ստացանք Գայի պողոտայի 12/1 հասցեում գտնվող «ՊԱԼԱՍ» առևտրի կենտրոնի վաճառողներից, որոնք հայտնեցին, որ բողոքի ակցիա են իրականացնում առևտրի կենտրոնի շենքի դիմաց: Վաճառողները մեզ փոխանցեցին, որ խնդրում են կենտրոնի տնօրենից՝ հաշվի առնելով համավարակով պայմանավորված առևտրի աննախադեպ անկումը, ողջամիտ սահմաններում զեղչեր կատարել տարածքի համար վարձակալության հարցում։ «ՊԱԼԱՍ» առևտրի կենտրոնում առավելապես հագուստի մանրածախ առևտրի տաղավարներ են, որտեղ, ինչպես վստահեցնում էին վաճառողները, այսօր երկրում ստեղծված իրավիճակում գրեթե առևտուր չեն անում, իսկ կենտրոնի տնօրենը ոչ միայն զիջումների չի գնում, այլև պահանջում է ամբողջ ծավալով վճարել վարձավճարները, իսկ փոքր-ինչ ուշացման դեպքերում՝ հանձնարարում է անվտանգության աշխատակիցներին փակել տաղավարներն ու վարձավճարներն ուշացրած վաճառողներին էլ արգելել առևտուր անել։
ԱԱԾ նախկին տնօրեն, «Հայրենիք» կուսակցության նախագահ Արթուր Վանեցյանի քաղաքացիական հայցն ընդդեմ ՀՀ վարչապետ Նիկոլ Փաշինյանի և նրա մամուլի խոսնակ Մանե Գևորգյանի երկու օր առաջ մուտք է արվել դատարան և մակագրվել է Երևան քաղաքի Քանաքեռ-Զեյթուն վարչական շրջանների ընդհանուր իրավասության դատարանի դատավոր Լիլիթ Սարգսյանին:
Խնդրին արդեն անդրադարձել են ՀՀ մարդու իրավունքների պաշտպանը, իրավապաշտպաններ և փաստաբաններ՝ շեշտելով, որ խախտվել է մարդու անձնական տվյալների պաշտպանության իրավունքը: 168.am-ի հետ զրույցում ԻԱԿ նախագահ Շուշան Դոյդոյանն իհարկե կողմ է, որ պարետի սահմանած կարգին չենթարկվելու մասին պետք է խոսել, պետք է ի ցույց դնել, որ կա այս արատավոր երևույթը, բայց դա պետք է անել՝ առանց մարդկանց թիրախավորելու և անձնավորելու:
«Հիմա, փաստորեն, ասֆալտին են փռվում «հպարտ քաղաքացիները»: Ես այնպիսի պատկերացում ունեմ, որ Նիկոլ Փաշինյանի համար, նրա մտածողությամբ՝ Հայաստանի բոլոր քաղաքացիները պետք է լինեն իմքայլականներ, որոնք հլու-հնազանդ նրան ենթարկվում են և քվեարկում են նրա ցուցումով և ծափահարում են նրա հայհոյանքներին: Նա ցանկանում է, որ Հայաստանի բոլոր քաղաքացիները լինեն այդպիսին՝ իրեն հլու-հնազանդ, հպատակ:
Այդ հարցերի վերաբերյալ կառավարությանը հղած պաշտոնական հարցումներն էլ, կարելի է ասել՝ մնում են անպատասխան:
Արդեն չորս օր վարչապետ Նիկոլ Փաշինյանը ֆեյսբուքյան իր էջում տեղադրում է տարբեր քաղաքացիների լուսանկարներ, նաև տեսանյութեր, որոնցում երևում է, որ քաղաքացիները ինչ-ինչ ձևով չեն պահպանել կորոնավիրուսով պայմանավորված՝ պարետի որոշմամբ սահմանված կանոնները: Նկարների ու տեսանյութերի մեծ մասից կարելի էր հասկանալ, որ քաղաքացիներից շատերը տեղյակ չեն, որ իրենց լուսանկարում կամ տեսանկարահանում են: Վարչապետն անգամ հունիսի 2-ին հորդորել էլ բոլորին տեսանկարահանել ու լուսանկարահանել «հակահամաճարակային կանոնների խախտման աղաղակող դեպքերը», ուղարկել իր ֆեյսբուքյան էջին՝ նշելով «խախտման վայրը, ժամկետը, դրա հետ առնչություն ունեցող ֆիզիկական և իրավաբանական անձանց», ինքն էլ խոստացել էր հրապարակել դրանք:
«Երկու ծայրահեղությունները՝ թե՛ հիստերիան, որը բարձրացված է, և թե՛ ցինիկաբար ժխտելը, որ այդ հիվանդներն ուղղակի գոյություն չունեն, և մեր երկրում արդեն կան ողբերգական դեպքեր, կարծում եմ, որ ընդունելի չեն»,- կորոնավիրուսի հետ կապված միֆերի մասին ԵՊԲՀ-ում կազմակերպված քննարկման ավարտին ասաց ԵՊԲՀ ռեկտոր Արմեն Մուրադյանը՝ նշելով, որ պետք է կարողանանք ամբողջ հարցը մասնագիտական դաշտում քննարկել:
Կորոնավիրուսային հիվանդության տարածմանը զուգահեռ՝ սոցցանցերում ու լրատվական կայքերում շատերը սկսեցին խոսել իմունիտետը բարձրացնելուն ուղղված միջոցների մասին: Լիմոնից ու իմբիրից՝ մինչև իմունիտետը բարձրացնող հեղուկներ էին խորհուրդ տալիս օգտագործել մարդկանց՝ կորոնավիրուսից խուսափելու համար: Թեմային, թե ինչքանո՞վ են այդ մթերքները, առավել ևս՝ առաջարկվող դեղերը, օգնում վիրուսով չվարակվելու կամ հաղթահարելու հարցում, այսօր անդրադարձան նաև ԵՊԲՀ դասախոսներն ու մասնագետները:
Երեկ, երբ առողջապահության նախարար Արսեն Թորոսյանը հայտնեց, որ 4 տարեկան երեխայի մոտ, որն ունեցել է կորոնավիրուսային հիվանդություն, արձանագրվել է Կավասակիի սինդրոմ, շատերը սկսեցին այդ սինդրոմի ու դրա և կորոնավիրուսի միջև կապի մասին խոսել:
«Եթե այդ տրամաբանությամբ մտածենք, էդ դեպքում թող ոչ ոք չպաշտպանվի հիվանդությունից, ձեռք կբերենք կոլեկտիվ իմունիտետ, բայց էդ դեպքում կունենանք մոտավորապես մեկ շաբաթ հետո հազարից ավելի թոքաբորբով պացիենտների դիմելիություն հիվանդանոցներ՝ առաջնային օղակի բժիշկներին: Դա ճիշտ բան չի»:
Առողջապահության նախարարության ներկայացրած վերջին տվյալների համաձայն՝ Հայաստանում ընդհանուր առմամբ գրանցվել է կորոնավիրուսից 176 մահվան դեպք: Ըստ ԱՆ-ի՝ այս ընթացքում գրանցվել է կորոնավիրուսով վարակված պացիենտների՝ այլ հիվանդություններից մահվան 68 դեպք:
Կառավարության այսօրվա նիստում հաստատվեց Հայաստանի Հանրապետության և Արժույթի միջազգային հիմնադրամի միջև կնքված վարկային համաձայնագրի նախագիծը, որով նախատեսվում է հիմնադրամից մոտ 315 միլիոն դոլարին համարժեք փոխառու միջոց ստանալ՝ որպես աջակցության վարկ:
Կառավարության նիստում այսօր հաստատվեց հանրային ծառայողներին բնակարանով ապահովելու նպատակով Երևան քաղաքի Ադոնցի 19/8 հասցեում կառուցվող բազմաբնակարան շենքի բնակարանների և ավտոկայանատեղերի վաճառքի կարգը:
Կառավարության այսօրվա նիստում կորոնավիրուսի սոցիալական հետևանքների չեզոքացման 8-րդ ծրագրի շահառուների ցանկը մի շարք ոլորտներում ընդլայնելու մասին որոշում կայացվեց:
Կառավարության նիստի մեկնարկին առողջապահության նախարար Արսեն Թորոսյանն անդրադառնալով վերջին օրվա կորոնավիրուսի վարակակիրների թվին՝ տեղեկացրեց, որ երեկվա դրությամբ կրկին գրանցվել է մինչ օրս արձանագրված ամենամեծ թիվը՝ 697 նոր դեպք, ինչի հետևանքով ընդհանուր դեպքերի թիվը հատել է 11 հազարի շեմը և դարձել է 11.221:
Մոտ մեկ ամիս առաջ՝ մայիսի 8-ին, Հայաստանի Ազգային գրադարանի թվային արխիվի հրդեհից և գրեթե մեկ ամիս Ազգային գրադարանի էլեկտրոնային շտեմարանների աշխատանքի դադարից հետո, նախորդ երկու օրերին փորձարկվել են գրադարանի էլեկտրոնային շտեմարանները: Արդյունքում՝ արդեն այսօրվանից գրադարանի թվային շտեմարանները կրկին հասանելի են՝ 24-ժամյա ռեժիմով: Այսօր տեղեկացրեց Հայաստանի Ազգային գրադարանի տնօրենի պաշտոնակատար Հրաչ Սարիբեկյանը:
ՀՀ վարչապետ Նիկոլ Փաշինյանի տիկին Աննա Հակոբյանը և նրա եղբայր՝ ԱԺ «Իմ քայլը» խմբակցության պատգամավոր Հրաչյա Հակոբյանը, քաղաքացիական հայց են ներկայացրել ընդդեմ Սուրբ Աթոռում ՀՀ նախկին դեսպան Միքայել Մինասյանի: Հայցվորները պահանջում են հրապարակայնորեն ներողություն խնդրել, հրապարակայնորեն հերքել զրպարտություն հանդիսացող փաստացի տվյալները և փոխհատուցել պատվին, արժանապատվությանը և գործարար համբավին պատճառած վնասը:
