Դամասկոսը կշռադատում է զորք ուղարկել Եմեն՝ հուսիների դեմ
Axios-ը, վկայակոչելով ԱՄՆ երեք պաշտոնյայի, հաղորդում է, որ Սաուդյան Արաբիան և Սիրիան քննարկում են սիրիական զորքեր Եմեն ուղարկելու հնարավորությունը՝ Իրանի աջակցությունը վայելող հուսիների դեմ սաուդական աջակցությամբ ընթացող հակահարձակմանը միանալու համար։ Բանակցություններին ծանոթ աղբյուրի խոսքով՝ խոսքը կարող է գնալ 10–20 հազար զինծառայողի մասին, իսկ քննարկվող ստորաբաժանումներից են 90-րդ և 84-րդ դիվիզիաները։ Ըստ ամերիկացի պաշտոնյաների՝ ԱՄՆ-ը սկզբունքորեն դեմ չէ, երկու երկրներն էլ խորհրդակցել են Վաշինգտոնի հետ, իսկ CENTCOM-ի հետ քննարկվել է տեղակայման հարցը. Սիրիայի նախագահ Ահմեդ ալ-Շարաան դեռ վերջնական որոշում չի կայացրել։ Սպիտակ տունն ու CENTCOM-ը հրաժարվել են մեկնաբանել։
Reuters-ը, վկայակոչելով ամերիկացի պաշտոնյայի և սիրիացի զինվորական պաշտոնյայի, հաղորդում է, որ Դամասկոսը «ուշադիր քննարկում է» երկու տարբերակ՝ թագավորությանը պաշտպանական աջակցություն կամ ուժերի տեղակայում հուսիների դեմ մարտերի համար։ Սիրիացի դիվանագետի խոսքով՝ Սիրիան Սաուդյան Արաբիայի կողքին է հուսիների հարձակումների հարցում, սակայն նրա հիմնական ուշադրությունը ներքին վերականգնումն է, և ցանկացած համագործակցություն կլինի բացառապես պաշտոնական ուղիներով։ Հարցը, ըստ աղբյուրների, քննարկվել է այս շաբաթ Ռիադում ալ-Շարաայի և թագաժառանգ Մուհամմադ բին Սալմանի հանդիպմանը։
ՓԱԿԱԳԾՈՒՄ. Սա պրոքսի հակամարտությունների դասական տրամաբանություն է, որտեղ առաջատար տերությունը ուժերի հավասարակշռությունը վերականգնում է դաշնակիցների ռեսուրսներով՝ խուսափելով սեփական անմիջական ներգրավումից։
▪️ Բեռի փոխանցում – Ըստ ամերիկացի պաշտոնյաների՝ սիրիական տեղակայումը կուժեղացնի սաուդական գործողությունը առանց ԱՄՆ խոր ներգրավման. Իրանի հետ առճակատման պայմաններում Վաշինգտոնը հուսիական ճակատի ծախսերը տեղափոխում է տարածաշրջանային գործընկերների վրա։
▪️ Հովանավորչական հավասարակշռում – Դամասկոսի նոր իշխանությունների համար Ռիադի աջակցությունը միջազգային լեգիտիմության և ֆինանսական ռեսուրսների աղբյուր է, և զորքի տրամադրումը, հավանաբար, այդ աջակցության դիմաց փոխհատուցում է, որը, ըստ ամերիկացի պաշտոնյայի, կարող է մեծացնել սաուդական ֆինանսական օգնությունը։
▪️ Իրանական ազդեցության գոտու նեղացում – Եմենում սիրիական ներգրավումը կարող է ամրապնդել Դամասկոսի դիրքափոխությունը դեպի սաուդա-ամերիկյան ուղեծիր, ինչը սահմանափակում է Թեհրանի ռազմավարական խորությունը տարածաշրջանում։
▪️ Կոնֆլիկտի աղանդավորական վերափոխում – Ինչպես նշում են նաև ամերիկացի պաշտոնյաները, սունի իսլամիստ մարտիկների ներգրավումը զեյդի շիա հուսիների դեմ, հավանաբար, հակամարտությանը կտա կրոնական չափում՝ բարդացնելով հետագա կարգավորումը։
▪️ Հակազդեցության ճակատների բազմացում – Իրանը, «Հեզբոլլահը» և իրաքյան խմբավորումները կարող են սիրիական ներգրավումը դիտել որպես թշնամական քայլ, ինչը, հավանաբար, կմեծացնի Սիրիայի ներքին խոցելիությունը, քանի որ նրա բանակը դեռ ձևավորման փուլում է։ }
Աղբյուրը՝ «Փակագիծ Վերլուծական Հարթակ»
