«Սևանա լճում ջրի մակարդակը չպետք է նվազեր 5 սանտիմետրով, քանի որ նախորդ տարի 40 մլն խմ ջուր են բաց թողել». Կարինե Դանիելյան
«Սևանա լճում ջրի մակարդակը 5 սանտիմետրով չպետք է իջներ, քանի որ նախորդ տարի 40 մլն խմ ջուր են բաց թողել»,- 168.am-ի հետ զրույցում նշեց «Հանուն կայուն մարդկային զարգացման» ասոցիացիայի նախագահ, բնապահպան Կարինե Դանիելյանը՝ անդրադառնալով պաշտոնական վիճակագրությանը, ըստ որի՝ նախորդ տարվա համեմատ՝ այս տարի Սևանա լճում ջրի մակարդակը նվազել է 5 սանտիմետրով։
Նրա խոսքով՝ Սևանա լճի վերաբերյալ ընդունված օրենքն այդքան էլ վատը չէ, և միշտ էլ հնարավորություններ կան օրենքն այս կամ այն ձևով օգտագործելու, որից լիճը չի տուժի։
«Օրինակ՝ 2017 թվականին, երբ 100 մլն խմ ջուր բաց թողեցին, այն ճակատագրական էր լճի համար, սա՝ այն դեպքում, երբ օրենքը հստակ նշում էր, որ Սևանում բացասական բալանս չպետք է լինի, այսինքն՝ չպետք է ունենանք մինուս։ Այդ 100 մլն-ի պատճառով բացասական բալանս ունեցանք 2017-18 թվականներին։ Կարծում եմ՝ լճի ծաղկումը կապված էր հենց այդ լրացուցիչ 100 մլն ջրառի հետ, որի հետևանքով լճում ջրի մակարդակն անմիջապես իջավ»,- շեշտեց Կ. Դանիելյանը։
Ըստ նրա՝ Սևանից հավելյալ ջրառ են իրականացնում ոռոգման նպատակով, մինչդեռ ոռոգման ոլորտի վիճակն աղետալի է, այստեղ կորուստներն ավելի շատ են, քան ջուրը, որը վերցնում են Սևանից։
«Որքանով հասկացա՝ այստեղ կան կոռուպցիոն ռիսկեր, այսինքն՝ ինչ-որ օլիգարխներ ու պաշտոնյաներ մեծ քանակությամբ ջուր են վերցրել, ինչը որևէ տեղ չի երևացել, ու փաստորեն ջրի կորուստ է եղել, քանի որ դրա համար չեն վճարել։ Սրան զուգահեռ՝ համակարգի վիճակն է ողբալի, մի քանի տեղ ցույց տվեցին, որ ջուրը հենց այնպես հոսում է։
Այս ամենը շատ զարմանալի է, որովհետև ժամանակին բավականին մեծ գումարներ են ծախսել, որպեսզի համակարգը կարգի բերվեր։ Եղել է մեծ գայթակղություն՝ շատ ջուր բաց թողնել և էներգիա ստանալ, ճիշտ է՝ ստացել են, բայց մարդկանց չեն տվել, վաճառել են, և այլն»,- ընդգծեց Կարինե Դանիելյանը։
Անդրադառնալով Սևանա լճի ջրի որակին, Կարինե Դանիելյանը նշեց, որ ուսումնասիրություններ են կատարել, որի արդյունքների համաձայն՝ մինչև 2012-13 թվականները ջրի որակը բարելավվել է, ինչն արդյունք է եղել ջրի մակարդակի բարձրացման։
«Կարծես թե Սևան լճի դեղը հենց ջրի մակարդակի բարձրացումն է, քանի որ այն վերականգնում է իր բնական պայմանները, ինքնամաքրման հզորությունը։ Նույնիսկ այդքան հոսքաջրեր ու աղբ ընդունելու պարագայում ջրի որակը սկսել էր լավանալ։ Վերջին տարիներին, երբ սկսել ենք անընդհատ լրացուցիչ ջուր բաց թողնել, ջրի որակը սկսել է բացասական միտումներ ունենալ»,- եզրափակեց բնապահպանը։
Զվարթ Խաչատրյան
