Աղանդեր և խմիչքներ. Ինչպես մատուցել

Աղանդերի համար սովորաբար հատուկ դանակ, պատառաքաղ և գդալ է դրվում: Պատառաքաղով (այն սովորաբար երկու ատամ է ունենում) ուտում են տորթը, գդալով՝ պուդինգը, պաղպաղակը, իսկ դանակն ու պատառաքաղն օգտագործվում են մրգերի համար: Խնձորը, տանձը կիսում են չորս մասի և հանում կորիզները: Նարինջը մաքրում են դանակի օգնությամբ, նարնջի շերտիկները կարելի է ուտել ձեռքով:

Թուրինջը (գրեյպֆրուտ) ընդունված է մատուցել արդեն նախօրոք երկու կես արած: Ցանկալի է, որ դրա հետ սուր եզրերով գդալ մատուցեն, քանի որ սովորական փոքր գդալով դժվար է թուրինջի միջուկը հանել: Անանասը մատուցվում է արդեն կտրատված: Այն հարկ է ուտել աղանդերի համար նախատեսված պատառաքաղով ու դանակով: Սեխի հետ նույն կերպ պետք է վարվել, սակայն եթե սեխը լցոնված է, պետք է օգտագործել ոչ թե պատառաքաղ, այլ գդալ: Ձմերուկը նույպես կտրատված է մատուցվում և այն հանգիստ կարելի է ուտել դանակ-պատառաքաղի օգնությամբ:

Շերտերի բաժանված կիտրոնը կարելի է գցել թեյի, սուրճի և այնի մեջ, սակայն հիշեցնենք, որ թեյը խմելուց հետո պետք է կիտրոնի շերտիկը թողնել բաժակի մեջ: Խաղողի հատիկները ձեռքով պոկում են և տանում բերանը, իսկ կորիզները զգուշությամբ գդալով հանում են բերանից և դնում հատուկ փոքրիկ ափսեի մեջ: Թեև նախընտրելի է սեղանին մատուցել առանց կորիզի խաղողի տեսակները:

Կորիզով մրգերը` բալը, կեռասը նույնպես հարկ է ուտել` գդալի օգնությամբ կորիզները բերանից զգուշությամբ հանելով և դնելով հատուկ դրա համար նախատեսված փոքրիկ ափսեի մեջ: Տորթն ուտում են աղանդերի համար նախատեսված պատառաքաղով, թեև Ռուսաստանում ընդունված է տորթն ուտել գդալով: Մյուս թխվածքները կարելի է ուտել ձեռքով, բայց հետևեք, որ փշրանքները չմնան հագուստին կամ շրթունքներին: Գործնական ընդունելության ժամանակ մատուցվում են նաև զանազան խմիչքներ: Հանքային ջուրը միշտ պետք է գտնվի սեղանին: Հյութերը նույնպես կարող են սեղանին դրված լինել ընդունելության ողջ ընթացքում: Դրանք մատուցվում են բյուրեղապակե գրաֆիններով, որպեսզի երևա, թե ինչի հյութ է:

Ինչ վերաբերում է ոգելից խմիչքներին, ապա դրանց համար տարբեր կանոններ կան: Ուտելուց առաջ ընդունված է հյուրերին ապերատիվ առաջարկել ախորժակը բացելու համար: Դա կարող է լինել կոնյակ, օղի, վիսկի, պորտվեյն, չոր գինիներ եւն: Ապերատիվը մատուցվում է սկուտեղի վրա շարված մեծ կամ փոքր բաժակներով` կախված խմիչքից: Շամպայնը կամ փրփրուն գինիները մատուցվում են ցանկացած ճաշատեսակի հետ` բացի ապուրներից: Սառը խորտիկների, օրինակ` ապխտած ձկան, սալաթների, պանրի հետ, ընդունված է մատուցել սեղանի սպիտակ գինիներ:

Պաշտետի, ապխտած մսի հետ մատուցվում է սեղանի կարմիր գինի: Ապուրից հետո մատուցվող ձկնեղենի հետ ընդունված է մատուցել սպիտակ թունդ գինիներ` խերես, մադերա, սպիտակ պորտվեյն, կամ էլ սեղանի սպիտակ գինիներ: Ձկնեղենից հետո մատուցվող մսեղեն ճաշատեսակների` տավարի մսի, որսամսի, սագի հետ մատուցում են կարմիր գինիներ, իսկ սպիտակ մսի, օրինակ` հնդուհավի հետ` սպիտակ գինիներ: Աղանդերի հետ սովորաբար մատուցվում են շամպայն կամ աղանդերային գինիներ` մուսկատ, կագոր և այլն:

Սուրճի հետ մատուցվում է փոքրիկ բաժակների մեջ լցված կոնյակ և լիկյոր: Դրանք պետք է խմել փոքր կումերով: Հյութերն ու հանքային ջուրը պետք է լինեն սառեցված, շամպայնը` շատ սառը (6-8 աստիճան), լիկյորն ու կոնյակը` սենյակային ջերմաստիճանի, օղին, սպիտակ գինիները, կիսաքաղցր գինիները` 8-10 աստիճան, իսկ վիսկին հարկ է մատուցել սառույցով:

Նյութը հրապարակման պատրաստեց 168.am-ը