Շանթ Հարությունյանի հետ կալանավորված Միսակ Առաքելյանը քիչ առաջ ազատ է արձակվել
2013թ. նոյեմբերի 5-ին Շանթ Հարությունյանի հետ կալանավորված Միսակ Առաքելյանը քիչ առաջ ազատ է արձակվել. նրա նկատմամբ որպես խափանման միջոց ընտրված կալանավորումը փոխվել է խափանման մեկ այլ միջոցով՝ ստորագրություն չհեռանալու մասին: Այս մասին 168.am-ի հետ զրույցում ասաց Միսակ Առաքելյանի պաշտպան Հովհաննես Քոչարյանը:
Նրա խոսքով՝ Միսակ Առաքելյանն այժմ էլ մեղադրյալի կարգավիճակում է, սակայն փոխվել է նրան առաջադրված մեղադրանքը: Իշխանության ներկայացուցչի նկատմամբ բռնություն գործադրելու մեղադրանքը փոխվել է. այժմ նրան մեղադրում են խուլիգանության մեջ:
Պաշտպանն ասաց, որ նոր առաջադրված մեղադրանքի շուրջ կարծիք կհայտնեն դատարանում: Նա նաև համոզմունք հայտնեց, որ քրեական գործի նախաքննությունը «շատ շուտով» կավարտվի:
