Մթերքներ, որոնք կօգնեն իջեցնել միզաթթվի մակարդակը

Նման խնդիրների դեպքում մեր սննդակարգի մեջ պետք է ներառենք այնպիսի մթերքներ, որոնք օգնում են իջեցնել միզաթթվի մակարդակը: Բժշկի նշանակումների հետ միասին, պետք է ուշադրություն դարձնեք նաև սննդակարգին:

Մենք ոչ միշտ ենք նախապատվություն տալիս առողջ և սննդարար ուտելիքներին: Հաճախ այնպիսի կյանք ենք վարում, որ հազիվ թե այն առողջ անվանենք, ինչպես նաև՝ ուշադրություն չենք դարձնում մեր ուտելիքներին: Այս սովորությունը, վաղ թե ուշ, անդրադառնում է մեր առողջության վրա, որի արդյունքում բարձրանում է միզաթթվի մակարդակը: Պետք է հաշվի առնել, որ գոյություն ունեն այնպիսի մթերքներ, որոնք մեր օրգանիզմում առաջացնում են պուրիններ, դրանք են՝ անչոուսները, երշիկները, կարմիր միսը, գազավորված ըմպելիքներն ու կիսաֆաբրիկատ ուտելիքները:

Պուրինների բազմացման դեպքում առաջանում է միզաթթուն, որը հայտնվում է արյան մեջ և կուտակվում հոդերում: Արդյունքում՝ տեղի են ունենում բորբոքումներ, և մարդը սաստիկ ցավեր է զգում:

Առավել հաճախ բորբոքվում են ոտքի և ձեռքի բթամատները, ինչպես նաև՝ ծնկահոդերը:

Ի՞նչ անել այս դեպքում: Շատ կարևոր է հասկանալ, որ առողջական յուրաքանչյուր խնդիր ի հայտ է գալիս սխալ սնվելու արդյունքում: Այնպես որ, մեծ ուշադրություն դարձրեք ձեր սննդակարգին:

Ձեզ ենք ներկայացնում մի քանի մթերքներ, որոնք կարող եք ներառել ձեր սննդակարգում:

Սոխ– Սոխի օգտակար հատկանիշները դարերով հայտնի են, այդ իսկ պատճառով այս բանջարեղենը հաճախ օգտագործում են տարբեր հիվանդություններ բուժելու համար: Սոխը մեր սննդակարգի անհրաժեշտ մթերքներից մեկն է: Այն կարող է իջեցնել միզաթթվի մակարդակն արյան մեջ: Սոխը նաև օգնում է իջեցնել տրիգլիցերիդների մակարդակն օրգանիզմում: 2 գլուխ սոխը մաքրեք և կտրատեք յուրաքանչյուրը 2 մասի: Տեղադրեք կաթսայի մեջ և եփեք այնքան ժամանակ, մինչև սոխը փափկի: Ստացված ապուրը լցրեք շշի մեջ և ավելացրեք կես կիտրոնի հյութ: Այս ըմպելիքը խմեք օրվա ընթացքում: Ինչպես տեսնում եք՝ բաղադրատոմսը շատ պարզ է:

Դդում– Դդումը համարվում է միզաթթվի մակարդակն իջեցնող լավագույն միջոցներից մեկը: Խթանելով միզարտադրությունը՝ դդումն օրգանիզմից դուրս է բերում միզաթթուն: Դդումն օգնում է ազատվել տոքսիններից և վնասակար տարրերից, որոնք կուտակվում են մարդու օրգանիզմում: Այնպես որ, դդումը պարտադիր պետք է ներառվի ձեր սննդակարգում: Կարող եք դդումը եփել կամ տապակել գազօջախում: Մի մոռացեք նաև դդմի սերմերի մասին, դրանք նույնպես մեծ քանակությամբ սննդարար տարրեր են պարունակում:

Նեխուր (քարավուզ)- Ինչպե՞ս է նեխուրն օգնում օրգանիզմին: Այս համեղ կանաչին կարող է հրաշալի բաղադրիչ դառնալ յուրաքանչյուր ուտելիքի:

Այն օգնում է կարգավորել արյան pH-ը, ինչն էլ թույլ է տալիս ազատվել միզաթթվից: Նեխուրը մաքրում է մեր օրգանիզմը, դուրս է բերում տոքսինները, օգնում է նիհարել:

Գազար– Եթե ցանկանում եք իջեցնել միզաթթվի մակարդակը, ապա պետք է ուշադրություն դարձնեք այս բանջարեղենի վրա: Գազարից կարող եք պատրաստել բազմաթիվ համեղ ուտելիքներ: Այն ալկալիական միջավայր է ստեղծում, ինչն էլ ազատում է մեր օրգանիզմը պուրիններից և միզաթթվի բյուրեղներից, որոնք նստվածք են տալիս հոդերում:

Հիշեք, որ արդյունքի հասնելու համար պետք է սահմանափակեք կարմիր միսը, երշիկեղենը, գարեջուրը, անչոուսները և ծովամթերքները:

Նյութը հրապարակման պատրաստեց Լիլիթ Հարությունյանը