5 տրանսպորտային միջոց խախտել է հակահամաճարակային կանոնները. Էդգար Գալստյան
Վերջին երկու օրերի ընթացքում ընդամենը 5 տրանսպորտային միջոց է հայտնաբերվել, որոնք խախտել են հակահամաճարակային միջոցառումները. Երևանի ավագանու մայիսի 26-ի նիստի ժամանակ, ի պատասխան «Իմ քայլը» խմբակցության անդամ Գրիգոր Երիցյանի հարցին, թե քանի՞ անգամ են ախտահանվում տրանսպորտային միջոցները, և ովքե՞ր են դա վերահսկում, ասաց Քաղաքապետարանի աշխատակազմի Տրանսպորտի վարչության պետի պաշտոնակատար Էդգար Գալստյանը:
«Օրական մեկ անգամ խորքային ախտահանումն իրականացնում է «Ախտահանման կենտրոն» ՓԲԸ-ն, իսկ օրվա ընթացքում ախտահանում իրականացնում են ընկերություններն իրենց հաշվին: Տրանսպորտային միջոցների մուտքի մոտ տեղադրվում է ախտահանող միջոց, ուղևորները և վարորդը պետք է լինեն դիմակով և ձեռնոցներով: Մայիսի 24-ին ընդամենը երկու տրանսպորտային միջոց է Ոստիկանության կողմից հայտնաբերվել, իսկ մայիսի 25-ին երեք ավտոբուս է հայտնաբերվել և տեղափոխվել հատուկ պահպանվող տարածք»,- ասաց նա:
