Բոլոր դեղարտադրող և ներմուծող կազմակերպությունները գործում են օրինական դաշտում. Ս. Զաքարյան
Բոլոր դեղարտադրող և ներմուծող կազմակերպությունները լիցենզավորված են և գործում են օրինական դաշտում, իսկ GMP ստանդարտների լիցենզիան կապված չէ դեղ արտադրելու լիցենզիայի հետ: Նման հայտարարություն այսօր լրագրողների հետ հանդիպմանն արեց ՀՀ դեղարտադրողների և ներմուծողների միության նախագահ Սամվել Զաքարյանը:
Նա տեղեկացրեց, որ GMP սերտիֆիկատներ ստանալու համար շուտով հայտ կներկայացնեն 3 դեղարտադրող կազմակերպություններ` «Լիկվոր», «Արփիմեդ» և «Ֆարմատեք»: Ըստ Զաքարյանի` GMP հարկավոր է նրանց, ովքեր ցանկություն ունեն արտահանելու, ստացման վերջնաժամկետը 2015 թ-ն է: Ներկայումս ՀՀ-ից դեղ արտահանում են 5-6 ընկերություններ:
Անդրադառնալով ՀՀ ԳԱԱ օրգանական և դեղագործական քիմիայի գիտահետազոտական ինստիտուտի տնօրեն Վիգեն Թոփուզյանի հայտարարությանը, որ Հայաստանում դեղարտադրող ընկերություններից որևէ մեկը չունի սեփական դեղ արտադրելու թույլտվություն և չի կարողանում ստանալ GMP լիցենզիա, Ս. Զաքարյանը նշեց, որ ինստիտուտի դեղ արտադրելու լիցենզիայի ժամկետն ավարտվում է 2016 թ., և ինստիտուտի տնօրենը տեղյակ է եղել բոլոր փոփոխություններից:
«Լիկվոր» ընկերության տնօրեն Սերգեյ Մաթևոսյանի խոսքով` GMP ստանդարտներին անցում կատարելու մասին որոշումն ընդունվել է 2010 թ. նոյեմբերին, և բավականին երկար ժամանակ է տրված եղել ընկերություններին: Ըստ Մաթևոսյանի` GMP ստանդարտացման գործընթացը շարունակական գործընթաց է, իսկ ֆինանսական միջոցների սղությունը խնդիր չէ` ՓՄՁ ԶԱԿ-ի ՈՒՎԿ-ն աջակցում է ցանկացած կազմակերպության, որ արդիականացնի իր արտադրությունը:
«Ցանկացած դեղ արտադրող ընկերություն ցանկացած երկրում պարտավոր է աշխատել այս GMP ստանդարտներով, քանի որ գործ ունենք մարդու կյանքի ու առողջության հետ»,- նշեց Ս.Մաթևոսյանը:
