«Ո՞վ կարող է երաշխավորել, որ 2026թ. ՔՊ-ն կոալիցիա չի կազմի Կոմունիստական կուսակցության հետ». Լևոն Նազարյան

ՀՀԿ խորհրդի անդամ Լևոն Նազարյանն այն կարծիքին է, որ Գյումրիի ընտրությունները կմնան ՏԻՄ ընտրություններ, եթե դրան որոշակի գործընթացներ չհաջորդեն:

«Ընտրություններից հետո չտեսանք այնպիսի գործընթացների մեկնարկ, որը հայ ժողովուրդը ցանկանում էր տեսնել: Մի քանի ամիս խոսվում էր, որ Գյումրիի ընտրությունները գուցե դառնան այն հարմար առիթը, որով հնարավոր կլինի ընդվզման մեծ ալիք գեներացնել գործող իշխանության հանդեպ: Ընդդիմության ֆավորիտ թեկնածուն ուներ այդ հնարավորությունը, այս պահին ևս ունի, և հուսով եմ՝ այդ հնարավորությունից կօգտվի: ՔՊ-ի պարտության տրամաբանությունը կարելի է օգտագործել երկրում ընդվզման ալիք բարձրացնելու համար: Դրա համար շատ տարբեր բաներ կարելի էր անել»,- 168TV-ի «Ռեվյու» հաղորդման ընթացքում ասաց նա՝ ընդգծելով՝ չի խոսում 2018-ին Փաշինյանի կատարած քայլերը կրկնօրինակելու մասին, այլ այն մասին, որ գեներացվեր պրոցես:

Նրա դիտարկմամբ՝ Գյումրիի ընտրություններին Կոմունիստական կուսակցության հավաքած ձայների քանակը նա հետևյալ կերպ մեկնաբանեց. «ՔՊ-ն հարում է նեոբոլշևիկյան և կոմունիստական գաղափարախոսության և իրենց քաղաքական ապագան տեսնում այդ ծիրում. Հիմա սյուրռեալիստական հարց՝ իսկ կարո՞ղ է ինչ-որ մեկը երաշխավորել, որ 2026թ. չի լինի սցենար, որտեղ, ենթադրենք, ՔՊ-ն կոալիցիա չի կազմի Կոմունիստական կուսակցության հետ»:

Լևոն Նազարյանը որևէ հուսադրող բան չի սպասում գործող իշխանությունների վարած արտաքին քաղաքականության մեջ, հատկապես, երբ տարածաշրջանն ակնհայտորեն լարված է. «Խաղաղություն ասելով՝ իրենք չեն հասկանում պատերազմի կանխարգելում, այլ հասկանում են կապիտուլյացիա և Հայաստանի սուվերենության զիջում կամ առհասարակ պետականության կազմաքանդում»:

Ինչ վերաբերում է Փաշինյանի հայտարարություններին, թե իրենք միակողմանի զիջումների չեն գնացել, Լևոն Նազարյանը նկատեց՝ գաղտնիք չէ, որ Փաշինյանն ապրում է ծուռ հայելիների թագավորությունում. «Երբ եվրոպական կողմը շատ բարձր մակարդակով ասում է, որ ողջունում են Հայաստանի համարձակ զիջումները, Փաշինյանը թող այդ ժամանակ արձագանքի, ասի՝ զիջում չենք արել, ի՞նչն եք ողջունում: Այն կորուստներն ու տառապանքը, որ Փաշինյանը պատճառել է հայ ժողովրդին, նույնիսկ դա չի ցանկանում զիջում համարել, այդ ամենը նրա համար այն տրամաբանության մեջ է, որ Ադրբեջանի սեփականությունն էր և վերադարձրել է տիրոջը: Դա նշանակում է, որ նա պատրաստվում է նոր զիջումներ անել»:

Մանրամասները՝ 168TV-ի տեսանյութում