Ե՞րբ կգա Նիկոլ Փաշինյանի՝ Սերժ Սարգսյանին ձերբակալելու օպերացիայի ժամանակը

«Այդ աստիճանի մանիպուլյատոր, սուտ խոստումներ տվող, այդ աստիճանի խարիզմատիկ, այդ աստիճանի բոլոր տեսակի գրված և չգրված օրենքները ոտնատակ տվող մենք չէինք ունեցել մինչ այդ: Բայց Փաշինյանի անձն ընդամենը տորթի վրայի «կլուբնիկն» էր, որ ավարտուն տեսքի բերեց իշխանափոխության գործընթացները: Իրականում կային և՛  արտաքին, և՛  ներքին նախադրյալներ, խնդիրներ, զարգացումներ, այդ թվում նաև՝ մեր մեղքերը մեր գործունեության ընթացքում, որոնք որ ստեղծեցին այդ ֆոնը»,- պատասխանելով իշխանափոխության պատճառների մասին Սաթիկ Սեյրանյանի հարցին՝ 168TV«Պրեսսինգ» հաղորդաշարի եթերում ասաց ՀՀԿ փոխնախագահ Արմեն Աշոտյանը:

Հարցին, թե հնարավո՞ր է՝ Նիկոլ Փաշինյանը հավատաց, որ իշխանափոխությունը մոտ է, երբ նախկին վարչապետ Կարեն Կարապետյանն այցելեց նրան ձերբակալման ժամանակ, ՀՀԿ փոխնախագահն ասաց, որ ինքը չի հավատում, որ Կարեն Կարապետյանը մաս է եղել Սերժ Սարգսյանի դեմ ինչ-որ պայմանավորվածությունների:

«Արդեն ռետրոսպեկտիվ պարզ էր, որ, երբ ապրիլի 23-ից հետո, երբ Սերժ Սարգսյանը հրաժարական տվեց, անգամ Կարեն Կարապետյանը չէր կարող պահել անիվը, որովհետև անիվն արդեն շատ էր թափ հավաքել, և Նիկոլ Փաշինյանն այդտեղ արեց ամենամեծ խաբեություններից մեկը, երբ ժողովրդին խաբեց: Շարժումը «Նիկոլ՝ վարչապետ» շարժում չէր, «Մերժիր Սերժին» էր: Նա հետո տրանսֆորմացրեց, հետո մանիպուլյացրեց, հետո հասկացավ, որ հարյուր-հազարավոր միամիտ մարդիկ հավատացին իր բազմաթիվ խոստումներին: Ամեն մի սոցիալական խումբ, ամեն մի ընտանիք այդ խոստումների մեջ հարազատ բան լսեց: Գյուղացիները լսեցին գյուղվարկերը մարելու խոստումը, վարորդները՝ արագաչափերի վերացման, ուսանողները՝ կրթաթոշակների ավելացման, ուսուցիչներն էլ՝ աշխատավարձի բարձրացման խոստում»,- նշեց ԱԺ 6-րդ գումարման Արտաքին հարաբերությունների հանձնաժողովի նախագահը՝ շեշտելով, որ այդ օրերին Փաշինյանն իրեն դրսևորեց՝ որպես դասական պոպուլիստ:

Անդրադառնալով Դավիթ Սանասարյանի դեպքին՝ ՀՀԿ փոխնախագահը նկատեց, որ դա այն ազդեցիկ պաշտոնն է, որի համար, նշանակվողի փոխարեն՝ վարչապետն ուղիղ քաղաքական պատասխանատվություն է կրում:

«Դավիթ Սանասարյանն ասում է, որ իրեն հետապնդում են: Եթե Սանասարյանը ճիշտ է, և ապացուցվի, որ իր հանդեպ պրոցեսը հանիրավի է, ստացվում է, որ անգամ Դավիթ Սանասարյանը, որ Նիկոլի դրած մարդն էր, աջ ձեռքը, դաշնակիցը, այսօր ապահովագրված չէ քաղաքական հետապնդումներից: Այսինքն՝ եթե Դավիթն ապահովագրված չէ, բա Քոչարյանը, Սերժ Սարգսյանը, ես, Արսեն Բաբայանը, Հրայր Թովմասյանն ինչո՞վ ենք ապահովագրված»,- ասաց Արմեն Աշոտյանը՝ հավելելով, որ, եթե Դավիթ Սանասարյանը սխալ է, և այդ գործը գոյություն ունի, մենք առերեսվում ենք համակարգային, վերևից եկող կոռուպցիոն հսկայական խոցի հետ:

«Դավիթի գործի երկու ելքերն էլ դիագնոզ են Նիկոլ Փաշինյանի իշխանության համար»,- եզրահանգեց ՀՀԿ փոխնախագահը:

Խոսելով արտահերթ խորհրդարանական ընտրությունների ժամանակ վարչական ռեսուրսի տոտալ կիրառման մասին, որը ներառում էր նաև ուժայիններին, Արմեն Աշոտյանը ասաց, որ թե պաշտոնավարման ժամանակ, թե հատկապես դրանից հետո ինքը հարց է ուղղում ԱԱԾ նախկին տնօրեն Արթուր Վանեցյանին:

«Պարոն Վանեցյան, ասեք՝ ի՞նչ եք արել Դուք «ալամ աշխարհի» ամենաժողովրդավարական ընտրությունների ժամանակ: Ես չէ՞ որ գիտեմ՝ ինչեր են կատարվել: Ես էլ եմ եղել թեկնածու, ես էլ եմ առերեսվել իմ թիմակիցների հետապնդման հետ: Մելիք-Ադամյան-2 հասցեում՝ կենտրոնական շտաբի դիմաց, 24 ժամ արտաքին «ռազվեդկա» էր դրված, որ տեսնեն՝ ով էր գալիս, ով էր գնում, որ հաջորդ օրը զանգեն-ասեն՝ գործից կհանենք»,- հիշեցրեց ՀՀԿ փոխնախագահը:

Անդրադարձ կատարվեց նաև նախօրեի՝ Սերժ Սարգսյանի հայտարարությանը՝ նկատելով, որ Սերժ Սարգսյանը մասամբ բացեց քարտերը: Բայց կարևոր էր այն ուղերձը, թե՝ լավ, ինձ էլ նստացրեցիք, հետո՞ ինչով եք բացատրելու ձեր ձախողումները:

«Սերժ Սարգսյանի ձերբակալելու օպերացիան Նիկոլ Փաշինյանը սկզբից պլանավորել էր Ամուլսարի հետ կապված, որպեսզի շեղի մարդկանց ուշադրությունը:: Չաշխատեց: Մենք կանխեցինք: Մենք բացեցինք քարտերը: Սերժ Սարգսյանին ձերբակալելու հարցը կա Նիկոլ Փաշինյանի օրակարգում, բայց դա իր վերջին «ջոկերն» է: Լավ, Սերժ Սարգսյանին էլ բռնեց, նստացրեց, կյանքը չլավացավ, անվտանգության մարտահրավերներն էլ խորացան…»,- ասաց Արմեն Աշոտյանը:

Հարցին, թե միգուցե այդ ժամանակ Լևոն Տեր-Պետրոսյանի՞ն կալանավորի, ՀՀԿ փոխնախագահը նշեց, որ ինքը բացառում է, որ Նիկոլ Փաշինյանը Լևոն Տեր-Պետրոսյանին կկալանավորի:

«Ապրիլյան պատերազմն ուսումնասիրող՝ Ազգային ժողովում ստեղծված հանձնաժողովն այն ժամանակ ստեղծվեց՝ որպես դամոկլյան սուր Սերժ Սարգսյանի գլխին, որ տեսնեն՝ եթե ուրիշ գործերով ոչինչ չի ստացվում պայթեցնել, սարքել, սա պայթեցնեն: Այս 4.5 ամիսն այդ հանձնաժողովի նախագահից սկսած, վարչապետով վերջացրած՝ վարկաբեկվեցին իրենք: Տեսան, որ չունեն այն սենսացիոն լուրը, որով Սերժին կարող են դեմ տալ: Տեսան, որ հանրությանը չեն կարող «ֆռռացնել»: Ու ասել, որ Ապրիլյան պատերազմում մենք պարտվել ենք… Նրանք ապտակ ստացան հասարակությունից ու նաև ապրիլյանի մասնակից տղաներից:

Ապրիլյան հանձնաժողովի վերջին մահկանացուն կնքվելու է այն պահին, երբ Նիկոլ Փաշինյանին չկանչեն հարցաքննության այդ հանձնաժողովում և չասեն՝ «ընկեր, էս կադրերը, որտեղ դու ասում ես, որ Ապրիլյան պատերազմն Ադրբեջանին ԵԱՏՄ մտցնելու մասին էր, երբ դու ասում ես, որ Ապրիլյան պատերազմը համաձայնեցրած էր Ռուսաստանի հետ: Բացատրի մեզ՝ էս ի՞նչ ես ասել դու: Այ դա չի լինելու»,- ասաց Արմեն Աշոտյանը՝ շեշտելով, որ զավեշտալի է, որ Արցախի ու բանակի հետ կապ չունեցող մարդիկ են քննում Ապրիլյան պատերազմի հարցը:

Ա. Աշոտյանը, ընդգծելով, որ մեր արտաքին քաղաքականությունը նախ և առաջ խարսխված է եղել անվտանգային հարցերի վրա, նկատեց.

«Արտաքին քաղաքականություն այս իշխանությունը չունի: Իրենք փորձում են մեր քարտեզներով անել այդ արտաքին քաղաքականությունը, բայց չի ստացվում: Չունեն մասնագիտական կարողություն, չունեն «դուխ»՝ ասելու՝ չէ: Այս կառավարությունը Հայաստանի նորագույն պատմության մեջ ամենառուսաստանահպատակ կառավարությունն է: Քանի որ այս կառավարությունը չունի վստահություն Մոսկվայում, ամեն անգամ նրանք փորձում են սիրաշահել ռուսներին, բացատրել, որ իրենք սիրում են Ռուսաստանը, որ նախկինում ինչ ասել են, իրենց մեղքով չեն ասել, և ամեն անգամ Մոսկվայում մի հատ բոնուս ստանալու համար անում են քայլեր, որոնք բխում են նախ և առաջ՝ Նիկոլ Փաշինյանի անձնական մոլուցքից՝ վստահություն ունենալ Մոսկվայում: Մեր արտաքին քաղաքականությունն այսօր տառապում է սկոլիոզով»:

Վերջինս կարծում է, որ առաջին անգամ Արցախի հարցում ստեղծվել է մի բացառիկ իրավիճակ, երբ Հայաստանը մեն-մենակ է մնացել Մինսկի խմբի և Ադրբեջանի դեմ:

«Դուք քանդել եք Սերժ Սարգսյանի ամբողջ բանակցային խրամատը, նորը չեք կառուցել: Դուք հասկանո՞ւմ եք՝ ինչ եք արել: Դուք փաթեթից հանել եք Վիեննա, Սանկտ-Պետերբուրգ, Ժնև-ը, դուք չեք խոսում ինքնորոշման իրավունքի մասին»,- դիմելով իշխանություններին՝ ասաց նախկին պատգամավորը:

Անդրադառնալով ՀՀ արտգործնախարար Զոհրաբ Մնացականյանի՝ «Hard Talk»-ին տված հարցազրույցին՝ Արմեն Աշոտյանն ասաց, որ ինքն անցել է այդ դպրոցը և գիտի, թե դա ինչ է:

«Դա շոգեբաղնիք է: Այսինքն՝ եթե դու հայտնվել ես նման լրագրողի ձեռքերում, քեզ այնքան են ծեծում, այնքան է գոլորշի դուրս գալիս…Այդ տեսակետից, այո, դա սթրես է: Բայց դա արդարացում չէ այն մարդու համար, ով ներկայացնում է ՀՀ արտաքին քաղաքականությունը դրսում: Ես անձնապես լավ վերաբերմունք ունեմ Զոհրաբ Մնացականյանի նկատմամբ, բայց ես մարդկայնորեն հիասթափվում եմ այն մարդկանցից, ովքեր «թքում են» այն հորի մեջ, որից նաև սնվել են, ջուր են խմել: Եվ այդ հարցազրույցից առաջին նստվածքն այն էր, երբ Զոհրաբ Մնացականյանը խոսում է ճամպրուկներով չտարվող, իսկ ժամանակին տարվող փողի մասին: Լո՞ւրջ ես ասում»,- տարակուսեց Արմեն Աշոտյանը:

«Իսկ դու մոռանո՞ւմ ես, որ 2008-ի ամռանից մինչև 2011-12 թթ. ինձ հետ միասին Ստրասբուրգում օգնում էիր Սերժ Սարգսյանի «հանցավոր» ռեժիմին, որպեսզի վերացնեն «Մարտի 1»-ի արտաքին քաղաքական հետևանքները: Ինչի՞ եք մեզ ստիպում՝ մենք նման բաներ ձեզ հիշեցնենք»,- Զոհրաբ Մնացականյանին դիմեց ՀՀԿ փոխնախագահը:

Նա հիշեցրեց, որ իշխանություններն առհասարակ Արցախի մասին խոսելիս չեն խոսում ինքնորոշման իրավունքի մասին:

«Մեր նախարարը օվկիանոսագիտության մասին խոսում է նույնքան երկար, ինչքան խոսում է Ղարաբաղի հարցի մասին: Մեր նախարարը չի հակադարձում անգամ այստեղ Բաքվից հնչած ձևակերպումներին: Մեր նախարարը չի խոսում Արցախի ժողովրդի ինքնորոշման իրավունքի մասին»,- նկատեց Արմեն Աշոտյանը:

«Իմ համբերության բաժակը լցվել է: Հարձակումը Հայ եկեղեցու պատմության և ՆԶՊ-ի դեմ՝ որպես առարկաների, սկսվել է վաղուց: Վերջին խոշորածավալ հարձակումը եղել է իմ օրոք՝ 2014թ., երբ որ այսօր նաև ԿԳՄՍ-ում պաշտոններ զբաղեցնող մարդկանց մասնակցությամբ ՄԱԿ-ի համապատասխան հանձնաժողովից բերվեց զեկույց Հայաստանի վրա, որ Հայ եկեղեցու պատմությունը և ՆԶՊ-ն պետք է հանել: Մենք ասացինք՝ ոչ միայն չենք հանելու, շատացնելու ենք ու լավացնենք: Ինչո՞վ է դա կարևոր: Մեր երեխաները պետք է ունենան ոչ միայն ժամանակակից մարդու կոդ, այլ նախ և առաջ՝ ազգային ինքնության կոդ»,- ասաց ԿԳ նախկին նախարարը:

Նա նշեց, որ, երբ ինքը ԿԳ նախարար էր, իր համար կարևոր էր, որ իր ղեկավարած համակարգից դուրս գա ժամանակակից հայ, որտեղ «հայ» բառն ավելի կարևոր է, քան «ժամանակակիցը»:

«Նայում եմ պաշտոնյայի հարցազրույցը, սարսափում եմ: Նախ՝ որոշումն ինքը «ՉՊ» է: Սա Ստամբուլյան կոնվենցիայի ափալ-թափալ վավերացումից պակաս մեծ «ՉՊ» չի, և ես ակնկալում եմ, որ հանրային դիմադրություն կլինի, ստորագրահավաք և այլն: Չի կարելի հանել այդ առարկան: Չի կարելի, և վերջ: Տիկին փոխնախարարն (Արևիկ Անափիոսյան.- խմբ.) ասում է, որ առարկան կամ պետք է վերանայել, համապատասխանեցնել միջազգային ստանդարտներին, կամ ինտեգրել հայ ժողովրդի պատմությանը: Ի՞նչ է նշանակում այս միջազգային ստանդարտը. 1-ին՝ չպետք է լինի կրոնական քարոզչություն, հոգեորսություն և այլատյացություն այլ կրոնների հանդեպ: Երբ որ ՀՀ կրթության պատասխանատուն ասում է, որ մեր՝ այսօր դասավանդվող առարկան փաստորեն խախտում է այս 3 սկզբունքները, իմ չեղած մազերը կանգնում են ու թափվում են միանգամից: Սուրբ Մեսրոպ Մաշտոցն Օշականում երևի շուռ է գալիս ամեն անգամ, երբ որ այս թեմաների մասին խոսում ենք»,- վրդովվեց Արմեն Աշոտյանը:

Անդրադառնալով Սահմանադրական դատարանի նախագահ Հրայր Թովմասյանի շուրջ զարգացող իրադարձություններին, ՀՀԿ փոխնախագահն ասաց, որ ՍԴ-ն վերջին պետական ատյանն է, որը խանգարում է Նիկոլ Փաշինյանին Հայաստանում հաստատել մենիշխանություն:

«Կառավարությունը կուլ տվեց, ԱԺ-ն իրենով արեց, դատարանները վնգստացին, վախեցրեց, մի մասն արդեն չկան, և ինստիտուցիոնալ առումով վերջին մարմինը, որ Նիկոլին չի ենթարկվում, ՍԴ-ն է, և չպիտի ենթարկվի: Հայաստանում իշխանությունը ժողովրդին չի պատկանում, պատկանում է բացառապես Նիկոլ Փաշինյանին, և այդ իշխանությունը տոտալ դարձնելու համար մնացել է ՍԴ-ն: Ո՞վ է դիմադրում: ՍԴ դատավորներից շատերն են դիմադրում. Փառք ու պատիվ իրենց: Հրայրին էլ հատուկ փառք ու պատիվ, որ իր նման կեցվածքով… Ես, որ իր մտերիմ շրջապատի մարդ եմ, չէի պատկերացնում, որ ինքն այդքան ուժեղ տղա ու քաղաքացի է: Հալալ է Հրայր Թովմասյանին, որովհետև ես պատկերացնում եմ իր ապրումները, երբ որ հիվանդ հորը, երեխաներին, սանիկներին, ընկերներին տանում են, էդ ողջ պրեսինգը, ֆեյքերը, լրահոսը, ատելությունը, ու հալալ է էդ տղային»,- նկատեց Արմեն Աշոտյանը:

Նա կարծում է, որ Հրայր Թովմասյանին վստահաբար կձերբակալեին, եթե արդեն չլիներ միջազգային եվրոպական քաղաքական և պատկան կառույցների արձագանքը:

«Եթե ամեն ինչ Նիկոլ Փաշինյանի, իր արդարադատության նախարարի, ԱԺ պատգամավորների սրտով է, դե թող բռնեն Հրայրին: Եթե Բուքիքիոյի հայտարարությունը, իրոք, իրենք կարծում են, որ այն է, ինչ փորձում են հասարակությանը հրամցնել, որ Բուքիքիոն իրենց կողմից է, դե թող շարունակեն: Էս փուլում չեն կարող իրենց ուզածն անել, չնայած անկառավարելի նոպայապետության պայմաններում չես կարող իմանալ, թե ինչ կանի: Մարդ ես, կարող է հիմա վերցնի, հարցազրույցս լսի ու ինձ «ինադու» բռնի»,- եզրափակեց Արմեն Աշոտյանը:

Տեսանյութեր

Լրահոս