Ադրբեջանը դժգոհ է «Եվրատեսիլ 2014»-ի արդյունքներից
Ադրբեջանական APA լրատվական գործակալության փոխանցմամբ՝ Ադրբեջանը դժգոհ է «Եվրատեսիլ 2014» երաժշտական մրցույթի արդյունքներից: Դրանց համաձայն, Ադրբեջանը ներկայացնող երգչուհի Դիլյար Քյազիմովան ժյուրիի քվեարկությամբ զբաղեցրել է 8-րդ, իսկ հեռուստադիտողների քվեներով՝ 21-րդ տեղը:
Արդյունքում, Քյազիմովան զբաղեցրել է 22-րդ տեղը: ITV հեռուստաալիքի «Մեծ բեմ» հաղորդման PR մենջեր Նարմին Մամեդովը կասկածի տակ է դրել ընդհանուր արդյունքները, ըստ որոնց՝ մասնակից բոլոր 37 երկրների ժյուրին շատ բարձր է գնահատել Քյազիմովայի Start a Fire կատարումը, սակայն վերջին հաշվով նա միայն զբաղեցրել է 22-րդ տեղը:
Մամեդովի խոսքերով՝ ընդհուպ մինչև եզրափակչի անցկացումը Քյազիմովան ընդգրկվել է «թոփ-12» մասնակիցների և անգամ «թոփ-5»-ի թվում: Մամեդովը չգիտի, թե իրականում ինչ է տեղի ունեցել:
