Ցուկերբերգ. «Մեր հասարակությունը գիտնական հերոսների կարիք ունի»
Տասնմեկ գիտնականներ, որոնց մեծ մասն ամերիկացիներ են, դարձան աշխարհում բժշկության և կենսաբանության ոլորտում ամենահարուստ գիտական մրցանակի` «Breakthtough Prize»-ի առաջին դափնեկիրները: Նրանցից յուրաքանչյուրին հանձվեց 3 միլիոն դոլար՝ երկու անգամ ավելի, քան Նոբելյան մրցանակն է նախատեսում:
Մրցանակը սահմանել են համացանցի չորս հսկաներ. ռուս ձեռնարկատեր և բարերար Յուրի Միլները, ով մեծ աղմուկ բարձրացրեց՝ անցած տարվա օգոստոսին ֆիզիկոսներին 3 միլիոն դոլարի մրցանակներ տրամադրելով, Google-ի համահիմնադիր Սերգեյ Բրինը, նրա կինը՝ Աննա Վոջիսկին, ով «23andMe» կենսատեխնոլոգիական ընկերության հիմնադիր է, և Facebook սոցցանցի հիմնադիր Մարկ Ցուկերբերգը:
Վոջիսկու կարծիքով՝ մրցանակը նախատեսված է նրանց համար, ով մտածում է, ռիսկի է դիմում և հրաշալի փոփոխություններ իրականացնում մեր կյանքում: «Այս գիտնականները պետք է հասարակության հերոսները լինեն», – նշել է նա:
Ցուկերբերգը ֆեյսբուքյան իր անձնական էջում գրել է. «Մեր հասարակությունը գիտնական, հետազոտող հերոսների կարիք ունի: Այն մարդիկ, ովքեր բուժում են հիվանդություններ, ընդլայնում են մեր պատկերացումները մարդկության վերաբերյալ և աշխատում են բարելավել մարդկանց կյանքը, պետք է պարգևատրվեն ու արժանանան մեծարման»: Ցուկերբերգը նշել է, որ իր համար մեծ պատիվ է աշխատել այդպիսի թիմի հետ՝ հավելելով, որ սահմանված 3 միլիոն դոլարն այս պահին ամենամեծ մրցանակն է աշխարհում:
Մրցանակին արժանանալու համար տարիքային կամ այլ սահմանափակումներ չկան: Ավելին, պարոն Միլների խոսքով՝ նույն անհատը կարող է մրցանակի արժանանալ մի քանի անգամ: «Եթե դու Էյնշտեյն ես, ապա կստանաս 3 մրցանակ»,- ասել է նա:
Հիմնադիրները հույս հայտնեցին, որ կկարողանան ներառել նոր հովանավորների և ավելացնել տարեկան հաղթողների թիվը:
Նյութը պատրաստեց Անի Ավետիսյանը
www.armacad.info
