Տավուշի մարզկենտրոնի հետ կապն ուզում են կտրե՞լ, գոնե հասկանո՞ւմ են դրա հետևանքները. Բաղանիսի նախկին համայնքապետ
Նոյեմբերի 9-ին ՀՀ Արտաքին գործերի փոխնախարար Վահան Կոստանյանը, անդրադառնալով Ադրբեջանի կողմից պահանջվող Տավուշի 4 գյուղերի վերաբերյալ հարցին՝ ասել էր, որ Հայաստանի ու Ադրբեջանի միջև առկա բոլոր խնդիրները պետք է լուծվեն սահմանազատման գործընթացով:
«Բնակավայրերի հետ կապված իրավական խնդիրները կլուծվեն սահմանազատման գործընթացում, մենք Տավուշի 4 գյուղերի հետ կապված խնդիր չենք տեսնում»,- ընդգծել էր նա:
Այդուհանդերձ, Կոստանյանը հստակ չէր պատասխանել լրագրողի հարցին, թե արդյո՞ք Ադրբեջանն 8 գյուղերի հանձնումը նախապայման է դարձրել՝ «խաղաղության պայմանագիրը» ստորագրելու հարցում: Հայտարարել էր, որ այդ գործընթացում իրենց համար անկյունաքարային հարցերից է «ապաշրջափակման գործընթացի 4 սկզբունքների արձանագրումն ու վեճերի կարգավորման մեխանիզմի մշակումը»:
«Կա ընկալում, որ խնդիրները, որոնք կապված են դելիմիտացիայի հետ, պետք է քննարկվեն դելիմիտացիայի հանձնաժողովում»,- ի պատասխան՝ հակիրճ հայտարարել էր ՀՀ ԱԳ փոխնախարարը:
Սահմանապահ Բաղանիս գյուղի նախկին ղեկավար Նարեկ Սահակյանը 168.am–ի հետ զրույցում վստահեցրեց, որ իր ու Բաղանիսի որևէ բնակչի համար «անկլավ» հասկացություն գոյություն չունի, իսկ հող որևէ մեկին չեն պատրաստվում զիջել:
Սահակյանի համոզմամբ՝ ՀՀ իշխանությունները դատողություններ ու հայտարարություններ անում են՝ առանց խնդրին տեղում ծանոթանալու:
«Եթե այդ ճանապարհով հարցերը լուծվեն, մեզ համար շատ ցավոտ հետևանքներ են լինելու: Այդ դեպքում Տավուշի մարզկենտրոնի հետ կապը կտրվելու է: Գոնե պատկերացնո՞ւմ են՝ թե դա ինչ է նշանակում: Դրանից այն կողմ ի՞նչ կարող է լինել: Քարտեզի առջև նստել են ու որոշումներ են կայացնում: Բա թող մի հատ գան ու տեղում տեսնեն, թե իրենց այդ քայլերով ինչ կենսական վնաս են հասցնելու մեր էս գյուղերին: Այդ ժամանակ գուցե սկսեն հասկանալ իրենց կայացրած որոշումների արդարացիությունն ու ոչ արդարացիությունը»,- ասաց Սահակյանը:
Բաղանիսի նախկին ղեկավարը նաև ասաց, որ նախկինում երբևէ որևէ քննարկում չի եղել, այսպես կոչված, «անկլավների» վերաբերյալ: Նրա խոսքով՝ թեման առաջ է բերել Ադրբեջանը, ինչին չեն ընդդիմանում ՀՀ իշխանությունները՝ հաշվի չառնելով տեղի բնակիչների տեսակետն ու այդ գործընթացի օրինականությունը:
Իսկ արդյո՞ք, այսպես կոչված, «անկլավները» ստանալուց հետո Ադրբեջանն այդքանով կբավարարվի:
«Ես մի բան կասեմ. հին հռոմեական ասացվածք կա՝ «Ախորժակն ուտելուց է բացվում»»,- հիշեցրեց Սահակյանը՝ հավելելով, որ գյուղերն Ադրբեջանին տալուց հետո այդ երկիրը պահանջելու է նաև այլ «միջանցքներ»՝ դրանց հետ կապը պահպանելու համար:
«Կառաջանան և՛ տարածքային, և՛ կոմունիկացիոն խնդիրներ: Իսկ մեր երկրի առջև ծառացած անվտանգային խնդիրներն ավելի կխորանան: Ոչ մի խաղաղություն էլ չի լինի»,- համոզմունք հայտնեց սահմանապահ Բաղանիս գյուղի նախկին ղեկավար Նարեկ Սահակյանը:
Հիշեցնենք, որ Ադրբեջանն իրեն համարում է 1918-1920 թվականների Ադրբեջանի Հանրապետության հետնորդ: Իսկ այսպես կոչված՝ «անկլավներն» այդ երկրին տրվել են ԽՍՀՄ ժամանակահատվածում: Խոսքն այս դեպքում վերաբերում է նաև Բաղանիսին: Ինչ վերաբերում է Արծվաշենին, ապա այն նույնպես ամբողջությամբ հայկական է եղել՝ մինչև 1927 թվականը: Ըստ մասնագետների՝ այս գործընթացն իրավական որևէ հիմք չունի:
Նազելի Ստեփանյան