Հոնկոնգում բողոքողները նետեր են արձակել ոստիկանների վրա
Հոնկոնգի ոստիկանությունը հայտարարել է, որ նոյեմբերի 14-ի վաղ առավոտյան բողոքողներն աղեղներից նետեր են արձակել ոստիկանների վրա եւ ծաղկամաններ նետել: Այդ մասին հայտնել է Bloomberg-ը: Ոստիկանները չեն տուժել եւ ի պատասխան կիրառել են արտասվաբեր գազ։
Ինտենսիվ բողոքները եւ ոստիկանության հետ բախումները Հոնկոնգում շարունակվում են չորրորդ օրն անընդմեջ: Ցուցարարները փորձում են քաղաքային տրանսպորտն արգելափակել աշխատանքային օրերին, դա նրանց նոր ռազմավարությունն է: ԶԼՄ-ներն այս օրերին սկսել են հաղորդել, որ բողոքողների շրջանում հայտնվում են մարդիկ, որոնք զինված են աղեղներով, նիզակներով եւ արբալետներով:
Նոյեմբերի 14-ին փակ են մանկապարտեզներն ու դպրոցները: Առավոտյան կրթության քաղաքային բյուրոն դպրոցների աշխատանքի ընդմիջումը երկարացրել է մինչեւ շաբաթվա վերջը: Համալսարանները պարապմունքները հետաձգել են մինչեւ հանգստյան օրեր կամ հայտարարել առցանց-դասընթացներ, հաղորդել է «Ինտերֆաքս»-ը:
