Հարավային Օսիան ճանաչել է Լուգանսկի ժողովրդական հանրապետության անկախությունը
Ռուսական Интерфакс լրատվական գործակալության փոխանցմամբ՝ ինքնահռչակ Լուգանսկի ժողովրդական հանրապետության (ԼԺՀ) ղեկավար Վալերի Բոլոտովը հայտարարել է, որ Հարավային Օսիան ճանաչել է ԼԺՀ-ի անկախությունը: Բոլոտովի խոսքերով՝ ակնկալվում է, որ Հարավային Օսիայում ԼԺՀ-ի դեսպանը կնշանակվի հունիսի 18-ին:
Հարավային Օսիայի նախագահ Լեոնիդ Թիբիլովն իր հերթին ընդգծել է, որ նման որոշում է ընդունել՝ առաջնորդվելով համընդհանուր ճանաչված միջազգային իրավունքի նորմերով:
Հարավային Օսիայի կառավարության մամլո ծառայությունը հայտնել է, որ անկախության ճանաչման մասին ԼԺՀ-ի պաշտոնական դիմումը ստանալուց հետո Թիբիլովը խորհրդակցություն է անցկացրել վարաչապետի, խորհրդարանի նախագահի ու նախագահական աշխատակազմի մասնակցությամբ և ընդունել է այդպիսի որոշում:
Հունիսի 11-ին ԼԺՀ-ն իր անկախության ճանաչման խնդրանքով դիմել էր 13 երկրների, այդ թվում նաև Հայաստանին:
