Աբդուլլահ Գյուլը մեկնել է Վրաստան
Թուրքական Anadolu լրատվական գործակալության փոխանցմամբ՝ Թուրքիայի նախագահ Աբդուլլահ Գյուլը մեկնել է Վրաստան, որի մայրաքաղաք Թբիլիսիում վաղը մասնակցելու է նախագահների մակարդակով կայանալիք «Թուրքիա-Վրաստան-Ադրբեջան» եռակողմ գագաթաժողովին:
Վրացական այցի ընթացքում Գյուլին ուղեկցում են Թուրքիայի զբաղվածության ու սոցիալական անվտանգության նախարար Ֆարուք Չելիքը և տրանսպորտի, կապի ու նավագնացության նախարար Լյութֆի Էլվանը:
Վրաստան մեկնելուց առաջ օդանավակայանում լրագրողների հետ զրույցում Գյուլը հայտարարել է, որ Վրաստանում քննարկվելու է Հարավային Կովկասի կայունության հարցը, ինչպես նաև տնտեսական հարցեր (համատեղ նախագծեր) և տարածաշրջանի անվտանգության առնչվող հարցեր:
Գյուլի խոսքերով՝ Թուրքիայի ու Վրաստանի միջև ապրանքաշրջանառության ծավալը կազմում է 1.5 միլիարդ դոլար, իսկ Վրաստանում թուրքական ներդրումների ծավալը հասնում է 1 միլիարդ դոլարի: Գյուլը հավելել է, որ թուրքական ընկերությունները Վրաստանում կառուցում են հիդրոէլեկտրակայաններ, հյուրանոցներ, բարձրահարկ շենքեր:
