Պուտինն ու Մերկելը քննարկել են Ուկրաինայի հարցը
Ռուսական РИА Новости լրատվական գործակալության փոխանցմամբ՝ Ռուսաստանի նախագահ Վլադիմիր Պուտինը երեկ հեռախոսազրույց է ունեցել Գերմանիայի կանցլեր Անգելա Մերկելի հետ, որի ժամանակ ընդգծել է Կիևի ներկայիս իշխանությունների ու Ուկրաինայի հարավ-արևելքի ներկայացուցիչների միջև երկխոսություն հաստատելու անհրաժեշտությունը:
Այս մասին հայտնել է Կրեմլի մամլո ծառայությունը: Պուտինն ու Մերկելը քննարկել են նաև ռուսական գազի մատակարարման ու տարանցման ապահովման հարցը՝ հաշվի առնելով օրեր առաջ Վարշավայում տվյալ խնդրի շուրջ անցկացված եռակողմ (ԵՄ-ՌԴ-Ուկրաինա) խորհրդակցությունները:
Պուտինն ու Մերկելը կարևորել են Ուկրաինայում լարվածության նվազեցման ուղղությամբ միջազգային միջոցների ձեռնարկումը, և առաջին հերթին ԵԱՀԿ-ի գծով: Մայիսի 7-ին տվյալ հարցով Մոսկվա է ժամանելու ԵԱՀԿ գործող նախագահ Դիդիե Բուրկհալտերը:
