Ապրիլի 18-ին կմեկնարկեն ՌԴ-ի Արևմտյան ռազմական օկրուգի զորավարժությունները
Ռուսական Интерфакс լրատվական գործակալության փոխանցմամբ՝ Արևմտյան ռազմական օկրուգի МиГ-29СМТ և Су-27 կործանիչների անձնակազմերը պատրաստվում են մասնակցել մասշտաբային զորավարժությունների, որոնց ընթացքում իրականացվելու է այլ օդանավակայաններում կենտրոնացում և մարտական կրակոցների արձակում:
Պլանի համաձայն, Տվերի ավիագնդի Су-27 տիպի կործանիչների անձնակազմն առաջին անգամ թռիչքներ կիրականացնի դեպի Կուրսկի մարզի Խալինո օդանավակայան, ուր և կանցնի մարտական ծառայության՝ Ռուսաստանի արևմտյան օդային սահմանները պաշտպանելու համար: Կուրսկի ավիագնդի օդաչուներն իրենց հերթին МиГ-29СМТ կործանիչներով թռիչքներ կիրականացնեն դեպի Աստրախանի մարզի ռազմական օդանավակայան:
Արևմտյան ռազմական օկրուգի մամուլի ծառայության հաղորդմամբ՝ զորավարժություններին մասնակցելու է կործանիչային ու տրանսպորտային ավիացիայի ավելի քան 30 անձնակազմ: Զորավարժությունները մեկնարկելու են ապրիլի 18-ին և տևելու են մեկ շաբաթ:
