Հեգսեթի թիմը փորձում էր հարցազրույց կազմակերպել Իրանի վրա խոցված ինքնաթիռի օդաչուների հետ, սակայն զինվորականները վախեցել են գաղտնի տվյալների արտահոսքից
ԱՄՆ պաշտպանության նախարար Փիթ Հեգսեթի գրասենյակի պաշտոնյաները փորձում էին ապահովել, որ Իրանի վրա խոցված F-15 կործանիչի անձնակազմի երկու անդամները մասնակցեն «60 րոպե» ծրագրի լայնորեն գովազդված հարցազրույցին, որը նվիրված էր նրանց փրկելու գործողությանը։ Միևնույն ժամանակ, երկու զինծառայողներն էլ սկզբում չէին ցանկանում մասնակցել նկարահանումներին, իսկ զինված ուժերի ներկայացուցիչները մտավախություն ունեին, որ կարող են բացահայտվել փրկարարական գործողության գաղտնի մանրամասները, հայտնում է CNN-ը՝ հղում անելով աղբյուրներին։
Հեռուստաալիքի զրուցակիցների տվյալներով, օդաչուներից մեկը նույնիսկ մտահոգություն էր հայտնել, որ իրեն կարող են պարտավորեցնել մասնակցել ծրագրին։ Սակայն այն բանից հետո, երբ երկու զինծառայողներն էլ կասկածներ հայտնեցին, Հեգսեթն անձամբ հանդիպել է նրանց հետ և առաջարկել ինքնուրույն որոշել՝ ցանկանում են արդյոք հարցազրույց տալ։
Արդյունքում օդաչուներից մեկը, որը ծրագրում ներկայացվել է «Բրավո» մարտական անունով, համաձայնել է նկարահանվել և պատմել իր ապրածի մասին։ Երկրորդ զինծառայողը՝ «Ալֆան», հրաժարվել է մասնակցել ծրագրին։
Պենտագոնը մինչև օրս հրապարակայնորեն չի բացահայտել անձնակազմի երկու անդամների անունները։ CNN հեռուստաալիքը նույնպես չի կարողացել հաստատել նրանց ինքնությունը։
