Ղազախստանը պատրաստ է ակտիվորեն զարգացնել ԱՄՆ-ի հետ հարաբերությունները. Նազարբաև
KAZINFORM-ի փոխանցմամբ՝ Ղազախստանի նախագահ Նուրսուլթան Նազարբաևը հանդիպել է ԱՄՆ փոխպետքարտուղար Ուիլյամ Բեռնսի հետ: Հանդիպման ժամանակ կողմերը քննարկել են երկկողմ հարաբերությունների հիմնական ուղղությունները, այդ թվում նաև առևտրա-տնտեսական ու ներդրումային ոլորտներում:
Բացի այդ, նրանք դիտարկել են Առևտրի համաշխարհային կազմակերպությանը (ԱՀԿ) Ղազախստանի առաջիկա անդամակցության հարցը: Բեռնսն ու Նազարբաևը նաև կարծիքներ են փոխանակել միջազգային օրակարգում առկա այժմեական խնդիրների շուրջ՝ ներառյալ Ուկրաինայում ու Աֆղանստանում տիրող իրավիճակները:
Հանդիպման ժամանակ Նազարբաևը հայտարարել է, որ Ղազախստանը պատրաստ է ակտիվորեն զարգացնել երկկողմ հարաբերություններն ԱՄՆ-ի հետ. «Ոչ վաղ անցյալում ես Հաագայում հանդիպեցի ԱՄՆ նախագահի հետ:
Մենք մանրամասնորեն քննարկեցինք մեր երկրների միջև հարաբերությունների զարգացման հարցը, ինչպես նաև այսօր աշխարհում ձևավորվող իրավիճակը: Բացի այդ, ընդունեցինք համատեղ հայտարարություն: Անհրաժեշտ է հետագայում նույնպես շարունակել բարձր մակարդակի երկկողմ համագործակցությունը»:
