Թիվ 1 հրաման` Գյումրիում. կրթելու է Աննա Հակոբյանը. խառնվել է նաև ՊԵԿ-ը, դահլիճը դատարկ չպետք է լինի
Վաղը Գյումրիում Նիկոլ Փաշինյանի կինը` Աննա Հակոբյանը, իրականացնելու է հարկատուների հաշվին իրականացվող «Կրթվելը նորաձև է» անբովանդակ քարոզչական արշավի հերթական հավաքը։ Հանդիպման վայրը Գյումրու դրամատիկական թատրոնն է։
Բայց քանի որ Աննա Հակոբյանը տեսել է Մարալիկի տխուր կրթարշավի կիսադատարկ դահլիճը, իսկ գյումրեցիներն առանձնապես Աննա Հակոբյանի մոտ կրթվելու ցանկություն չունեն, որոշել են էս գլխից ապահովագրել իրենց ու առնվազն մասնակցության մեծ թիվ ցույց տալ։
Մոբիլիզացվել է մարզի կրթական ու առհասարակ վարչական ռեսուրսը` դպրոցների, պոլիկլինիկաների տնօրենների և ուշադրություն… Գյումրիում գործող ՍՊԸ-ների, անհատ ձեռնարկատերերի ու այլ իրավաբանական անձանց մոբիլիզացիայով։
Վերջիններիս մասնակցությունն ապահովելու համար 168.am-ի տեղեկություններով` գործին խառնվել է ՊԵԿ Շիրակի մարզային բաժինը։
ՊԵԿ աշխատակիցները երեկվանից հրավիրել են Գյումրիում գործող ՍՊԸ-ների տնօրեններին, անհատ ձեռներեցներին ու խստիվ հրահանգել X քանակով անձանց պարտադիր մասնակցություն ապահովել Գյումրու դրամատիկական թատրոնում`որևէ կերպ լցնելու համար գրեթե 700-տեղանոց դահլիճը։ Դրա համար պահանջել են մասնակիցների անձնագրերը, գրել են նրանց տվյալները ու խստիվ զգուշացրել` չլինի այնպես, որ գրանցվեն, բայց չներկայանան. ստուգելու են ու խիստ պատժեն այն անձանց, ովքեր գրանցվել ու չեն եկել։
Իշխանամետ հայացքներով մասնակիցներին հարցեր են բաժանվել, այսպես կոչված, իրական Հայաստանի մասին։
