«Ինչպե՞ս պատահեց, որ դու ամենավերջին ապիկարի նման, առանց քաղաքացիներին հարցնելու՝ ասացիր, թե մենք արտաքին կողմնորոշումները պահպանում ենք». Հայրիկյանը՝ Փաշինյանին
«Սահմանադրական կարգի մասին խոսող հեղափոխականները մեկ-մեկ եվրոպացիների հետ խոսելիս ժողովրդավարության մասին էլ են խոսում, բայց նկատե՚՞լ եք, որ Ռուսաստանի, Ղազախստանի կամ Բելառուսի ղեկավարների հետ խոսելիս՝ Նիկոլ Փաշինյանը երբեք չի ասում՝ մենք ժողովրդավարական ենք, կարող ենք տարբեր կարծիքներ ունենալ, բայց հենց Եվրոպա է հասնում, այնտեղ ժողովրդավարությունից է խոսում»,- լրագրողների հետ հադիպման ժամանակ նշեց ԱԻՄ առաջնորդ Պարույր Հայրիկյանը:
«Կարևոր հարցեր կային, որոնք կատարվել էին Սերժ Սարգսյանի ժամանակ՝ սահմանադրական փոփոխություն և արտաքին քաղաքական կողմնորոշում: Նիկո՛լ Փաշինյան, դու միշտ ասում ես՝ ժողովուրդն ինչ ասի, այդպես էլ կանեմ, բա այդ ինչպե՞ս պատահեց, որ արտաքին քաղաքականության հարցում, ԵԱՏՄ հարցում դու հանկարծ չուզեցիր ժողովրդի կարծիքը հարցնել: Չէ՞ որ նախորդ իշխանությունները ժողովրդի կարծիքը չհարցնելով՝ կեղծել էին Սահմանադրությունն ու մեկ օրվա մեջ փոխել էին դեպի Եվրոպա դիրքորոշումը՝ դեպի ԵԱՏՄ դիրքորոշման հետ:
Եթե դու ասում ես՝ ժողովո՛ւրդ, մենք ձեր կամքն ենք կատարում, բա ինչպե՞ս պատահեց, որ դու ամենավերջին ապիկարի նման, առանց քաղաքացիներին հարցնելու՝ ասացիր, թե մենք արտաքին կողմնորոշումները պահպանում ենք, չէ՞ որ գոնե ձևական քայլեր կարելի էր կատարել, ասել, որ մենք կճշտենք: Դա նաև Հայաստանի նկատմամբ հարգանք կլիներ, կասեին՝ տեսե՛ք, ՀՀ-ում եկել են նոր իշխանություններ, որ նախկինում ընդունված բոլոր որոշումների վերաբերյալ ժողովրդի կարծիքն են լսում:
Ես պատիվ ունեմ լինել այն մարդը, ով ավելի քան 30 տարի առաջ Գորբաչովին ստիպել է ընդունել օրենք՝ ռեֆերենդումի մասին: 1989 թվականին, երբ Գորբաչովն ասաց՝ դեմոկրատիզացիա ենք սկսում, ես ասացի՝ առանց ժողովրդի կարծիքը պարզելու գործիքի՝ չի կարող լինել»,- հավելեց Պարույր Հայրիկյանը:
Անի Կարապետյան
