Հայտնի է աշխարհում լավագույն դիետան
ԱՄՆ Սրտի, թոքերի և արյան ազգային ինստիտուտի փորձագետները հետազոտել են աշխարհի ամենահայտնի 38 դիետաները և պարզել են, թե որն է լավագույնը: Այն DASH անվանումը ստացած սննդակարգն է, որը թարգմանաբար նշանակում է «Հիպերտոնիայի կանխարգելման դիետիկ մոտեցում»:
Այս սննդակարգը ներառում է մեծ քանակությամբ մրգեր, բանջարեղեն, հացահատիկների մեծ տեսականի, յուղազերծված կաթնամթերք, ձուկ, թռչնամիս, ճարպ չպարունակող տավարի միս, լոբազգիներ և ընկուզեղեն:
Դիետայի պարտադիր պայման է նաև աղի քիչ քանակության օգտագործումը, նատրիումով ու հագեցած ճարպերով հարուստ մթերքի, քաղցրավենիքի, քաղցր հյութերի սահմանափակումը:
Ամերիկացի գիտնականների խոսքով՝ այս դիետան ոչ միայն թույլ կտա նվազեցնել քաշը, այլև կօգնի կարգավորել արյան ճնշումը, մաքրել աղեստամոքսային համակարգը, նվազեցնել սրտանոթային հիվանդությունների ռիսկը: Որոշ դեպքերում DASH-ը կարող է ամբողջությամբ փոխարինել զարկերակային ճնշման դեմ օգտագործվող դեղորայքը:
Լավագույն դիետան որոշելու համար գիտնականները հաշվի են առել նաև դրա համեմատաբար հասարակ, սննդարար և անվտանգ լինելու հանգամանքը:
