ՀՀ կառավարությունում «սորոսականներ» չկան․ Նիկոլ Փաշինյան
Հայաստանը ձգտելու է «որակապես նոր մակարդակի» հարաբերություններ կառուցել Ռուսաստանի հետ։ Sputnik Армения-ի փոխանցմամբ, այս մասին հայտարարել է ՀՀ վարչապետ Նիկոլ Փաշինյանը։ «2018 թվականի «թավշյա հեղափոխությունից» հետո ես ասել եմ, որ մեր նպատակն է՝ կառուցել նոր որակի և մակարդակի հարաբերություններ»,- նշել է Փաշինյանը։ Նա նաև ասել է, որ Հայաստանի և Ռուսաստանի հարաբերություններում որևէ բացասական երևույթ տեղի չի ունեցել։ ՀՀ վարչապետը նաև հերքել է այն մեղադրանքները, իբրև թե ՀՀ կառավարությունը ղեկավարում են, այսպես կոչված, «սորոսականները»։ «Հայկական կառավարությունում չկան «սորոսականներ», կան «փաշինյանականներ»։ Խնդրում եմ, որպեսզի բոլորը դա ի գիտություն ընդունեն»,- ընդգծել է ՀՀ վարչապետը։
Հիշեցնենք, որ Ադրբեջանի նախագահ Իլհամ Ալիևը վերջին շրջանի իր բոլոր հայտարարություններում և հարցազրույցներում պարբերաբար ընդգծում է, որ 2018-ին Հայաստանում տեղի ունեցած իրադարձությունները, իր բնորոշմամբ՝ «սորոսական հեղափոխություն» էր:
Նախօրեին էլ Россия 1 հեռուստաալիքի եթերում հեռարձակվող «60 րոպե» հաղորդմանը տված հարցազրույցում Ադրբեջանի նախագահը նշել էր, որ ԵԱՀԿ Մինսկի խմբի կողմից մշակված սկզբունքների էությունը կայանում է նրանում, որ նախկին Լեռնային Ղարաբաղի Ինքնավար շրջանի շուրջ գտնվող տարածքը պետք է փոխանցվի Ադրբեջանին։ «Իսկ եթե Նիկոլ Փաշինյանն ասում է, որ Ղարաբաղը Հայաստան է, և ի հավելում դրա՝ ասում է, որ մենք պետք է բանակցություններ վարենք Լեռնային Ղարաբաղի, այսպես կոչված, մարիոնետային ռեժիմի հետ, դրանով իսկ փորձում է կոտրել բանակցային ձևաչափը, որը գոյություն ունի վերջին 20 տարվա ընթացքում։ Նշանակում է, որ Հայաստանը գիտակցաբար խախտում է բանակցային գործընթացն ու անընդունելի պահանջներ առաջ քաշում»,- հայտարարել էր Ալիևը։ Հայկական հեղափոխությունը, որի արդյունքում 2018 թվականի գարնանը Նիկոլ Փաշինյանը դարձավ կառավարության ղեկավար, Ալիևը բնութագրել էր՝ որպես «սորոսական հեղափոխություն»։
