Թուրքիայում քաղաքացին փորձել է կոյուղու միջոցով մտնել կարանտինային գոտի

Թուրքիայի Անթալիա քաղաքում երիտասարդը փորձել է կոյուղաջրերի հորանի միջով մտնել կարանտինային գոտի, որը հայտարարվել էր կորոնավիրուսի դեմ տարվող պայքարի շրջանակում։ Այս մասին տեղեկացնում է ermenihaber.am-ը:

Նշվում է, որ այդ քայլին դիմելու պատճառն այն է, որ երիտասարդը չի կարողացել մտնել Անթալիայի Յեշիլդերե թաղամաս, քանի որ այն շրջափակված է եղել ոստիկաններով և պատնեշներով։ 

Հորանի միջով մի փոքր առաջանալուց հետո արկածախնդիր երիտասարդը վատ է զգացել և դիտահորի կափարիչից օգնություն է կանչել։

Նրան օգնության են շտապել քաղաքացիները և ահազանգել են փրկարար ծառայություն։  Փրկարարներին հաջողվել է նրան դուրս բերել այնտեղից։  Վերջինս հոսպիտալացվել է։ 

Աղբյուրը հաղորդում է, որ տվյալ անձը թմրանյութերից կախվածություն ունի։