Արցախի թեմի առաջնորդը զատկական պատգամ է հղել
Արցախի թեմի առաջնորդ Տ. Պարգև արքեպիսկոպոս Մարտիրոսյանը զատկական պատգամ է հղել:
«Սիրելի արցախցիներ,
Տարին կրկին մոտեցավ նվիրական այն պահին, երբ ազգովի պետք է նշենք մեր Տեր և Փրկիչ Հիսուս Քրիստոսի Հրաշափառ Հարության` Ս. Զատկի տոնը:
Աստծո պատկերով ու նմանությամբ ազատ ստեղծված առաջին մարդիկ ի չարը գործադրեցին իրենց ազատ կամքը` խախտելով իրենց տրված միակ պատվիրանը և մեղքը ներմուծելով մարդկային կյանքի մեջ, ինչի արդյունքում վտարվեցին դրախտից և դարձան մահկանացու` այդ անեծքը տարածելով մարդկային ողջ ցեղի վրա: «Մեղքի վարձը մահն է», – ասվում է Ս. Գրքում, և այդ վարձը հատուցում են բոլոր մարդիկ, քանզի բոլորն էլ մեղանչում են և ի վերջո վճարում իրենց մահվամբ:
Դարեր ու հազարամյակներ շարունակ մարդկությունը որոնել է իր ամենաանպարտելի թշնամուն` մահվանը հաղթելու ուղիները, սակայն ապարդյուն, քանզի անկախ ունեցած հոգևոր, մտավոր, բարոյական, ֆիզիկական և նյութական հնարավորություններից ու առավելություններից, բոլոր մարդիկ հավասարապես անզոր են մահվան գերիշխանության հանդիման:
Եվ ահա գալիս է ժամանակը, երբ Աստված Ինքը տալիս է մարդկությանը մահվանը հաղթելու և անմահության հասնելու միջոցը: Եվ ի՞նչն է ամենաանկանխատեսելին ու ամենազարմանալին. այդ միջոցը հենց ինքը մահն է. մահ, որին հետևում է հարությունը և անմահությունը:
Մարդկության համար անխորտակելի այս դուռը բացելու համար Աստված մարմին է առնում և մարդանում, ապրում մարդկանց մեջ և ուսուցանում փրկության ճանապարհը: Ապա, Իր վրա վերցնելով ողջ մարդկության մեղքը, խաչի վրա տաժանակիր մահվամբ մահանում է և երրորդ օրը Հարություն առնում`խորտակելով մեղքի ու մահվան շղթաները և լայնորեն բացելով հավիտենական փրկության ու անմահության դռները: Ս. Հարության տոնի շարականը սքանչելի կերպով ներկայացնում է այս խորհուրդը. «Քրիստոս հարություն առավ մեռելներից, մահվամբ մահը խորտակեց և մեզ կյանք պարգևեց»:
Սիրելի արցախցիներ, տոգորված այս խորին խորհրդով` ձեզ ենք բերում Մեր օրհնությունը և Ս. Հարության տոնի երջանիկ ավետիսը.
Քրիստոս Յարեաւ ի մեռելոց
Օրհնեալ է Յարութիւնն Քրիստոսի»:
