Չամիչի 11 օգտակար հատկություն, որոնց մասին չգիտեք
Steptohealth.ru կայքը գրում է, որ չամիչը բազմաթիվ օգտակար հատկություններ ունի։
1. Էներգիա է հաղորդում։ Չամիչը բազմաթիվ սննդարար նյութեր է պարունակում, որոնց շնորհիվ էներգիա է հաղորդում օրգանիզմին։ Այն բավական մեծ քանակով արագ յուրացվող ածխաջրեր է պարունակում։ Չամիչի էներգետիկ արժեքը բավական բարձր է, և այն խորհուրդ է տրվում երեխաներին ու դեռահասներին, սպորտսմեններին, բոլոր նրանց, ում մասնագիտական գործունեությունը կապված է բարձր ծանրաբեռնվածության հետ։ Այն հարուստ է երկաթով, պղնձով, մանգանով և երկաթով և անփոխարինելի է բոլոր նրանց համար, ովքեր ցանկանում են քաշ հավաքել։
2. Կարգավորում է նյարդային համակարգը։ Չամիչը սթափություն է հաղորդում, բաղմաթիվ օգտակար միկրոէլեմենտներ է պարունակում և B խմբի վիտամիններ։ խորհուրդ է տրվում բոլոր նրանց, ովքեր ֆիզիկապես հյուծված են, քրոնիկական հոգնածության և սրթեսի խնդիր ունեն։ Չամիչն օգտակար է ուսանողներին և մեծահասակներին, քանի որ լավացնում է ուղեղի գործունեությունը, կանխարգելում հիշողության հետ կապված խնդիրների առաջացումը։
3. Բուժում է փորկապությունը։ Չամիչը հրաշալի միջոց է փորկապության հետ կապված խնդիրը լուծելու համար, քանի որ թուլացնող հատկություն ունի, մեծ քանակով օրգանական թթուներ է պարունակում, պեկտին և ֆրուկտոզա։ Այն նպաստում է աղիների մաքրմանը։
4. Օգտակար է տեսողության համար։ Չամիչը նյութեր է պարունակում, որոնք հոգ են տանում աչքերի առողջության մասին։ Չամիչը լավացնում է արյան շրջանառությունը և աչքերի սնուցումը։ Այդ պատճառով էլ այն իդեալական միջոց է աչքերի հոգնածության, կատարակտի, գլաուկոմայի դեպքում։
5. Ամրացնում է ոսկորները։ Չամիչը մեծ քանակով կալցիում և մագնեզիում է պարունակում, որոնք շատ օգտակար են ոսկորների համար։ Այն կպաշտպանի օստեոպարոզից և դրական ազդեցություն կունենա անոթների առողջության վրա։ Խորհուրդ է տրվում կանանց՝ հղիության կամ կրծքով կերակրման ընթացքում, երբ օրգանիզմն ավելի շատ կալցիում է պահանջում։ Կարող է թեթևացնել արթրիտով և օստեոպարոզով հիվանդների վիճակը, քանի որ հակաբորբոքային հատկություններ ունի և կարող է նվազեցնել ցավային զգացողությունները։
6. Աֆրոդիզիակ հատկություններ ունի։ Որոշ երկրներում չամիչն ուժեղ աֆրոդիզիակ է համարվում և ներառված է մի շարք քաղցրավենիքների բաղադրատոմսերում։ Դա կապված է նրա հետ, որ չամիչն ամինաթթուներ է պարունակում, որոնք կարող են բարձրացնել լիբիդոն, բուժել իմպոտենցիան։
7. Կարող է ջերմիջեցնող հատկություն ունենալ։ Չամիչը հակաբիոտիկ հատկություններ ունի և օգնում է բուժել վարակները։
8. Նվազեցնում է ուտելու ցանկությունը։ Ընդունված է համարել, որ չամիչ չի կարելի օգտագործել բոլոր նրանց, ովքեր ճարպակալման խնդիր ունեն, սակայն իրականում չամիչը կարող է իջեցնել խոլեստերինի մակարդակը, նվազեցնել ուտելու ցանկությունը և արագ հագեցնել քաղցը։ Այն հրաշալիորեն կարող է փոխարինել քաղցրավենիքին։ Սակայն հարկավոր է քիչ չամիչ օգտագործել, քանի որ այն բավական շատ շաքար է պարունակում։
9. Օգնում է ացիդոզի դեպքում։ Այս վիճակի դեպքում բարձրանում է արյան թթվայնությունը, ինչը բացասական ազդեցություն է ունենում օրգանիզմի վրա, քանի որ նպաստում է երիկամներում քարերի առաջացմանը և մազաթափության պատճառներից մեկն է դառնում։ Չամիչը բավական շատ կալիում և մագնեզիում է պարունակում, որոնք կարող են չեզոքացնել այս թթուների ազդեցությունը։
10. Պաշտպանում է ատամների առողջությունը։ Չամիչը թթուներ է պարունակում, որոնք ատամները պաշտպանում են կարիեսի առաջացումից, իջեցնում է դրանց զգայունությունը և ամրացնում ատամների էմալը։ Չամիչը կարող է նաև խոչընդոտել բակտերիաների աճին, որոնք կարիես և փառ են առաջացնում։
11. Պաշտպանում է սրտի առողջությունը։ Չամիչը հակաօքսիդանտներ է պարունակում, որոնք արդյունավետորեն պայքարում են խոլեստերինի դեմ և մաքրում անոթները, կանխարգելում սրտի և անոթների հետ կապված խնդիրների առաջացումը։ Չամիչն օգնում է նաև կարգավորել զարկերակային ճնշումը, այդ պատճառով էլ օգտակար է բոլոր նրանց համար, ովքեր հիպերտոնիա ունեն։
Նյութը հրապարակման պատրաստեց 168.am-ը
