Oracle ընկերության ներկայացուցիչները հանդիպել են ԲՏԱ փոխնախարարի հետ
Նոյեմբերի 18-ին ՀՀ բարձր տեխնոլոգիական արդյունաբերության նախարարի տեղակալ Ռուբեն Սիմոնյանն ընդունել է Oracle ընկերության Բալթյան, Ադրիատիկ և Կենտրոնական Ասիայի տարածաշրջանի տնօրեն Բոյան Սադիկովիչի գլխավորած պատվիրակությանը` հայտնում են նախարարությունից և մանրամասնում. «Իր խոսքում նախարարի տեղակալը ներկայացրել է նախարարության ռազմավարական ծրագրերն ու նախաձեռնությունները, որոնք ուղղված են բարձր տեխնոլոգիաների ոլորտի ամրապնդմանը, նորարարական լուծումների զարգացմանը և Հայաստանի դիրքի ամրապնդմանը՝ որպես տարածաշրջանային տեխնոլոգիական կենտրոն։
Ռուբեն Սիմոնյանը նաև ներկայացրել է Հայաստանի տեխնոլոգիական ներուժը, մարդկային ռեսուրսների բարձր որակը և ոլորտի զարգացմանն ուղղված պետական քաղաքականությունը, ինչպես նաև իրականացված նախագծերը, որոնք զգալի ազդեցություն են ունեցել Հայաստանի տեխնոլոգիական էկոհամակարգի զարգացման վրա։
Բոյան Սադիկովիչն, իր հերթին, ներկայացրել է Oracle-ի գործունեության հիմնական ուղղությունները և ընկերության ներուժը։
Քննարկման ընթացքում անդրադարձ է կատարվել Հայաստանում ընկերության հետագա գործունեությանը, ինչպես նաև համագործակցության ընդլայնման հնարավորություններին։ Երկուստեք ընդգծվել է գործընկերային հարաբերությունների ամրապնդման և նոր նախաձեռնությունների իրականացման անհրաժեշտությունը։
Հանդիպման ավարտին ձեռք են բերվել պայմանավորվածություններ՝ փոխադարձ հետաքրքրություն ներկայացնող նախաձեռնությունների շուրջ քննարկումները շարունակելու ուղղությամբ»։
