ՆԱՏՕ-ն պլանավորել է ուժեղացնել Հայաստանի, Ադրբեջանի ու Մոլդովայի հետ իր համագործակցությունը. մամուլ
Russia Today հեռուստաալիքի փոխանցմամբ՝ գերմանական Spiegel Online պարբերականի տրամադրության տակ է հայտնվել մի փաստաթուղթ, որում նշված է, որ ՆԱՏՕ-ն պլանավորել է զարգացնել Հայաստանի, Ադրբեջանի ու Մոլդովայի հետ իր համագործակցությունը:
Փաստաթղթում ընդգծվում է, որ ՆԱՏՕ-ն պետք է պահպանի տվյալ տարածաշրջանում իր գործընկերներին: Կարճաժամկետ նպատակն Արևելյան Եվրոպայում կայունությանը նպաստելն է՝ հաշվի առնելով ներկայիս համատեքստը: Բացի այդ, դիտարկվելու են ՆԱՏՕ-ի անդամ երկրների բանակների հետ այդ երկրների բանակների համատեղելիության մակարդակի բարձրացման հնարավորությունները:
Դրա տակ պետք է հասկանալ համատեղ զորավարժությունների անցկացում և զինծառայողների որակների բարձրացում: Երեք երկրներից յուրաքանչյուրի համար նախատեսված է միջոցառումների անհատական համալիր:
Օրինակ, Մոլդովայից ՆԱՏՕ է ուղարկվելու կապի գծով սպա, Ադրբեջանի հետ ուժեղացվելու է համագործակցությունն էներգետիկ ու կիբերանվտանգության ոլորտներում, Հայաստանում ՆԱՏՕ-ն առաջնահերթ է համարում երկրի զինված ուժերի անձնակազմի որակների բարձրացումը:
