Ո՞վ է պատասխանատու օդանավակայանի կոյուղաջրերի համար
168.am-ը երեկ անդրադարձել էր Արմավիրի մարզի Փարաքար գյուղի խնդրին : Գյուղում արդեն 20 տարի կոյուղագիծ չկա, ու կոյուղաջրերը գյուղամիջով են հոսում: Սեփական կոյուղաջրերի դեմ պայքարը չավարտած փարաքարցիներն արդեն մի քանի տարի է՝ այլ խնդրի առջև են կանգնել: Համայնքի գյուղատնտեսական նշանակության հողատարածքները վերածվում են ճահճի: Պատճառը, ըստ գյուղացիների, այն է, որ «Զվարթնոց» օդանավակայանի կոյուղաջրերը թափվում են հողատարածքները: Արդեն մի քանի տարի է՝ փարաքարցիները չեն կարողանում հողագործությամբ զբաղվել, իսկ հողն անընդհատ ավելի է կեղտոտվում ու թունավորվում: Խնդրի առնչությամբ փարաքարցիները մի քանի անգամ դիմել են օդանավակայանի տնօրինությանը, սակայն ապարդյուն:
Մեզ հետ հեռախոսազրույցում «Արմենիա միջազգային օդանավակայաններ» ՓԲԸ-ից ասացին, որ խնդիրն իրենց չի վերաբերում, և կոյուղաջրերի հարցով պետք է դիմել Քաղավիացիայի վարչություն: Վերոնշյալ կազմակերպությունում նախ զարմացան, հետո ասացին, որ իրենք ընդամենը քաղավիացիայի վարչության հարցերով են զբաղվում, այլ խնդիրներից տեղյակ չեն, հետևաբար հարցի առնչությամբ պետք է դիմել «Արմենիա միջազգային օդանավակայաններ» ՓԲԸ-ին, քանի որ օդանավակայանի պատասխանատուն իրենք են:
Ստացվում է անհասկանալի մի իրավիճակ, երբ կազմակերպությունն ու գերատեսչությունը միմյանց «պաս» են տալիս, միայն թե չպատասխանեն հարցերին ու չխոստովանեն, որ արդեն տարիներ շարունակ օրենք են խախտում: Զավեշտալի իրավիճակ է ստեղծվում, երբ մի քանի հարյուր գյուղացիներ չեն կարողանում հող մշակել օդանավակայանի պատճառով, իսկ օդանավակայանում չգիտեն, թե ո՞վ պետք է հարցերին պատասխանի:
