Մենք մեր ձեռքով մեր պետությունը քանդում ենք՝ սա է ճշմարտությունը. Նիկոլ Փաշինյան

«Երբ գնացինք Հաղարծին գյուղի մոտ, տեսանք, որ ճանապարհը քանդված է, նայեցինք գետի հունին, ասացին՝ պարզ էր, որ պետք է քանդվեր, որովհետև գետի հունի մեջ անտառ էր աճած: Մեզ պետք է այդ հարցի ինստիտուցիոնալ լուծում»,- կառավարության նիստին ասաց Նիկոլ Փաշինյանը:

Նա նշեց, որ գետերի հուները պետք է կառավարել այնպես, որ պոտենցիալ ջրհեղեղի մասշտաբները նվազեցվեն. «Կա նաև բնապահպանական խնդիր, որ այնպես անենք, որ գետերը լինեն էկոլոգիական նորմալ վիճակում, այսինքն՝ աղբ, և այլն, և այլն, կեղտաջրերի հետ կապված պրոբլեմները: Երրորդը՝ քաղաքաշինական խնդիր կա, որովհետև գետերի հուները, որոնք քաղաքների, բնակավայրերի ներսով կամ տուրիստական գոտիներով են անցնում, այդտեղ պետք է որոշակի քաղաքաշինական կառավարում իրականացվի: Եթե սա էլ դիտենք քաղաքաշինական, ճանապարհների և գետերի հուների շփման անկյունների խնդիրը, որը պետք է քննարկվի»:

Նիկոլ Փաշինյանն ասաց, որ երբ ջրհեղեղի հաջորդ օրն այցելել է Ալավերդի, մի տարօրինակ տեսարանի է ականատես եղել. «Շենքի բակում ջրավազան էր գոյացել, ես նայում էի՝ զգում էի, որ այստեղ ինչ-որ անտրամաբանական բան կա, որովհետև ոնց որ թե թեքությունը կա, ոնց որ թե գետի հունն այնպես է, որ պարտադիր չէ, որ դա տեղի ունենա, և հետո տեսանք, որ մեր սիրելի հայրենակիցներն իրենց բակում ավտոտնակներ են կառուցել, և ավտոտնակները կառուցված են այնպես, որ այդ ավտոտնակները դարձել են ամբարտակ: Վերևի հատվածից ջուրը մտել է փողոց, եկել՝ ներքևի հատվածում մտել բակ, և բակից դուրս գալու տեղ պարզապես չի ունեցել, և մեծ էր հավանականությունը (հետո մոռացանք դե յուրե ստուգենք), որ այդ կառույցների մի զգալի մասն ապօրինի էր:

Ավտոտնակների արանքում գոնե մի մետր տեղ չի եղել, դե, մենք էլ սարքելիս ցեմենտ, բետոն, ամատուրա էնքան շատ ենք… Գարաժը հատկապես շատ կարևոր ինստիտուտ է, ու դա տեղի էր ունեցել: Գնացինք, պարզ է, հնարավորն արեցինք, որ մարդկանց աջակցենք, էլի կանենք, բայց էդ պահին դե տեղը չէր, հաջորդ օրն էլ, բայց մեկս չի ասի՝ ժողովուրդ, բայց ինչքա՞ն, էլի: Վերադառնանք ծախսերին. Հիմա եթե այդ ավտոտնակները քաղաքաշինական նորմերին համապատասխան լինեին, ժողովուրդը, պետությունը նախ՝ էդքան վնաս չէր կրի, երկրորդ՝ այդքան լրացուցիչ ծախս անելու անհրաժեշտություն չէր ունենա: Նույն ավտոտնակների տերերն ասում էին՝ բա մեր ավտոների հարցն ինչ է լինելու, և մենք էլ ավտոմեքենաներին էլ վճարում իրականացրեցինք:

Կներեք, բայց սա էլ ապապետական մոտեցում է: Նախ՝ պետությունը պետք է թույլ չտար, որ այդտեղ գարաժ լիներ, երկրորդ՝ երբ դա տեղի է ունեցել, պետությունն այն դեպքում է պետություն, երբ ասում է՝ գիտե՞ս ինչ, հարգելի քաղաքացի, դու քո արարքի հետևանքի պատասխանատվությունը պետք է կրես: Քանի դեռ մենք ուժ չունենք այս ասելու մեր քաղաքացուն, մենք պետություն չենք դառնա: Դա արդարադատության հետ էլ է կապված. Մարդը գնում՝ տունը գրավ է դնում, բանկից վարկ է վերցնում, տանում՝ բիզնես է դնում, իր մտածած բիզնեսով, այդ բիզնեսը չի հաջողում, հետո ես գնում եմ մարզ, ինձ տալիս է նամակ, ասում է՝ սենց, սենց, տունս կորցնում եմ, խնդրում եմ տունս պահեք: Ուզում եմ խոստովանել, որ չի եղել դեպք, որ մարդուն ասեմ՝ հարգելի քաղաքացի, մեր իրականության մեջ էլ այդ բանը չկա, որ ցանկացած բիզնես ռիսկ է»:

Փաշինյանի խոսքով՝ բիզնեսի հաջողել-չհաջողելը կախված է բիզնես անողից. «Անընդհատ այդ թեման գնում է, որ գիտեք՝ սնանկացանք: Մենք՝ որպես պետություն, մինչև հիմա այդ ուժը, այդ համարձակությունը չունենք, որ քաղաքացուն ասենք՝ հարգելի քաղաքացի, մեզնից յուրաքանչյուրն իր կայացրած որոշումների պատասխանատվությունը պետք է կրի: Դրա համար էլ տենց է: Ոչ մեկն իր կայացրած որոշումների պատասխանատվությունը չի կրում: Արդարադատության ոլորտն էլ է դրա հետ կապված: Այո, մենք, դեպքեր է լինում, որ սուբսիդավորում, օգնում ենք: Այն մարդը, որ ասում է՝ ես իմ գործը կազմակերպել եմ, հաջողության եմ հասել, էս իմ մրցակիցը հաջողության չի հասել, դուք հիմա իրան սուբսիդավորում, օգնում եք, որովհետև ինքը գալիս՝ ցույց է անում, սպառնում է, որ կինքնահրկիզվի, ես ինձ համար աշխատում եմ, հարկեր եմ վճարում, խնդիր չունեմ, դուք ինչո՞ւ եք ինձ համար խնդիր ստեղծում, այդ մրցակցությունն էլ, չէ՞, պետք է առողջ լինի: Երբ ասում եմ, որ ապապետական ենք, սա նկատի ունեմ: Մենք մեր ձեռքով մեր պետությունը քանդում ենք: Սա է ճշմարտությունը»:

Մանրամասները՝ տեսանյութում