«Դա նվեր էր Փաշինյանին. իրենց մոտ լավ է ստացվում հայ ժողովրդին ֆռռացնելը». Արամայիս Աղաբեկյան

Արցախի Հանրապետության ԱԺ պատգամավոր Արամայիս Աղաբեկյանը շոու է համարում իշխանությունների այն հայտարարությունները, թե օգոստոսի 8-ից խաղաղություն է հաստատվել:

«Դա շոու է նրանով, որ նախ՝ այդ փաստաթղթի բովանդակությանը որ նայում ես՝ կարելի է ցանկացած կետ 10 տարբեր ձևերով մեկնաբանել: Օրինակ՝ երբ ասում են՝ անխոչընդոտ ճանապարհ, ամեն մեկն իր մեկնաբանությունն է տալիս անխոչընդոտ ճանապարհի: Արարատ Միրզոյանը Պետրոսի մոտ հարցազրույց է տալիս, լրիվ ուրիշ երանգներ է տալիս այդ կետին: Ալիևը գնում է Ադրբեջան և ասում, որ՝ որևէ հայ մաքսավորի չպետք է տեսնենք, հայերի հետ չպետք է առնչություն ունենանք այնտեղ, դրա հետ մեկտեղ՝ նաև նշում է, որ Ադրբեջանի տարածքում օտարերկրյա ներկայություն չի լինելու: Քարոզ է տարվում, թե ամերիկյան կողմի պարտադրանքով փաստաթուղթ է սա, բայց նախաստորագրման մասին որպես տերմին՝ առաջինը խոսել է Ալիևը, ինքն է ասել, որ պատրաստ են գնալ նախաստորագրման»,- 168TV-ի «Ռեվյու» հաղորդման ընթացքում ասաց նա:

«Սա Փաշինյանի համար էր նվեր, որպեսզի 2026-ի ընտրություններում օգտագործի և թափահարի՝ որպես ձեռքբերում, ընտրություններում վերընտրվելու համար, որովհետև Փաշինյանն Ալիևի համար հարմար իշխանություն է»,- նշեց նա՝ ընդգծելով, որ ադրբեջանական քարոզչամեքենան պետք է միլիարդավոր դոլարներ ծախսեր, որպեսզի հնարավորություն ունենար Հայաստանի ներսում այնպիսի թեզեր տարածել, ինչպես դա անում են իշխանական լրատվամիջոցները:

Արարատ Միրզոյանը նշել է, որ դիմել են ԵԱՀԿ ՄԽ լուծարման համար, քանի որ համարում են, որ արցախյան համակարտությունն ավարտվել է և այլևս երկու երկրների միջև խաղաղություն է: Ըստ Արարատ Միրզոյանի՝ խաղաղությունը հաստատված է, և «եթե ԵԱՀԿ ՄԽ-ն լուծարելու համար սպասեին խաղաղության պայմանագրի ստորագրմանը, ապա աշխարհը կմտածեր, թե Հայաստանն ուզում է էլի ֆռռացնել»:

Արամայիս Աղաբեկյանի դիտարկմամբ՝ իշխանություններն ավելի շատ մտածում են՝ ոնց հայ ժողովրդին ֆռռացնեն, քան թե՝ աշխարհը չմտածի. «Իրենց մոտ շատ լավ ստացվում է հայ ժողովրդին ֆռռացնելը: Մինչև այս պահն է, իհարկե, ստացվում: Հուսով եմ, որ այն ասացվածքը, որ՝ ժողովրդին կարելի է ինչ-որ մի ժամանակ խաբել, բայց մշտապես խաբել չի կարելի, ի վերջո աշխատելու է: Այս պահին ֆռռացնողի կարգավիճակում էլի իրենք են, բայց աշխարհի մակարդակում ֆռռացնել իրենց մոտ չի ստացվում: Այս մարդիկ, եթե ինչ-որ մի բան կարմիր գիծ են հայտարարում, արդեն վախեցեք, քանի որ դա նշանակում է, որ հաստատ վաղը չէ մյուս օրն այդ կարմիր գիծը ջնջվելու է: Ինչ ուզում են անել, նախօրոք ասում են, որ այդպիսի բան չի լինելու, հետո անում են դա»:

Անդրադառնալով Փաշինյանի այն հայտարարությանը, թե՝ եթե ժողովուրդը հեղափոխություն չի արել, ուրեմն՝ համաձայն է, որ առանց Արցախի հարցը փակելու խաղաղություն հնարավոր չէ, նա նկատեց, որ ժողովուրդն ինքն իրենով քաղաքական կատեգորիա չէ. «Քաղաքական կատեգորիա է ժողովրդից ծնված առաջնորդը, իսկ այսօր, ըստ նրա՝ Հայաստանում քաղբանտարկյալների պակաս չկա… Հիմա, եթե քաղաքական առաջնորդներին լցնես բանտերը, հետո պնդում անես, թե ոչ ոք Արցախի հարց չի բարձրացնում, այո, այդպիսի մանիպուլյացիա կարող ես անել: Որ էլիտաները գործնական քայլեր են փորձում իրականացնել, լցնում ես բանտերը կամ էլ այնպիսի տեղեկատվական արշավ ես սկսում այդ մարդկանց դեմ, որ ամեն ինչ արվում է այդ մարդկանց ներկայացնելու որպես շպիոններ, այլ երկրի ծառաներ…»:

Արամայիս Աղաբեկյանը Փաշինյանի որևէ հայտարարությունից չի զարմանում, նրան համարում է պատեհապաշտ. «Ինքը շատ հանգիստ կարող է օրերի տարբերությամբ դուրս գալ և իրեն եթե ձեռնտու է այդ պահին որևէ հայտարարություն անել, անի:

Ժամանակին Բայդենի վարչակազմի վերաբերյալ ասում էին՝ պատմական մեծ ձեռքբերում են ունեցել, ռազմավարական պայմանագիր են ստորագրել, հիմա ասում է՝ մեր վիճակը շատ վատ էր: Դրա համար պետք է հասկանալ, որ մարդը միայն մեկ խնդիր է լուծում՝ իշխանությունը պահելու… Նիկոլ Փաշինյանը բոլորին ձեռնտու է, ինքը հայ ժողովրդի և ՀՀ հաշվին դրսի բոլոր խաղացողներին կերակրում է և դրա հաշվին լոյալությունը պահում է: Օգոստոսի 8-ի դեպքերից հետո եկավ, ասաց՝ ռուսական կողմը մտահոգվելու ոչինչ չունի, մենք երկաթուղային մասով կխոսենք, կհասկանանք, մի քիչ հետո Միշուստինը եկավ, խոսեցին, հասկացան: Ասաց՝ պարսկական կողմը մտահոգվելու բան չունի, բայց մտահոգություններ լինելու են, որովհետև իրենք, ի տարբերություն հայ ժողովրդի՝ Փաշինյանին ավելի լավ են ճանաչում, գիտեն՝ ինչերի է ընդունակ, և շատ լավ հասկանում են, որ երբ վզից սեղմելու հարց առաջանա, աշխարհաքաղաքական որ կետից ուժեղ սեղմեն՝ այդ կողմ է թեքվելու»:

Մանրամասները՝ 168TV-ի տեսանյութում