Կառլսոնը կրկին Մոսկվայում է, նա զրուցել է ՌԴ արտգործնախարարի հետ
Ամերիկացի լրագրող և հեռուստահաղորդավար Թաքեր Կառլսոնը կրկին Մոսկվա է մեկնել ՌԴ արտգործնախարար Սերգեյ Լավրովի հետ հարցազրույց անելու համար։ Նա այդ մասին հայտնել է X սոցցանցում՝ գրառմանը կից հրապարակելով Կրեմլի ֆոնին նկարահանված տեսանյութը:
Տեսանյութում Կառլսոնն ասում է, որ աշխարհը միջուկային պատերազմի շեմին է, ինչին, ըստ նրա, նպաստում է ԱՄՆ վարչակազմի որոշումը՝ վերացնել Կիևի կողմից ռուսական տարածքը հարվածելու համար հեռահար զենքի օգտագործման սահմանափակումները։ Նա ընդգծել է, որ ամերիկացիների մեծ մասը չի գիտակցում, որ իրենց երկիրը փաստացի ներգրավված է Ռուսաստանի հետ պատերազմի մեջ։
Կառլսոնի խոսքով` Մոսկվայի և Վաշինգտոնի հարաբերությունների խզման պատճառով ԱՄՆ քաղաքացիները զրկված են ռուսական տեսակետը լսելու հնարավորությունից։
«Մենք որոշեցինք Լավրովից պարզել` որքանով է իրական Ռուսաստանի և ԱՄՆ-ի միջև աննախադեպ հակամարտության վտանգը։ Մենք քննարկել ենք նաև այն հարցը, թե արդյոք հնարավոր է Ռուսաստանին Չինաստանի ուղեծրից վերադարձնել դեպի Արևմուտք, թե ներկայիս դաշինքն անշրջելի է»,- պատմել է լրագրողը։
Կառլսոնը նախարարին հարցրել է՝ արդյոք Դոնալդ Թրամփի հաղթանակը կարող է հանգեցնել հակամարտության ավարտի, որն ազդում է համաշխարհային տնտեսության վրա, փոխում աշխարհակարգը և վտանգում մարդկանց կյանքն ամբողջ աշխարհում։
Լրագրողը հարցազրույցն անվանել է «գրավիչ» և հայտարարել դրա մոտալուտ թողարկման մասին։
Սա Կառլսոնի առաջին այցը չէ Ռուսաստան։ 2024 թվականի փետրվարին նա հարցազրույց էր վերցրել ՌԴ նախագահ Վլադիմիր Պուտինից, իսկ ապրիլին՝ «ВКонтакте»-ի և «Telegram»-ի հիմնադիր Պավել Դուրովից։ Նույն ամսում Կառլսոնը հարցազրույց էր անկացրել նաև փիլիսոփա Ալեքսանդր Դուգինի հետ, որին «ռուսական աշխարհի գաղափարախոս» են անվանում։
