Անկախանալ Ռուսաստանից, կախվել Թուրքիայից. Փաշինյանը երկիրը սրան է տանում. Նաիրի Սարգսյան
«Զրույցներ պետության մասին» վերնագրով կարճ տեսանյութերի շարքում Հայաստանը ներկայացնող Նիկոլ Փաշինյանն այսօր նորից փորձեց քաղաքացիների համար գործնական աշխատանք կատարել և ցույց տալ, թե ինչ է ինքն ուզում անել Տավուշի և ամբողջ Հայաստանի հետ։
«Ինքնիշխանությունը, իրավունքը և պարտականությունը, նույնիսկ պետականությունը, առանց տարածքի կոնկրետության, լղոզվում են, դառնում են սակավ կիրառելի կամ ոչ կիրառելի, կամ նույնիսկ անկենսունակ և սակավ կենսունակ»,- ասաց Փաշինյանը և խոսքը պատկերավոր դարձնելու համար շշում մնացած ջուրը դատարկեց սեղանի վրա։
168 TV-ի «Ռեվյու» հաղորդաշարի եթերում Աուդիտորների պալատի նախագահ Նաիրի Սարգսյանը, խոսելով Հայաստանի ինքնիշխանության պահպանման մասին հայտարարություններ անող Փաշինյանի այս եթերի, նրա կողմից իրագործվող քայլերի մասին, ընդգծեց՝ այս մարդու արած ցանկացած հայտարարություն պետք է դիտարկել իրականացրած քայլերի համեմատության մեջ, իսկ դրանք ցույց են տալիս, որ Փաշինյանի իրագործած քայլերի արդյունքում ունենալու ենք Ալեքսանդրապոլի պայմանագիր: Թուրքիայի ենթակայության տակ գտնվող, առանց բանակի Հայաստան, որը կախյալ կլինի նաև ռուսական գազի ադրբեջանական փաթեթավորումից՝ իրենց ձևակերպմամբ՝ ադրբեջանական գազից։
«Մենք սրանով մեր անկախության վրա տապանաքար ենք դնում։ Ինչ վերաբերում է նրա այսօրվա եթերին, ապա դա հոգեկան հիվանդի եթեր էր»,- ասաց Սարգսյանը։
Մեր զրուցակիցը Փաշինյանի որդեգրած արտաքին քաղաքականությունը և դրա վերջնարդյունքն այսպես նկարագրեց՝ անկախանալ Ռուսաստանից և կախվածության մեջ հայտնվել Թուրքիայից: Բայց սրա դեմ կա հասարակության ընդգծված դիմադրություն, ինչը պետք է կարողանալ քաղաքական կապիտալիզացիայի ենթարկել։
«Իրավիճակն օրհասական է, բաժանվում ենք երկու մասի՝ հայրենապահպաններ և հայրենաքանդներ, ուստի նման պայմաններում այնքան էլ ճիշտ չէ ասել քաղաքական կապիտալիզացիա, քաղաքական եզրույթից էլ կարելի է հրաժարվել»,- ասաց Սարգսյանը։
Մանրամասները՝ տեսանյութում։
