Հավի մսով նրբաբլիթներ՝ սնկային սոուսով
Բաղադրիչները
- 350 գ հավի փափկամիս
- 1-2 հատ ձու
- 100 մլ կաթ
- 1 ճ.գ. թթվասեր
- 1-1,5 ճ.գ. սպիտակաձավար
- աղ ու չորացրած կանաչի՝ ըստ ճաշակի
- բուսական յուղ՝ տապակելու համար
Սոուսի համար
- 3 ճ.գ. թթվասեր
- 1 ճ.գ. մայոնեզ
- 100 գ շամպինյոն
- 1 գլուխ սոխ
- 1 պճեղ սխտոր
- աղ
- բուսական յուղ՝ տապակելու համար
Պատրաստման եղանակը
Հավի փափկամիսը լվացեք, չորացրեք, աղացեք: Աղացած մսին ավելացրեք ձուն կամ ձվերը, համեմունքները, խառնեք:
Ավելացրեք սպիտակաձավարը, կաթը և 1 ճ.գ. թթվասերը: Լավ խառնեք ու 20 րոպե թողեք, որպեսզի սպիտակաձավարը փքվի: Եթե խմորը շատ պինդ ստացվի, այն կարող եք բացել կաթով:
Թավայի մեջ լցրեք բուսական յուղը: Կենտրոնում խմորից մի բաժին դրեք ու հավասարաչափ բաշխեք թավայի մակերեսին, որպեսզի միջին հաստության նրբաբլիթ ստացվի:
Նրբաբլիթը միջին ուժգնության կրակի վրա տապակեք, նախ մի կողմը՝ 1-1,5 րոպե, ապա՝ մյուսը: Պատրաստի նրբաբլիթները տեղադրեք ափսեի մեջ: Պետք է 4 նրբաբլիթ ստացվի:
Սնկային սոուսը պատրաստելու համար մանր կտրատեք սոխն ու շամպինյոնները:
Սոխը բուսական յուղի մեջ տապակեք, աղ արեք: Ավելացրեք շամպինյոնը:
Շամպինյոնը սոխի հետ տապակեք մինչև բաց ոսկեգույն երանգ ստանալը: Սունկը լցրեք պնակի մեջ, հովացրեք:
Սնկին խառնեք թթվասերը, մայոնեզն ու ճզմած սխտորը: Խառնեք: Սոուսը պատրաստ է:
Հավի մսով նրբաբլիթները մատուցեք տաք կամ գոլ վիճակում սնկային սոուսի հետ մեկտեղ:
