Reuters․ ՆԱՏՕ-ում հայտարարել են Եվրոպայում Ռուսաստանի հիբրիդային հարձակումների ուժեղացման մասին, բայց հարձակման սպառնալիք չեն տեսել
ՆԱՏՕ-ի ներկայացուցիչը հայտարարել է, որ Ռուսաստանը ուժեղացնում է Եվրոպայում հիբրիդային ակտիվությունը, սակայն ներկայումս դաշինքը չի տեսնում բլոկի երկրների վրա հարձակման անմիջական սպառնալիք, հայտնում է Reuters գործակալությունը։
«Չնայած այն բանին, որ Ռուսաստանը բախվում է Ուկրաինայի կողմից շատ լուրջ դիմադրության, այն մեծացնում է հարձակումները Ուկրաինայի վրա, ինչպես նաև հիբրիդային գործողությունները Եվրոպայում», — ասել է ՆԱՏՕ-ի ներկայացուցիչը։
Ըստ նրա, դաշինքը շարունակում է ուշադիր հետևել տարբեր սպառնալիքներին։ «Այս պահին մենք չենք տեսնում հարձակման անմիջական սպառնալիք», — ընդգծել է նա՝ հավելելով, որ ՆԱՏՕ-ն շարունակում է աջակցել Ուկրաինային և շուրջօրյա աշխատում է իր մոտ մեկ միլիարդ բնակչի անվտանգության ապահովման ուղղությամբ։
Նախօրեին Լեհաստանի վարչապետ Դոնալդ Տուսկը հայտարարել էր, որ Վարշավան և ՆԱՏՕ-ն պետք է պատրաստ լինեն իրադարձությունների զարգացման տարբեր սցենարների։ Ըստ նրա, չի կարելի բացառել Ռուսաստանի կողմից դաշինքի անդամ ցանկացած երկրի դեմ սադրանքի հնարավորությունը։
Երեքշաբթի օրը ԿՀՎ տնօրեն Ջոն Ռեթքլիֆը կարճատև այց է կատարել Ռուսաստան, որտեղ հանդիպել է հետախուզական կառույցներից ռուսաստանցի գործընկերների հետ։ Reuters-ի իրավիճակին ծանոթ երկու աղբյուրների տվյալներով, Ռեթքլիֆը հանդիպման ընթացքում բարձրացրել է ՆԱՏՕ-ի երկրներից մեկի դեմ Ռուսաստանի հնարավոր գործողության հարցը։ Միևնույն ժամանակ հայտնի չէ, թե արդյոք դա է եղել նրա այցի հիմնական նպատակը։
