«Ադրբեջանը կարող է Արցախը կտրել. Հայաստանը պետք է կոշտացնի իր դիրքորոշումը». Արթուր Եղիազարյան
«Թուրքերի հիմնական նպատակը թուրքախոս ամբողջ աշխարհը միավորելն է: Ժամանակաշրջանը բարենպաստ է իրենց համար. աշխարհի նոր բաժանում է տեղի ունենում, և իրենք նպատակաուղղված փորձում են իրենց խնդիրները լուծել»,- 168TV-ի «Ռեվյու» հաղորդման ընթացքում ասաց ռազմական փորձագետ Արթուր Եղիազարյանը:
Նրա խոսքով՝ թուրք-ադրբեջանական վերջին զորավարժություններն էլ վերոնշյալ համատեքստում պետք է դիտարկել. «Վերջին զորավարժություններում հստակ երևում է երկու գործոն՝ զորավարժությունների անցկացման վայրերը, որոնք հստակ հուշում են, որ դրանք Իրանի հետ են կապված, նաև մեզ համար են վտանգ ներկայացնում այս զորավարժությունները: Թուրքերը, օգտվելով այս իրավիճակից, փորձելու են առավելագույնը քաղել՝ տարածքներ յուրացնելու ճանապարհով»:
Հարցին՝ հաշվի առնելով նաև Իրանում առկա լարված իրավիճակը՝ հնարավո՞ր է թուրք-ադրբեջանական տանդեմի Հայաստանի վրա հարձակումով՝ փորձեն Իրանին ներքաշել պատերազմի մեջ, թե՞ նման ռիսկի չեն գնա, նա պատասխանեց. «Իրանի այսօրվա ներքին հարցերը արտաքին ծագում ունեն: Իրանը բազմազգ է, բայց դա չի խանգարել, որ այդ երկրում լինի միասնական մտածողություն: Հիմա, կարծես, ազգային հարցեր են բարձրացվում և փորձում են պառակտել այդ դաշտում: Բացահայտ զգացվում է արտաքին ծագումը, հատկապես թուրքական գործոնը: Իսրայելի աջակցությունն Ադրբեջանին ևս այս համատեքստում է: Եթե այդ ազդակը լինի՝ որպես գործիք ծառայելու են Ադրբեջանն ու Թուրքիան: Մենք էլ պետք է մտահոգվենք, քանի որ նրանք կարող են նախատեսել նվազագույն և առավելագույն արդյունք, այսինքն՝ նվազագույնը՝ Հայաստանի հաշվին, առավելագույնը՝ Իրանի»:
Սյունիքով միջանցքի գոյությունը, ըստ նրա, ձեռնտու չէ Իրանին և Ռուսաստանին. «Ռուսաստանը շահագրգռված չէ այդ հարցում, բայց եթե չկարողանա այդ գործընթացների վրա ազդել, ամեն դեպքում, այդ միջանցքը եթե լինի, իր ազդեցության տակ լինի: Իսկ Իրանը բացահայտ հայտարարել է, որ իր համար կոնկրետ Սյունիքի տարածքը կարմիր գիծ է, և ինքը չի հանդուրժի դա, այսինքն՝ հասկացրեց, որ նաև ռազմական առումով կմիջամտի, եթե հանկարծ թուրք-ադրբեջանական տանդեմը փորձի ներխուժել Սյունիք: Այսինքն՝ արդեն ներխուժած են Սյունիքի տարածք, բայց միջանցք չի ձևավորվել: Մյուս կողմից՝ հաշվի առնելով Իրանի ներքին գործընթացները, կարող են հենց այդ պահն օգտագործել, որ Իրանը չկարողանա ազդել, և փորձեն այս խնդիրը ռազմական ճանապարհով լուծել»:
Անդրադառնալով Արցախում ադրբեջանական կողմի սադրանքներին, նա հետևյալն ասաց. «Քանի որ Հայաստանն այլևս ազգերի ինքնորոշման իրավունքը չի խաղարկում միջազգային հարթակում, սա Ադրբեջանը կարող է ընկալել՝ որպես Հայաստանի կողմից Արցախից ձեռք քաշելու գործընթաց, և դա դիտել՝ որպես իր ներքին խնդիր: Այսպիսի միջադեպերով կարող են մի օր էլ հասնել այնտեղ, որ առաջարկեն ռուս խաղաղապահների հետ համատեղ հսկել, և այսպես կամաց-կամաց կտրեն: Ադրբեջանը կարող է Արցախը կտրել. Հայաստանը պետք է կոշտացնի իր դիրքորոշումը»:
Մանրամասները՝ 168TV-ի տեսանյութում
