«Ամեն հաջորդ օր ՀՀ անապահով քաղաքացիներն ապրում են ավելի վատ, քան դրա նախորդ օրը». Թադևոս Ավետիսյան
«Հայաստան» խմբակցության պատգամավոր, տնտեսագետ Թադևոս Ավետիսյանի գնահատմամբ՝ աղքատացման բոլոր գործոններն ուժգնանում են, իսկ գներն աճում են ավելի արագ ու բարձր տեմպով, քան անապահով խավերի եկամուտները:
«Դա այս իշխանությանը բնութագրող սկզբունքն է. իրենց սոցիալական քաղաքականության գնահատականը հետևյալն է՝ ամեն հաջորդ օր ՀՀ անապահով քաղաքացիները ապրում են ավելի վատ, քան դրա նախորդ օրը: Դա կլինի 2020, 2021, թե՝ 2022 թ.: Նայելով պետական բյուջեն, որը շուտով կհաստատեն, վստահեցնում եմ՝ նույնն ունենալու ենք 2023 թ.-ին, եթե, Աստված չանի, այս իշխանությունն ունենանք»,- 168.am-ի հետ զրույցում պարզաբանեց պատգամավորը՝ անդրադառնալով ԱՎԾ հրապարակած աղքատության ցուցանիշներին։
Թադևոս Ավետիսյանն առկա իրավիճակի պատճառներից է համարում տնտեսական կայուն զարգացման հնարավորությունների տապալումը՝ գյուղատնտեսությունից մինչև արդյունաբերություն՝ շեշտելով, որ տնտեսության իրական հատվածում հետևողականորեն կրճատվում են օտարերկրյա ներդրումները: Վերջինի առնչությամբ էլ ընդգծում է անվտանգային ռիսկերի առկայությունը:
Հիշեցնենք՝ 2018թ. Հայաստանում պաշտոնապես աղքատ էր բնակչության 23,5 տոկոսը, իսկ օրերս հրապարակված տվյալներով՝ 2021թ. աղքատ է եղել բնակչության 26,5 տոկոսը, ծայրահեղ աղքատությունը կազմել է 1,5 տոկոս։ Աղքատության մակարդակը մեր երկրում, ըստ աղքատության վերին գծի, հասնում է 45,7 տոկոսի։
Այս համատեսքտում անդրադառնալով 2023 թվականի հունվարից 9 դրամով թանկացող ջրի սակագնին՝ տնտեսագետը հիշեցրեց. «Ասում էին՝ ձևը գիտենք, տեղը գիտենք. գանք՝ գազի սակագինն է նվազելու. ուռճացում կա, գերծախսեր կան, նույնը ջրի սակագնի առումով. այսօրվա վարչապետն էր խոստանում, թե մինչև «Քրիստոսի գալը» ջրի սակագինը չի բարձրանա: Սակայն տեսնում ենք փաստը: Ինչ ասում են, դրա ուղիղ հակառակը կարելի է պատկերացնել և ըստ այդմ դիրքավորվել»:
Թադևոս Ավետիսյանը, սակայն, կարծում է՝ դրամի արժևորումը դոլարի նկատմամբ իրականում հիմքեր ստեղծել է ոչ միայն էլեկտրաէներգիայի սակագնի նվազման առնչությամբ, այլև մի շարք առաջին անհրաժեշտության ապրանքների՝ օրինակ, դիզվառելիք, գազ, բենզին:
«Մեր գնահատմամբ՝ այսօրվա գներն ամբողջությամբ չեն արտահայտում այս դրամի արժևորումը և, ըստ էության, ավելի ցածր պետք է լինեին: Եթե հակառակը լիներ՝ դրամն արժեզրկվեր 20-25 տոկոսով, վստահաբար, մենք տեսնելու էինք լրացուցիչ գնաճ և սակագների աճ, այդ թվում՝ հանրային ծառայությունների ոլորտում:
Չենք տեսնում, որովհետև եթե նայում ես կարգավորող մարմնի հաշվետվությունները ոլորտների վերաբերյալ, դրանք, կարծես, դարձել են ոչ թե պետական շահն առաջ մղող մարմիններ, այլ այդ ոլորտների տնտեսվարողների յուրատեսակ փաստաբաններ»,- հավելեց նա:
Հիշեցնենք՝ ՀԾԿՀ-ից նշել էին, որ խմելու ջրի սակագինը սոցիալապես անապահով բաժանորդների համար 2023 թվականին կմնա անփոփոխ՝ 180 դրամ, իսկ մյուս բաժանորդների համար՝ 208,42 դրամ:
2022 թվականի օգոստոսի 8-ին «Վեոլիա Ջուր» ընկերությունը հանձնաժողով էր ներկայացրել խմելու ջրի մատակարարման և ջրահեռացման (կեղտաջրերի մաքրման) ծառայությունների մատուցման 2023 թվականի սակագների վերանայման (ճշգրտման) հայտ:
ՀԾԿՀ նախագահ Գարեգին Բաղրամյանը Կառավարության նիստից հետո լրագրողների հետ զրույցում տեղեկացրել էր նաև, որ վերանայվում են էլեկտրաէներգիայի սակագները
Հիշեցնենք նաև, որ 168.am-ը նոյեմբերին գրավոր հարցմամբ Հանրային ծառայությունները կարգավորող հանձնաժողովի նախագահ Գարեգին Բաղրամյանից հետաքրքրվել էր, թե հանձնաժողովում ի՞նչ ուսումնասիրություններ կան դրամի արժևորման հետևանքով էլեկտրաէներգիայի սակագնի նվազման առնչությամբ:
Ի պատասխան՝ ՀԾԿՀ-ից նշել էին՝ Էլեկտրաէներգետիկական և գազամատակարարման համակարգերի ընկերությունների սակագների վրա ազդող գործոնները բազմազան են, և ԱՄՆ դոլարի նկատմամբ դրամի փոխարժեքի փոփոխությունը դրանցից միայն մեկն է:
Հանձնաժողովի անդամ Սերգեյ Աղինյանը տեղեկացրել էր, որ հանձնաժողովը 2022 թվականի սեպտեմբերի 15-ից սեփական նախաձեռնությամբ սկսել է էլեկտրաէներգետիկական համակարգի ընկերություններից առաքվող էլեկտրական էներգիայի, էլեկտրաէներգետիկական շուկային մատուցվող ծառայությունների սակագների, «Հայաստանի էլեկտրական ցանցեր» ՓԲԸ-ի սակագնային մարժայի և էլեկտրական էներգիայի բաշխման ծառայության մատուցման սակագների վերանայման գործընթացը, որի արդյունքներով կտեղեկացնի վերջնական սպառողներին վաճառվող էլեկտրական էներգիայի սակագների վերանայման անհրաժեշտության կամ դրա բացակայության մասին։
Ուսումնասիրությունները նախատեսվում է ավարտել մինչև տարեվերջ և հարցը սահմանված կարգով ներկայացնել հանձնաժողովի նիստի քննարկմանը։
