Առաջիկա օրերին պլանավորված չէ ԱՄՆ-ի ու ՌԴ-ի նախագահների հանդիպում. Սպիտակ տուն
Ռուսական ИТАР-ТАСС լրատվական գործակալության փոխանցմամբ` առաջիկա օրերին պլանավորված չէ ԱՄՆ-ի ու Ռուսաստանի նախագահների հանդիպում, թեև բացառված չէ նրանց շփումը: Այս մասին լրագրողների հետ ճեպազրույցում հայտարարել է ԱՄՆ նախագահի` արտաքին քաղաքական հարցերով խորհրդական Բեն Ռհոդսը:
Նա ընդգծել է, որ իրենք չեն ակնկալում, որ տեղի կունենա Բարաք Օբամա – Վլադիմիր Պուտին պաշտոնական հանդիպում: Դրա հետ մեկտեղ Ռհոդսը բնական է համարել, որ նախագահները հնարավորություն կունենան միմյանց հետ շփվելու Ֆրանսիայում առաջնորդների ընդհանուր ճաշի ժամանակ:
Ռհոդսը հավելել է, որ Ուկրաինայի նախագահական ընտրություններից հետո ԱՄՆ-ը նկատում է այդ երկրում լարվածության նվազման բարենպաստ հնարավորություն: Հունիսի 6-ին Ֆրանսիայում նշելու են Նորմանդիայում դաշնակցային զորքերի ափհանման (Երկրորդ ճակատի բացման) 70-ամյակը (1944 թվական):
