Ժամանակակից գործիքներ` կրթությունն էլ ավելի մատչելի և որակյալ դարձնելու

ՀՀ կրթության և գիտության նախարարի պաշտոնակատար Արմեն Աշոտյանը, Samsung Electronics  ընկերության Կովկասյան գրասենյակի ղեկավար Սանգ Պիլ Չանը և  «Նոր սերնդի դպրոց» հասարակական կազմակերպության նախագահ Սուրեն Ալոյանն այսօր   ստորագրել են համագործակցության եռակողմ  հուշագիր՝ աշխարհում արդեն լայն տարածում ունեցող Smart School (խելացի դասասենյակ) ծրագրի ներդրման վերաբերյալ: Ողջունելով հուշագրի ստորագրումը` Արմեն Աշոտյանը նշել է, որ այն նպատակ ունի կրթության ոլորտում կյանքի կոչել Samsung-ի սոցիալական պատասխանատվության քաղաքականությունը:

«Samsung-ի լուծումները` ժամանակակից կրթական միջավայրի տեսանկյունից, համարվում են աշխարհում լավագույններից մեկը և շնորհակալ եմ, որ աշխարհահռչակ բրենդի համար որպես գերակա ուղղություն ընտրվել է Հայաստանում նման կրթական ծրագրի իրականացումը:

Այս հուշագիրը թույլ կտա Հայաստանի դպրոցներից և բուհերից մեկում ներդնել Samsung-ի նոր կրթական միջավայր, տեխնիկական նոր լուծումները:

Տեսանելի կերպով դա կարտահայտվի նոր պլանշետների, էլեկտրոնային գրատախտակների, այսպես ասած, խելացի դասարանի ներդրմամբ, որն իրականում փոխկապակցված էլեկտրոնային միջավայր է, որը թույլ է տալու կրթությունը դարձնել ավելի ինտերակտիվ, հետաքրքիր, որակյալ, ինչպես նաև  արագացնել և դյուրացնել ուսումնական նյութի ընկալումը»,-նշել է նախարարը` հույս հայտնելով, որ սա Samsung-ի առաջին, բայց ոչ վերջին ներդրումն է կրթության ոլորտում: Նախարարն անդրադարձել է նաև Dasaran.am-ի հետ համագործակցությանը` ընդգծելով, որ  վերոնշյալ նախագծի հետ նախարարության աշխատանքն ունի արդեն մի քանի տարվա պատմություն:

«Միասնական պետք է ներդնենք ժամանակակից տեխնիկական գործիքներ` կրթությունն էլ ավելի մատչելի և որակյալ դարձնելու համար»,-նշել է նախարարը:

Անդրադառնալով այն հարցին, թե ինչու է ծրագրում ներգարվվել հատկապես «Ֆոտոն» վարժարանը և ԵՊՀ-ն, Ա. Աշոտյանը նշել է, որ ի սկզբանե նպատակ կար տեխնիկական առաջընթացը գրանցել ոչ միայն մայրաքաղաքում, այլ նաև մարզերում: ««Ֆոտոնը» մեր լավագույն դպրոցներից մեկն է, որի շրջանավարտները  բազմաթիվ մեդալներ են բերում միջազգային օլիմպիադաներից, և այս վարժարանը կարևոր կրթական հաստատություն է Շիրակի մարզում:

ԵՊՀ-ում 30-40 հոգանոց լսարանը կկառուցվի ֆիզմաթ ամբիոններից մեկում` իր բոլոր տեխնիկական լուծումներով: Կստեղծվի նոր կամ արդեն բուհի կողմից ստեղծված կրթական բովանդակություն` իրենց մասնագիտություններով»,-նշել է նախարարը:
Նշենք, որ Smart School (խելացի դասասենյակ) ծրագիրն իրենից ներկայացնում է ինտերակտիվ կապ դասախոսի /ուսուցչի և ուսանողի/աշակերտի միջև` Samsung-ի նորագույն տեխնոլոգիաների և սարքավորումների միջոցով։

ՀՀ կրթության և գիտության նախարարություն