Փոստանջյանի հարցը «սարքած» չէր` Արփինե Հովհաննիսյան

ԵԽԽՎ հայաստանյան պատվիրակության անդամ Արփինե Հովհաննիսյանը ԳԱԼԱ-ի լրագրողի հետ զրույցում անդրադարձել է ստրասբուրգյան զարգացումներին եւ ԱԺ Ժառանգություն խմբակցության պատգամավոր Զարուհի Փոստանջյանի վարքագծին եւ Սերժ Սարգսյանին ուղղված հարցին:

«Սա առաջին դեպքը չէ, բայց ես զերծ կմնամ ընդհանրապես գնահատական հնչեցնելուց, որովհետեւ պատվիրակության կազմում Զարուհի Փոստանջյանի հետ նախորդող անգամներում իր վարքագծի տարատեսակ դրսեւորումների ժամանակ ներկա չեմ գտնվել, դրա համար մի քիչ բարդ է մամուլին ծանոթանալով եւ անձամբ ականատես չլինելով` գնահատական հնչեցնելը: Կոնկրետ այս դրսեւորման, այս հարցի հետ կապված, բնականաբար, բացասական վերաբերմունք ունեմ եւ չեմ կարծում, որ այդ հարթակները, կամ ԵԽԽՎ-ն այն հարթակն է որտեղ այդ մակարդակի հարց կարելի էր հնչեցնել»,-ասել է Արփինե Հովհաննիսյանը:

Ինչ վերաբերում է այն հակադարձումներին, թե պատգամավորն իր ազատ խոսքի իրավունքից է օգտվել, ապա ըստ ԵԽԽՎ հայաստանյան պատվիրակության ներկայացուցչի «Ես դա չեմ բացառում, բայց իմ խորին համոզմամբ եւ իմ գնահատմամբ, իմ չափանիշներով դա ազատ խոսքի դրսեւորում չէ, բայց դա իմ տեսակետն է, դա էլ իմ ազատ խոսքի դրսեւորումն է, երբ որ ես հիմա արտահայտում եմ իմ տեսակետը ու ասում, որ իմ խորին համոզմամբ այդ մակարդակի, այդ բնույթի հարցեր, գիտեք անգամ ծիծաղ առաջացնող հարց էր, իսկ դա դուք կարող էիք տեսնել ԵԽԽՎ-ում անմիջապես պատվիրակների արձագանքներից: Շատ պարզունակ հարց էր եւ այդ կարգի կառույցներում ուղղակի հնչեցնել չարժեր»:

Այսինքն` սա այդ «կեղտոտ սպիտակեղե՞նը» չէր, որ պետք է դուրս հանել հարցին Արփինե Հովհաննիսյանը տվել է հետեւյալ պատասխանը.

«Ես այստեղ կեղտոտ սպիտակեղենի խնդիր չեմ տեսնում, ես այստեղ պարզապես ասում եմ` պետք էր ուղղակի տեսնել, հետեւողական լինել ու հասկանալ, թե իրականում ընդդիմությունը ինչ խնդիրներ այսօր ունի Հայաստանում, որոնք ինքը բարձրաձայնում է: Իրականում մեր երկրում բազմաթիվ խնդիրներ կան` սկսած սոցիալական խնդիրներից եւ մյուս ոլորտներից, եւ կարծում եմ` արժեր այդ խնդիրները հնչեցնել` որպես ընդդիմություն եւ մտահոգություն արտահայտել եւ ստանալ դրա պատասխանը: Այնպես որ ես այստեղ կեղտոտ սպիտակեղենի խնդիր չեմ դնում, պարզապես կոռեկտությունից դուրս հարց էր, որը չարժեր այդ հարթակից հնչեցնել, դա իմ կարծիքն է»:

Արփինե Հովհաննիսյանը ասել է, որ ինքը չգիտի, թե ինչ 80 տոկոսի մասին է խոսել Զարուհի Փոստանջյանը, երբ ասել է, որ Սերժ Սարգսյանին ուղղված հարցը հետաքրքրում էր բնակչության 80 տոկոսին:

Կայքի հարցին, թե ինչպես կմեկնաբանեք Զարուհի Փոստանջյանի հարցի սկիզբը, երբ նա նշեց, որ Սերժ Սարգսյանը գողացել է ՀՀ քաղաքացիների քվեն, Ա. Հովհաննիսյանը նշել է. «Բայց դա իր գնահատականն է, իր քաղաքական ուժի, իր` որպես քաղաքական գործչի տեսակետն է, որը ավելի քաղաքական էր, քան երկրորդ մասը, որից նա կարող էր բխեցնել իր հարցը: Ես այդ տեսակետը արմատապես չեմ կիսում, բնականաբար, բայց դա իր քաղաքական ուժի դիրքորոշումն էր, որը նա կարող էր հնչեցնել եւ կարող էր չհնչեցնել»:

Մանրամասները կարդացեք այստեղ՝