Թրամփը մերժել է Նեթանյահուի առարկությունները՝ կապված Թուրքիային F-35 մատակարարելու հետ
ԱՄՆ նախագահ Դոնալդ Թրամփը մերժել է Իսրայելի վարչապետ Բենիամին Նեթանյահուի առարկությունները՝ կապված Թուրքիային F-35 կործանիչների հնարավոր վաճառքի հետ։
«Ոչ ոք ինձ չի ասի, թե մենք ինչ պետք է վաճառենք»,– լրագրողներին հայտարարել է Թրամփը Air Force One ինքնաթիռում։
Նա Թուրքիային բնութագրել է որպես «հիանալի դաշնակից», որը «շատ լավ աշխատանք է կատարել» տարածաշրջանային հարցերում, այդ թվում՝ Սիրիայում։
Թրամփը նշել է, որ Անկարան «Իսրայելի կամ Նեթանյահուի մեծ երկրպագուն չէ», սակայն ընդգծել է, որ Վաշինգտոնի և Անկարայի միջև երկկողմ գործընկերությունը շարունակում է ամուր մնալ։
Թուրքիայում ՆԱՏՕ-ի գագաթնաժողովի ընթացքում Թրամփը հայտարարել էր, որ «անշուշտ կքննարկի» Թուրքիային F-35 կործանիչների մատակարարումների վերականգնման հարցը՝ Թուրքիային անվանելով երկիր, որը «շատ ավելի հավատարիմ է, քան մյուսները»։
Թուրքիայի նախագահ Ռեջեփ Թայիփ Էրդողանը ավելի վաղ հայտարարել էր, որ Թրամփը «դրական դիրքորոշում» ունի Թուրքիային F-35 կործանիչների մատակարարման հարցում։
