Սեուլը բանակցություններ է առաջարկել Փհենյանին
France-Presse լրատվական գործակալության փոխանցմամբ՝ Հարավային Կորեայի իշխանությունները ԿԺԴՀ-ին առաջարկել են բանակցություններ սկսել Կեսոնի արդյունաբերական շրջանի հարցում համագործակցության վերսկսման շուրջ:
Այդ շրջանը գտնվում է համատեղ ղեկավարման տակ և փակվել է երկու երկրների միջև հակամարտության սրվելուց հետո: Սեուլը հայտարարել է, որ եթե Փհենյանից ստանա մերժում, ապա կդիմի վճռական միջոցների՝ չմանրամասնելով, թե կոնկրետ ինչի մասին է գնում խոսքը:
Գործակալության տվյալներով՝ վճռական միջոցների տակ Սեուլը նկատի ունի համատեղ գոտու հետագա աշխատանքներից ամբողջովին հրաժարվելը և իր 123 ձեռնարկության տարհանումը, որոնք ապահովում են 53.000 աշխատատեղ: Կեսոնի շրջանը գտնվում է ԿԺԴՀ-ի հարավում:
2002 թվականին այնտեղ Հարավային Կորեայի հետ համատեղ ստեղծվեց արդյունաբերական գոտի, որը փակվեց 2013 թվականի ապրիլին՝ Փհենյանի ու Սեուլի միջև հարաբերությունների սրման հետևանքով:
