Վրաստանը ցանկանում է ընդլայնել Թուրքիայի ու Ադրբեջանի հետ ռազմական համագործակցությունը
Ադրբեջանական Trend լրատվական գործակալության փոխանցմամբ՝ Վրաստանը դիտարկում է Թուրքիայի ու Ադրբեջանի հետ եռակողմ ձևաչափով ռազմական համագործակցության ընդլայնման հնարավորությունը: Այս մասին այսօր տեղի ունեցած ճեպազրույցի ժամանակ հայտարարել է Վրաստանի պաշտպանությաննախարար Իրակլի Ալասանիան.
«Արդեն իսկ գոյություն ունի այդպիսի եռակողմ հարաբերությունների ձևաչափ, և մենք մտադիր ենք ընդլայնել այն՝ նոր համատեղ զորավարժությունների կազմակերպման ուղղությամբ:
Այդ ձևաչափով արդեն իսկ անցկացվել են եռակողմ հրամանատարա-շտաբային վարժանքներ, և այժմ խոսքը գնում է գումարտակների մակարդակով զորավարժությունների մասին: Դեռ բանակցություններ են ընթանում, զորավարժությունների պլանավորման գործընթացը դեռ չի սկսվել, սակայն այդ հարցում կան լավ հեռանկարներ»:
Նշվում է, որ ավելի վաղ Վրաստանը, Թուրքիան ու Ադրբեջանը հրամանատարա-շտաբային զորավարժանքներ են անցկացրել «Բաքու-Թբիլիսի-Ջեյհան» նավթամուղի անվտանգության ապահովման շուրջ:
Հիշեցնենք, որ օրեր առաջ էլ Իրակլի Ալասանիան հայտարարել էր, որ Վրաստանում հաջորդ տարվա զորավարժություններին կարող են մասնակցել նրա տարածաշրջանային գործընկերները:
