Uber-ը տաքսիստներին միլիոնավոր դոլարներ կվերադարձնի սխալ հաշվարկների պատճառով
Տաքսի պատվիրելու Uber Technologies Inc օնլայն ծառայությունը սխալ հաշվարկներ է կատարել, ինչի հետևանքով Նյու Յորքի վարորդները, որոնք աշխատել են ընկերության հետ, կորցրել են տասնյակ միլիոնավոր դոլարներ:
Uber-ը խոստացել է փոխել հաշվարկի կարգն ու ամբողջությամբ վարորդներին վերադարձնել կորցած աշխատավարձերը, գրում է The New York Times-ը:
Ընկերության տեղեկություններով՝ ինքը վերցրել է միջնորդավճար ողջ գումարից, որը վճարել է ուղևորը, այն դեպքում, երբ պետք է ստանա տոկոս վճարից՝ առանց հարկերը հաշվելու:
Օրինակ՝ եթե ուղևորը ուղևորության համար վճարում է 20 դոլար, դրանից 2 դոլարը բաժին է ընկնում հարկերին:
Uber-ը հաշվարկել է ստանալ իր միջնորդավճարը 20 դոլարից, այն դեպքում, երբ պետք է ստանա իր մասնաբաժինը միայն 18 դոլարից:
Չնայած նրան, որ մեկ ուղևորի հաշվարկով գումարը մեծ չի ստացվում, սակայն հաշվի առնելով այն, որ հաշվարկները կատարվել են 2014 թվականի նոյեմբերից, գումարը ահռելի է ստացվում, գրում է CNN-ը:
Uber-ը Նյու Յորքում աշխատում է ավելի քան 50 հազար վարորդների հետ:
«Մենք պարտավորվում ենք որքան հնարավոր է արագ յուրաքանչյուր վարորդին վճարել ամեն մի ցենտը, որը նրանց հասնում է՝ գումարած տոկոսները»,-հայտարարել է ԱՄՆ-ում և Կանադայում Uber-ի տարածաշրջանային տնօրեն Ռեյչել Հոլթը:
Միջինը ընկերությունը տաքսիստներին կվերադարձնի մոտ 900 դոլար: Փոխհատուցում ստանալու իրավունք ունի ցանկացած վարորդ, որը համագործակցել է տաքսի ծառայության հետ 2014 թվականից:
