Երկու նպատակ ունեմ՝ իշխանափոխություն և իմ ընկերների վերադարձը՝ Բաքվի բանտից. Սերժ Սարգսյան
ՀՀ երրորդ նախագահ Սերժ Սարգսյանից այսօր լրագրողները հետաքրքրվեցին՝ ո՞ւմ համար էր Ռոբերտ Քոչարյանի ասուլիսը, որտեղ պարբերաբար անդրադարձ էր կատարվում հենց Սերժ Սարգսյանին:
«Ես ինչո՞ւ պետք է ենթադրություններ անեմ, թե մեկ այլ քաղաքական գործչի ասուլիսն ում համար էր, երևի հանրության համար էր»,- ի պատասխան՝ ասաց նա:
Հարցին՝ ամեն դեպքում, Ռոբերտ Քոչարյանը 2018-ին կամ 2021-ին զանգե՞լ է իրեն, Սերժ Սարգսյանը պատասխանեց, որ հակված չէ անձնական խոսակցությունները, զրույցները հրապարակայնացնել.
«Զանգ եղել է, բայց դրանից առաջ էլ է զանգ եղել, դրանից առաջ էլ է թեմա եղել»,- ասաց նա:
Լրագրողը հետաքրքրվեց՝ ինչքա՞ն առաջ, որովհետև Ռոբերտ Քոչարյանն ասել է, որ տևական ժամանակ չէիք շփվում:
«Կարծում եմ՝ նա նկատի ուներ այսօրվա պարագան, բայց 2018-ին այդպես չէր: Համենայնդեպս, այդ մանրամասներն ի՞նչ հետաքրքիր են: Մի բան կարող եմ հստակ ասել, որ ցանկացած մանրամասն, ձեզ հետաքրքրող փոքրիկ հարց ես կարող եմ բարձրաձայնել միայն այն ժամանակ, երբ նպատակահարմար համարեմ: Իմ լեքսիկոնում երբևէ լսե՞ք եք այդպիսի բան՝ կոնտրոլի տակ, ես չունեմ այդպիսի բառապաշար»,– ի պատասխան՝ ասաց նա:
Ինչ վերաբերում է «Իսակովի հողերի» գործին, նա հույս հայտնեց, որ դատարանը մանրամասն կքննի և կհամոզվի մեղադրանքի աբսուրդային լինելու մեջ:
Լրագրողը նկատեց՝ որքան էլ Սերժ Սարգսյանը խուսափում է մանրամասներ հայտնել, ամեն դեպքում հրապարակում կա, որ 2018-ի ապրիլին Ռոբերտ Քոչարյանը Սերժ Սարգսյանին զանգահարել է, իսկ նա վստահեցրել է, որ ամեն ինչ նորմալ է, և հարց բարձրաձայնել՝ արդյո՞ք պետական կառույցները չեն զգուշացրել, որ երկրում այլ իրավիճակ է.
«Ես ձեզ խնդրում եմ՝ 2018թ. մասով ինձ հարցեր մի ուղղեք, գնացեք և դիտեք իմ հարցազրույցները 2018 թվականի մասին: Ժամերով խոսել եմ, դրանից ավել բան ես մի անգամ եմ ասելու, բայց ասելու եմ ուղիղ եթերում, որպեսզի մարդիկ նաև հնարավորություն ունենան հարցեր տալու»:
Նա նշեց, որ դա կանի, երբ նպատակահարմար համարի:
Երրորդ նախագահը վերահաստատեց՝ սատարում են, կողմ են իմպիչմենտի գործընթացին:
Հարցին՝ իմպիչմենտը լո՞ւրջ օրակարգ է, նա պատասխանեց.
«Ներողություն, դուք Սահմանադրության մեջ գրված հոդվածին անլրջությա՞մբ եք վերաբերվում: ՀՀ Սահմանադրության մեջ շատ հստակ գրված է, թե ինչպես կարելի է անվստահություն հայտնել գործող վարչապետին: Ի՞նչ իրավունքով ենք դա անլրջացնում: Այսինքն՝ 2021 թվականին ընտրություններին գնալը շատ լուրջ էր, որ հաղթելու ենք, իսկ իմպիչմենտ անելն անլո՞ւրջ է»:
Նա նշեց, որ լրագրողները պարտավոր են քաղաքական պրոցեսների մասին դետալ առ դետալ իմանալ.
«Ձեզ խնդրում եմ՝ հանդիպեք նախաձեռնողների հետ, և մանրամասն ձեզ կբացատրեն, թե ո՞ր փուլում են իրենք հարմար գտնում ՔՊ-ականների հետ բացատրական աշխատանք վարելը, ե՞րբ են ենթադրում այդ փաստաթուղթը մուտքագրել ԱԺ, որպեսզի ներառվի դա օրակարգի մեջ, և ընդհանրապես, պրոցեսն իրենք ինչպե՞ս են պատկերացնում»:
Հարցին՝ ինչո՞ւ թեկնածու չեն առաջադրում, նա պատասխանեց, որ պատճառը շատ պարզ է.
«Եթե ձեզ թվում է, որ ես արդեն 7 տարի հայտարարում եմ, որ մենք իշխանություն չենք ուզում, դրանով ինքներս մեզ ավելի օգուտ ենք տալիս, ո՛չ, վնաս ենք տալիս: Պարզ է, չէ՞, որ ցանկացած միջոցառման, ընտրական պրոցեսի մարդկանց մեծ մասը գնում է դեպի այն ուղղությունը, որտեղից կարելի է շահ ունենալ, որտեղ կարելի է ներառվել: Մի շատ պարզ պատճառով ենք դա ասում, որովհետև մենք, ի տարբերություն շատ-շատերի, գիտակցում ենք, որ եթե մենք թեկնածու առաջադրենք, ապա հակադրությունը ո՛չ միայն ՔՊ-ի կողմից է լինելու: Ավելի մեծ հակադրություն է լինելու: Մենք փորձում ենք գնալ ավելի քիչ դիմադրության հանդիպելու ճանապարհով, որպեսզի հնարավորինս շուտ կարողանանք Հայաստանում իշխանափոխություն իրականացնել»:
Նա նշեց, որ ՀՀԿ-ի թիրախավորման պրոցեսը 2018-ից չի սկսվել.
«Եթե ուշադրությամբ դիտել կամ ընթերցել ենք Երկրորդ նախագահի հարցազրույցը, այնտեղ ասում է, որ այդ պրոցեսը գոնե իր կողմից սկսվել է 2008-ից հետո: Այնպես որ, 2018-ն ի՞նչ կապ ունի»:
Ինչ վերաբերում է Երկրորդ նախագահի թիմակիցների մեղադրանքներին, թե Սերժ Սարգսյանն է բերել Փաշինյանին, Երրորդ նախագահը նշեց, որ 2018-ի մասին հիմա չի խոսելու:
«Ինչքան ուզում եք՝ սադրեք, ես 2018-ի մասին այլևս չեմ խոսելու, ինչ ուզում եք՝ արեք, ուզո՞ւմ եք՝ դուք էլ հիմա բարձրաձայն գոռացեք, որ ես եմ բերել էսօրվանին, խնդրել եմ, որ գա, օգնել եմ, որ գա… Ուզո՞ւմ եք ասեմ՝ էդ պարագայում ես մազոխիստ եմ, էլի, իհարկե, ուզել եմ, որ գա, որ դատարանների դռները քարշ գամ…»,- ասաց նա:
Հարցին՝ ինչո՞ւ Սերժ Սարգսյանին մերժեցին, բայց 2018-ին բանտ նստեցրին Ռոբերտ Քոչարյանին, նա պատասխանեց.
«Այսինքն՝ ուրախ կլինեիք, հա՞, որ ես էլ նստած լինեի: Մեծ հերոսությո՞ւն է մի տարի նստելը: Բա իմ գործընկերները, որ նստած են, տարիներով նստել են, Արմեն Աշոտյանը, երևի արդեն երկու տարին անցնում է, որ նստած է, էդ որ ես տարիներով դատարանի դռներով քարշ եմ գալիս, դա ի՞նչ, իշխանություններն ինձ ռեկլամ են անո՞ւմ»:
Նախագահը չգիտի՝ ինչո՞ւ ՀՀ կառավարիչները չեն արձագանքում, պատասխանում Ալիևին, որը Հայաստանի սուվերեն տարածքն անվանում է Արևմտյան Ադրբեջան:
«Մի բան կարող եմ ենթադրել՝ չեն արձագանքում, որպեսզի մեղմեն, երևի, հարևան երկրի նախագահի զայրույթը կամ դուր գան, որպեսզի նա բարի գործեր անի իրենց համար… Երևի ուզում են ինչ-որ համաձայնագիր ստորագրել, որի մասին հանրությունը տեղյակ չէ:
Իմիջիայլոց, երբ խոսում ենք իմպիչմենտի մասին, որևէ մեկին չի՞ հետաքրքրում՝ ինչու է մեր դիրքորոշումն այդպիսին: Նախ՝ ասեմ հետևյալը, որ 2021թ. ես երբեք և որևէ տեղ չեմ ասել, որ չենք գնալու ընտրությունների: Այո, ես դեմ եմ եղել ընտրություններին, բայց ոչ թե դա փաստարկելով՝ որպես ընտրությունները լեգիտիմացնելու քայլ, այլ շատ հստակ ասել եմ, որ խորապես համոզված եմ և իմ այդ համոզմունքը հիմնված է քաղաքական դաշտը և ժողովրդի տրամադրություններն ուսումնասիրելու վրա, որ միանշանակ այսօրվա կառավարիչը հաղթելու է այդ ընտրություններում: Հաղթելու է, և մենք դառնալու ենք մասնակիցը՝ կապիտուլյացիայի լեգիտիմացման, և միջազգային հանրությունը մեզ՝ հայ ժողովրդին, մեղադրելու է այդ կապիտուլյացիայի համար, ասելու է, որ ժողովուրդը, թեև կապիտուլացվել է Հայաստանը, բայց վստահում է այսօրվա կառավարչին: Ինչը և տեղի ունեցավ: 1-1.5 տարի և՛ մեր դաշնակիցները, և՛ մեր գործընկերները դրա վրա էին հղում կատարում: Եթե ես սխալ եմ կանխատեսել, ասեք՝ սխալ եմ կանխատեսել»,- ասաց Սերժ Սարգսյանը:
Նա նշեց, որ հիմա պաշտպանում են իմպիչմենտի գաղափարը՝ ելնելով հետևյալ հանգամանքներից.
«Մենք՝ հավաքական ընդդիմությունը, առնվազն 5 տարի հայտարարում ենք, որ այսօրվա կառավարիչների մեկ օր ավել մնալն իշխանության վնասում է ՀՀ-ի շահերին: Այդ ի՞նչ պատահեց, որ հիմա էլ ասում են՝ չէ, մի տարի սպասենք, մինչև ընտրությունները գան… Իմ տարիքի մարդիկ գիտեն, որ բազմաթիվ են եղել դեպքերը մեր նորագույն պատմության մեջ, որ մենք գնացել ենք իրադարձությունների, որոնք շատերի կարծիքով հավանական չէին, բայց հաջողությամբ են պսակվել: Ի՞նչ եք կարծում՝ հնարավո՞ր է՝ այս մեկ տարվա ընթացքում այսօրվա Հայաստանի կառավարիչները կատարեն մի քայլ, որը, շատերի համոզմամբ՝ վնասակար կլինի Հայաստանի համար: Օրինակ՝ կարո՞ղ է մի քանի ամիս հետո այս կառավարիչները մի թուղթ ստորագրեն և ասեն՝ Հայաստանից հանում ենք ռուսական սահմանապահներին, ռուսական բազան, մեր անվտանգությունն արդյո՞ք դրանով կամրապնդվի: Երկրորդ՝ լավ, դա ուրիշները կարող են համարել քիչ հավանական, իսկ ի՞նչ եք կարծում՝ ավելի շատ հավանակա՞ն է, թե՞ հավանական չէ, որ տեսանելի ապագայում, այսինքն՝ ամիսների ընթացքում, այս կառավարիչները կստորագրեն իրենց ասած խաղաղության համաձայնագիրը: Կարծում եմ, որ ավելի հավանական է, որ դա կանեն, իսկ մենք չգիտենք՝ ինչ է այդ համաձայնագրում գրված: Հավանականությունը շա՞տ է, թե՞ քիչ, որ այդ համաձայնագրում Հայաստանի համար ավելի շատ բացասականը կլինի, քան դրականը: Հավանական է, չէ՞: Իսկ, լավ, եթե այդպես է, ստորագրելուց հետո նույնիսկ եղան ընտրություններ, և ընդդիմությունը հաղթեց, ընդդիմությունը կարողանալո՞ւ է հեշտ ճանապարհով այդ համաձայնագիրն ի չիք դարձնել: Բա դրանից հետո ինքներս մեզ չենք մեղադրելո՞ւ՝ մի տարի անգործության մատնվեցինք, միայն քննադատեցինք սրանց: Միգուցե այս կետն էլ քիչ հավանական համարեք, բայց հավանական է, չէ՞, որ մեկ, երկու, երեք ամիս հետո Հայաստանի հատվածից էլի մի հատված փոխանցվի Ադրբեջանին, ինչպես դա տեղի ունեցավ Տավուշում: Եվ եթե փոխանցվի Ադրբեջանին, ապա լավ, էլի ընդդիմությունը հաղթեց, մենք կարողանալո՞ւ ենք դա վերադարձնել: Դրան ոնց որ թե կազուս բելի են ասում: Բա ի՞նչ ենք անելու, ասելու ենք՝ դե ոչինչ, ջհանդամը, Ղարաբաղը հանձնեցինք, Արցախը տվեցինք, Հայաստանից տարածքներ տվեցինք, դե դրանց համեմատ ի՞նչ է մի անկլավը, դա էլ տանք՝ պրծնենք, միայն իշխանափոխություն լինի՞: Ես համաձայն չեմ այդ տեսակետին: Մեր հիմնավորումները դա է, որ մենք ասում ենք՝ փորձենք: Թող չստացվի»:
Անդրադառնալով հայտարարություններին, թե նախորդ բոլոր շարժումներն «իրենք են համակարգել», նա ասաց.
«Այսինքն՝ մենք էլ կողքից հարսանքավոր ենք եղել, իրենք քավորն են եղել, մենք էլ՝ հարսանքավոր: Դե, եթե իրենք կուզենան իրենց քավորությունը շարունակել, կառաջարկեն փողոցային պայքար, մենք պատրաստ կլինենք»:
Հարցին՝ Ձեր և Ռոբերտ Քոչարյանի միջև հակասությո՞ւնն է ավելի շատ մեծ, թե՞ ցանկությունը՝ Նիկոլ Փաշինյանին հեռացնելու, նա պատասխանեց. «Ձեր հարցի հասցեատերն ուրիշ է: Ես քանի՞ անգամ եմ հայտարարել, որ ես և իմ թիմակիցները նպատակ չունենք իշխանության գալու, մեր նպատակն իշխանափոխությունն է, իսկ եթե անձնապես եք ուզում, ես երկու կարևոր նպատակ եմ տեսնում. առաջին՝ իշխանափոխություն, երկրորդ՝ իմ ընկերների վերադարձը Բաքվի բանտերից: Ես ուրիշ բան չեմ ուզում: Ով ինչ ուզում է, թող ամբողջությամբ վերցնի»:
Մանրամասները՝ տեսանյութում:
