Երևանցու իմիջով. մամուլ
«Հրապարակ» օրաթերթը գրում է. «Ի՞նչ եք կարծում, ո՞ր տեղը կգրավեք առաջիկա ընտրություններում՝ հարցրինք ավագանու ՕԵԿ ցուցակը գլխավորող Արմեն Երիցյանին:
«Բնականաբար՝ պատվավոր առաջին»: Արգումենտնե՞րը: «Դինամիկան, որն ակնառու է մեր քարոզարշավի ընթացքում, մեր հանդիպումներին բնակիչները շատ ակտիվ են մասնակցում ու արձագանքում: Քարոզարշավի մեկնարկի և այժմյան տարբերությունը հսկայական է բոլոր առումներով. գալիս են, ակտիվ արձագանքում են, անչափ շատ հարցեր են տալիս, զգում են, որ ուզում ենք իրենց համար գործ անել, որովհետև մենք ծրագրերի, թղթի մեռած լեզվով չենք իրենց հետ խոսում, խոսում ենք գործից, հոգսից, երևանցու դարդուցավից»:
Դուք ներմուծեցիք «երևանցու իմիջը»՝ մտածվա՞ծ, որպես քարոզարշավի բաղկացուցիչ տարր: «Իհարկե ոչ, նման բանը մտածված չի լինում, ի սրտե է լինում, որովհետև ես իսկապես շատ եմ ուզում, որ վերականգնվի մեր հին Երևանի ավանդական ոգին, կերպարը, կոլորիտը, որ կար մեր ժամանակ: Դրա համար պետք չէր մտնել կաղապարի մեջ, դա տղամարդու համար չէ, դրա համար պետք է պարզապես սիրել քաղաքդ»»:
