Հայաստանի և Վրաստանի մասնագետները կմասնակցեն Մոսկվայում կայանալիք «Ռուսաստանի էներգետիկ շաբաթ»-ին
Հայաստանից և Վրաստանից մասնագետներ կմասնակցեն Մոսկվայում կայանալիք «Ռուսաստանի էներգետիկ շաբաթ» միջազգային համաժողովին, հայտնում է Երևանում Ռուսական տան մամուլի ծառայությունը։
«Հայաստանից չորս մասնագետ և առաջին անգամ Վրաստանից չորս մասնագետ կմեկնեն Մոսկվա՝ «Ռուսաստանի էներգետիկ շաբաթ» (ՌԷՇ) միջազգային համաժողովին մասնակցելու համար։ Այցը կիրականացվի «Ռոսսոտրուդնիչեստվոյի» «Նոր սերունդ» ծրագրի շրջանակում։ Համաժողովը կանցկացվի հոկտեմբերի 14-16-ը»,– ասվում է հաղորդագրության մեջ։
Նշվում է, որ այցից առաջ Երևանում Ռուսական տանը տեղի է ունեցել ապագա մասնակիցների հանդիպումը։ Վրաստանից ժամանող մասնագետները հանդիպմանը միացել են առցանց ձևաչափով։
Պատվիրակությունների կազմում ընդգրկված են էներգետիկայի, ինժեներական տեխնոլոգիաների, ֆինանսների և էներգետիկ ընկերությունների կառավարման ոլորտների մասնագետներ։
